Арча шәһәрендә "Җиңүнең 70 еллыгы исемендәге ял паркы" ачылуын күпләр ишеткәндер дә. Районыбызда парк һәм скверлар көнен быел нәкъ менә шунда чын бәйрәм буларак билгеләп үттеләр. Күңелгә ятышлы матур, җылы, якты кичә булды ул. Кеше дә күп килгән. Өлкәннәр дә күп иде...

    Артык зур булмаса да, бар да сыйган һәм бар да үз урынында яңа паркта. Тирә–юне яшеллеккә күмелгән. Тротуарлардан матурлыкка сокланып (кичен яктырткычлар яктылыгында ул икенче төрле сихри матурлыкка күмелә) эчкә үтәсең. Хәрби техникалар, ял итү өчен беседкалар, сугышта һаләк булганнарга куелган обелиск–паркны тагын да тулыландыра. "Биредә әле фонтан, тир, яңа өйләнешүчеләр өчен мәхәббәт күперчеге булачак. Башкарган эшләребезнең барысы да халык өчен. Игелеге булсын, парк һәрчак шулай гөрләп торсын"  – диде бәйрәмне ачып җибәргәндә район җитәкчесебез Илшат Нуриев...

    Бу көнне парк белән янәшә мәйданчыкта авыл хуҗалыгы ярминкәсе дә гөрләде.

    Арча шәһәре мәдәният йортында 13 сентябрь - Татарстан Республикасы Президентын һәм җирле үзидарә органнарына депутатлар сайлау уңаеннан эшлекле очрашу уздырылды. Әлеге очрашуга Мөхәммәтшин Фәрит Хәйруллович җитәкчелегендә Республика җитәкчелегеннән дә кунаклар килде. Аларны муниципаль район җитәкчесе Нуриев Ильшат Габделфәртович озатып йөрде...

Яңа уку елын башлап та җибәрдек. Укучыларыбызны, барлык коллегаларыбыз - мәгариф хезмәткәрләрен, әти-әниләрне 1 сентябрь - белем бәйрәме белән чын күңелебездән тәбрик итәбез! Укыту-тәрбия өлкәсенең үзәгендә кайнаган һәркемгә ныклы сәламәтлек, иҗади уңышлар, ныклы белемнәр теләп калабыз. Бәйрәм белән барыгызны да!!!

Республика көне уңаеннан оештырылган Арча муниципаль районы мәктәпләре ярминкәләре гөрләп үтте. Безнең мәктәп тә бу көнне тәҗрибә участогыбызда үстерелгән яшелчә, җиләк-җимешләр белән сату иттек. Кул эшләнмәләре, сөт ризыклары да күп иде. Кабак бәлеше, гөбәдия, ит пәрәмәче кебек тәм-томнар да сатып алучыларның күңеленә бик хуш килде...

Ә укытучылар сабантуенда рәхәтләнеп ял иттек. Төрле кызыклы уеннар, дәртле җыр-биюләр яңа уку елы алдыннан күңелләргә очкын салды...

Мәктәбебезнең чәчәкле мәйданчыгында Әдәби мәйдан проекты кысаларында “И галиҗәнәп шигърият” дип исемләнгән әдәби мәйдан үткәрелде. Кичәнең максаты: укучыларны күбрәк китапханәгә тарту, матур әдәбиятны, шигъриятне халыкка җиткерү.

Кичәдә китапханәче Фаттахова Рәмзия язучыларыбызның юбилейлары, тормыш һәм иҗат юллары белән кыскача таныштырып үтте. Клуб мөдире Ханафиева Фәния үзенең туган авылыбызга багышланган шигырьләрен, музей хезмәткәре Мөхәммәтшина Ләйлә Габдулла Тукай шигырьләрен, балалар бакчасы тәрбиячесе Алинә Әюпова яшь шагыйрьләрнең шигырьләрен укыдылар. Кичәдә шулай ук җырлар да яңгырады.

Кичәгә килгән кунакларның әдәбиятка, шигърияткә, гомумән китапка битараф булмаулары, яраткан язучыларыбызның иҗатлары белән танышып, кызыксынып торулары безне сөендерде.

Кушлавыч авыл клубында "Экстремизм - киләчәксез, киләчәк - экстремизмсыз" дип аталган ток-шоу үткәрелде. Чара башланыр алдыннан "Ә бездә экстремизм, террорчылык күзәтеләме?" дигән сорауга мөрәҗәгать иттек. Ток-шоу барышында укучылар шушы сорауга җавап табарга тырыштылар...
    ..."Бездә экстремизмга урын юк. Без, төрле милләт балалары, бер-беребез белән дус-тату яшибез, гореф-гадәтләребезне хөрмәт итәбез. Дуслык-татулык - иң зур байлык" дигән нәтиҗә ясадылар ток-шоуда катнашучы балалар...

Кушлавыч авыл клубында бөек татар шагыйре Г.Тукайның тормыш юлына һәм иҗатына багышланган "Каргышлы балачак" фильмы күрсәтелде. Фильмның режиссёры Ә.Зарипов.
Тукавларның Кушлавычтагы музей-йорты җитәкчесе Ләйлә Мөхәммәтшина һәм клуб мөдире Фәния Хәнәфиева тамашачылар, бигрәк тә яшь тамашачылар өчен фильмның герое һәм төшерелү тарихы турында сөйләделәр... Фильмның күп өлешләре авылыбызда төшерелгән булуы кайбер тамашачыларга үзләрен күреп яшь чакларын искә төшерергә мәҗбүр итте.

"Ак каен" мәктәп яны лагерыбызда бүген махсус табигать матурлыгына багышланган тема өстенлек алды. Көн барышында укучыларыбыз табигатькә сәяхәт кылып чәчкә-үләннәрдән букет һәм тәкыяләр дә әзерләргә өйрәнделәр :)

Бүген "Ак каен" мәктәп яны лагерыбызда "Диңгезчеләр көне" үтте. Викториналар, җыр-бию осталыгын күрсәтү чыгышлары һәм спорт ярышлары да әлеге тематика белән бәйле иде. Укучылар үзләре өчен яңа ачышлар ясап бик күп өстәмә мәгълүмат та ала алдылар, күңелле итеп ял иттеләр. Бу көнне аларга иң ошаганы рәсем ясау конкурчы, бигрәк тә күз бәйләп диңгез корабы ясау булды...

Мәктәп яны лагерыбыз тулы көченә эшли. Балалар әйдәманнары белән берлектә төрле ярыш-конкурсларда көч сынашалар, үзләренең сәнгатьтә осталыкларын күрсәтәләр. Кыскасы һәркемгә үз үзенчәлеген ачып күрсәтә алу мөмкинлеге бирелгән...