Гимназия-интернатның инглиз теле укытучысы Рамил Марат улы Гарипов "Ел укытучысы - 2014" конкурсының финалында катнашачак. 11 - 29 март көннәрендә үткән конкурсның зона этаплары нәтиҗәләре буенча ул 15 финалист арасына керде. Конкурсның финал этабында Рамил Марат улына уңышлар телибез.

29 нчы марттан 4 нче апрельгә кадәр Смоленск шәһәрендә тарих буенча Бөтенроссия олимпиадасының финал этабы үтте. Гимназия-интернатның 10 нчы сыйныф укучысы Шәйхин Айдар олимпиада нәтиҗәләре буенча призер исемен яулады. Айдарны һәм аның укытучысы Миләүшә Магъсум кызы Абдуллинаны чын күңелдән шушы җиңүләре белән котлыйбыз һәм уңышлар телибез.

Халык язучысы, күренекле драматург, җәмәгать эшлеклесе Туфан Миңнуллин истәлегенә багышланган укытучыларның һәм укучыларның I республика конференциясенең "Туфан Миңнуллин иҗаты буенча фәнни эшләр. "Үзем сайлаган язмыш" номинациясендә 10 нчы сыйныф укучысы Галимова Айсылу 1 нче дәрәҗә дипломга, "Драматургия. "Театр яктылыкка, нурга илтә!.." (пьеса) номинациясендә 10 нчы сыйныф укучысы Шәкурова Гөлназ 3 нче дәрәҗә дипломга ия булдылар. Фәнни җитәкчеләре Әминова Ләйсән Галиәкбәр кызы.

7 нче апрельдә Балалар иҗат үзәгендә техник иҗат буенча I Республика фестиваленең муниципаль этабы үтте. Аны тантаналы рәвештә район мәгариф идарәсе җитәкчесе Васил Салихов ачты. Фестивальнең максаты-укучыларның техник иҗатын үстерүгә булышлык итү. Фестивальдә катнашучы укучылар экспозиция рәвешендә үзләренең проектларын куйдылар. Йомгаклау һәм җиңүчеләрне бүләкләү апрельнең икенче ункөнлегендә булачак.

Гимназия-интернатның "Ак җилкән" гәзите "Медиапокорение" V Бөтенроссия фестивалендә "Татар телендәге иң яхшы мәктәп гәзите" номинациясендә 1 нче урынны яулады.

14-16 нчы апрель көннәрендә Казан шәһәрендә үтәчәк "Г.Тукай исемендәге шигырь укучылар" IV Республикакүләм бәйгедә район данын яклап чыгыш ясаячак 8 нче сыйныф укучысы Гарипов Рәдискә уңышлар телибез.

4 нче апрель көнне узган баскетбол буенча район беренчелегенең зона ярышларында гимназия-интернатның егетләр һәм кызлар командалары 1 нче урыннарны яулап, финал этабына юлламалар алдылар.

Гимназия-интернатның математика укытучысы Фәрдиева Регина Равил кызы районкүләм "Минем иң яхшы дәрес" конкурсында 1 нче урынны яулады.

Гимназия-интернатның 6 нчы сыйныф укучысы Газизова Сөмбел Яр Чаллы шәһәрендә узган "Музыкаль йолдызлар яңгыры" Республикакүләм вокал сәнгате фестиваль-конкурсыннан 2 нче дәрәҗә диплом белән кайтты.

Казанда Бокс һәм өстәл теннисы үзәгендә 27-29 нчы март көннәрендә өстәл теннисы буенча “Татарстан өметләре” ярышлары узды. Анда Актаныш балалар һәм яшүсмерләр мәктәбендә тәрбияләнүче Марат Солтанов кабат җиңеп чыкты. Марат ярымфиналда Сарманнан 2 тапкыр Татарстан чемпионы Динар Йосыповны, ә финалда - Сабадан Михаил Карамышевны 3:0 исәбе белән җиңде. Афәрин!