18 январьда Шушмабаш урта мәктәбендә шорт-трекның зона ярышлары булды. Ярышларда безнең мәктәп укучылары да актив катнашты. 

Туган тел – рухи байлыгыбыз сандыгына ачкыч ул. Халкыбызның гасырлар буе яшәп килгән, буыннан-буынга тапшырылган тормыш тәҗрибәсе, гореф-гадәтләрен әхлак кануннарын, йола-бәйрәмнәрен, әдәбият һәм сәнгать әсәрләрен-кыскасы, рухи байлыгыбызны тирәнтен аңлау һәм үзләштерү туган телдән башка мөмкин түгел. Ана телендә тәрбияләнгән бала гына, үз халкының әхлак кануннарын кабул итеп, милләтенә, аның теленә һәм гореф-гадәтләренә чын мәгънәсендә ихтирамлы була ала.Халык авыз иҗаты әсәрләренең тәрбияви әһәмияте аеруча зур. Җанлы һәм тапкыр сүзле мәкаль-әйтемнәр, санамыш, такмак, табышмак, әкиятләр һ.б.ш. балаларда тел матурлыгын тоемлау тәрбиялиләр, танып белү эшчәнлеген, сөйләм телен үстерәләр.Быел укытучыларыбыз башлангыч класслар атналыгының темасын халык авыз иҗатына багышларга уйладылар. Укучыларыбыз авыл һәм мәктәп китапханәләренә экскурсиягә бардылар. Аларны китапханәчеләр  татар халык авыз иҗатына багышланган әдәбият белән таныштырдылыр. Укучылар укыр өчен әкиятләр, табышмаклар, мәкальләр, җырлар, әйтемнәр, санамышлар, тизәйткечләр алдылар.

    17 гыйнварда Шушмабаш урта мәктәбе базасында “Арча хәбәрләре” газетасы призына район мәктәпләре укучылары арасында шахмат турниры булды. Бу турнирда безнең мәктәптән  Абдуллин И,  Сафиуллин И, абыйлы-энеле Хайруллиннар да катнашты. 

Сәрдәбаш башлангыч мәктәбе укучылары “Светофор патшалыгы”нда кунакта булдылар.Поездда сәяхәт итеп, транспорт төрләре, юл билгеләре, урамда йөрү кагыйдәләре, транспортта әдәплелек кагыйдәләре турында белем һәм күнекмәләрне ныгыттылар.”Кем җитез?” тукталышында юл хәрәкәте иминлегенә карата тест эшләделәр. Балаларыбыз исән-имин булсыннар!

19 января 2018 года 12:00-13:30 проводится республиканское родительское интернет-собрание по теме: "Виртуальная жизнь ребенка: интернет - друг или враг?"

МБГБУ “Носы төп мәктәбе”ндә 16 нчы гыйнвар көнне Ш.Мәрҗанинең 200 еллыгына багышланган   чаралар үтте. Мәктәп фойесында Ш.Мәрҗанигә багышланган күргәзмә эшләде. Ш.Мәрҗанинең тормыш юлы һәм эшчәнлеге буенча телдән журнал үткәрелде һәм презентация күрсәтелде. Шулай ук викторина оештырылды. 8-9 нчы класс укучылары  “Россия тарихында Шиһабетдин Мәрҗани эшчәнлеге” дигән темага чыгышлар ясадылар,   түгәрәк  өстәл артында фикер алышу үткәрелде.

Татарстан Республикасы хәрби комиссариатының Арча һәм Әтнә районнары буенча бүлеге һәм “Арча хәбәрләре” газетасы 2017 ел азагында мәктәп укучылары арасында  “Геройлар көне уңаеннан”  иншалар конкурсы үткәрде. Мәктәбебез укучылары да бу конкурста актив катнаштылар.  8 нче сыйныф укучысы Хлопушин Р. Р. беренче урынны алды.  Татарстан Республикасы хәрби комиссариатының Арча һәм Әтнә районнары буенча бүлегендә җиңүчеләрне котлау тантанасы булды. Хәрби бүлек җитәкчесе Алмаз Борханов конкурста җиңүчеләргә һәм аларның укытучыларына хәрби комиссариат һәм “Арча хәбәрләре” газетасы редакциясе исеменнән Мактау грамоталары, “Геройлар” китабы, сертификат тапшырды.  Районның ДОСААФ оешмасы “Батырлык” китабы, “Арча хәбәрләре” газетасы редикциясе телефон белешмәсе һәм стена календаре бүләк итте.

Сәрдәбаш башлангыч мәктәбе укучылары биек таудан чана шудылар. Көне буе укып, арганнан соң, иркенлеккә чыгып, җил ыжгыртып, оча-оча шудылар. Монда инде бер-береңә үпкәләү, киреләнеп тору юк, узара дуслашып бетәсең. Монда бөтенләй башка мөгаләмә, башка дөнья. Өйгә кайтырга вакыт җиткәч тә, теләр-теләмәс кенә таралдылар. Компьютер уеннары белән артык мавыгып, хәрәкәтне оныта барган балалар өчен менә дигән савыгу чарасы! Исән-сау гына була күрсеннәр.

“Звонок булды

физкультурага,

чаналар тартып,

без киттек тауга.

Таудан выжылдап

төшеп китәбез,

нәкъ апа торган

җиргә җитәбез...”шигыре “Әлифба”да гына калмас,алла боерса.

11 гыйнварда дөньякүләм Рәхмәт көне итеп билгеләп үтелә. “Рәхмәт” сүзе — һәр балага теле ачылгач ук өйрәтелә торган “исәнмесез”, “зинһар өчен”, “рәхим ит”, “сау булыгыз”, “мөмкинме”, “хәерле иртә” кебек тылсымлы сүзләрнең берсе ул. Бу сүзләрнең сәламәтлеккә, кәефкә уңай тәэсир итүен, чынлап та тылсымлы көчкә ия булуын исбатлап торасы юк. Әлеге бәйрәм ЮНЕСКО тарафыннан юкка гына игълан ителмәгән. Бүгенге фән-техника үсеше алга киткән заманда үзара аралашуга вакыт, сүзлек байлыгыбыз кимегәннән-кими, сөйләм телебез ярлылана, җанга якын матур әдәби сүзләр урынына чит телләрдән күчкән алынма сүзләрне куллану модага кереп бара. Елның билгеле беркөнен дә шундый мәгънәле, матур, күңелләрдә уңай хисләр тудыручы сүзебез барлыгын искә төшерү, әлбәттә, артык түгел. Ә инде әлеге тылсымлы сүзләрне һәркем һәркөнне берничә тапкыр кулланса, күңелләрдә миһербанлылык, кешелеклелек кебек сыйфатларга да урын калыр иде. Мәктәбебездә бу көнне аерым билгеләп үтүдән читтә калмады. 7 нче сыйныф укучылары Тухфатуллина Э. һәм Вәлиуллина Л. башлангыч сыйныф укучыларына үз-үзеңне әдәпле тотарга кирәклеге, ул сүзләрнең чын мәгънәсендә сихри көчкә ия булуы турында уен формасында “кызыклы тәнәфес” үткәрделәр. Балалар сүзләр аша бер-берсенә шатлык бүләк иттеләр. Әйдәгез, бу көнне бер-беребезгә "җылы сүзләр" генә әйтик. Салкын кышкы көннәрдә бер-беребезнең җаннарына җылы өләшик!

Бүген 5 нче январьда мәктәбебездә чаңгы көне үткәрелде.   Бу спорт төрен укучылар бик ярата, чөнки чаңгыда шуу саф һавада сәламәтлекне ныгыту һәм чыныктыру чарасы булып тора. Алга таба укучылар  чаңгы ярышларында да катнашып, уңыш яуларлар дип ышанып калабыз.