Иртәбез иртәнге зарядкадан башланды. Аннары балалар Югары Мәтәскә авылына экскурсиягә бардылар. "Гаилә бюджеты" дигән темага әңгәмә уздырылды һәм укучылар  шушы темага рәсем ясадылар. Һәр көнебез файдалы уза.

Бүген Түбән Мәтәскә мәктәбе каршындагы "Кояшкай" лагеренда тәрбияләнүче балалар көнне Россия Федерациясе Һәм Татарстан Республикасы гимннары астында флаг күтәрүдән башладылар. Иртәнге ашны ашаганнан соң укучылар белән авыл китапханәсенә кунакка бардык. Укучылар китапханә, китаплар белән таныштылар. Алар биредә борынгы әби-бабайларыбыз уйнаган уеннарны уйнадылар. Элекке уеннар балаларга бик ошады.

Бүгенге көнебез "Яшел утлар" диеп атала. Бүген безгә кунакка ЮХИДИ профилактика бүлеге җитәкчесе Мөхәммәтҗанова Энҗе Газизовна килде. Укучылар белән "Юлда йөрсәң, бул өлгер" исемле интеллектуаль уен уздырдык. Укучыларның юл йөрү кагыйдәләре турында булган белемнәре тикшерелде. Юл йөрү кагыйдәләрен төгәл үтик! Юлларда сак булыйк!  Барыбызга да исән-имин булырга язсын!

Бүгенге көнебез табигатькә һәм экологиягә багышланды. Лагерьга "Ашыт  тыюлыгы" инспекторлары Абдрахманова Гөлнара Ильясовна һәм Әхмәтҗанов Рәшит Зиннур улы килде. Укучылар белән "Урман төп байлыгыбыз" дигән темага викторина уздырылды. Табигать, урман,  экология турында белгәннәрне искә төшердек. Укучыларга безнең як урманнарында үсүче агачлар турында белем бирелде.  Балалар табышмакларга җавап эзләде, агач яфракларын таныды, пазл җыйды, сорауларга җавап бирде. Викторина кызыклы узды. Ахырдан Гөлнара Ильясовна укучыларга бүләкләр һәм "Марш парков" конкурсында катнашучыларга грамота, рәхмәт хатлары тапшырды. Табигать безнең төп байлыгыбыз, аны яратыйк һәм саклыйк.

Буген Түбән Мәтәскә мәктәбе каршындагы "Кояшкай" лагерендә тәрбияләнүче балалар көнне Россия Федерациясе Һәм Татарстан Республикасы гимннары астында флаг күтәрүдән башладылар. Иртәнге ашны ашаганнан соң укучылар белән Арча шәһәренә сәяхәткә бардык. Кәрим Тинчурин исемендәге Татар дәүләт драма һәм комедия театры артистлары балаларга "Тылсымлы арена" дигән әкият күрсәтте. Әкият укучыларыбызга бик ошады. Аннары алар "Казансу" паркында рәхәтләнеп уйнадылар. Көн бик кызыклы, мавыктыргыч узды.

 Иртәбез иртәнге зарядкадан башланды. Аннары укучылар болынга экскурсиягә бардылар. Бүген лагерьда яшь талантларны барладык. Сәнгатьле итеп шигырь сөйләүчеләрне, җырчыларны, биючеләрне ачыкладык. Отрядлар бер-берсенә концерт куйдылар. Укучылар бар да бик талантлы. Сәнгатьле итеп шигырь сөйләделәр, җырладылар, биеделәр. Рәхәтләнеп ял иттеләр. Көннең икенче яртысында балалар саф һавада төрле хәрәкәтле уеннар уйнадылар. Бүгенге көн дә бик кызыклы узды.

"Кояшкай" лагеренең бүгенге иртәсе дә традиция буенча башланды. Россия һәм Татарстан флагларын күтәрү һәм иртәнге гимнастика башкару. 12 июнь Россия көне. Шушы уңайдан укучылар белән "Россия минем Ватаным" темасына әңгәмә уздырылды. Аннары укучылар "Күл чишмәсе"нә экскурсиягә бардылар. Анда чишмәнең тарихы белән таныштылар. "Россия турында беләсеңме?" дигән темага викторина уздырылды. Россия көне уңаеннан асфальтта рәсемнәр ясадылар. Көн бик мавыктыргыч, кызыклы узды.

Көнебез иртәнге зарядкадан башланды.  Иртәнге аштан соң укучылар табигатькә экскурсиягә чыктылар. Аннары "Яхшылык эшлик" дигән темага класс сәгате уздырылды һәм шушы темага кино карадык.

Бүгенге темабыз китаплар турында иде. Укучылар белән мәктәп китапханәсенә кунакка кердек. "Китап синең дустың" дигән темага әңгәмә уздырылды. Укучылар белән искергән китапларны ремонтладык.

Лагерьның бүгенге көне "Туган авыл" темасына багышланды. Укучылар белән туган авыллары турында әңгәмә уздырылды. Балалар бик теләп үзләре яшәгән авыллары, аларның табигате, тарихы турында сөйләделәр. Авылдан чыккан данлыклы кешеләрне барладык. Мөндеш, Мәтәскә авыллары турында җырлар тыңлау әңгәмәне тагын да җанландырып җибәрде.