8 нче гыйнвар көнне гимназия-интернатта "1 нче яртыеллык нәтиҗәләре. Укытучының уңышлылык критерийлары" темасы астында педсовет узды. 9 нчы гыйнвар көнне укытучылар группаларга бүленеп метапредмет дәресләр әзерләп, аларны башкаларга тәкъдим иттеләр. Иң яхшы дәрес эшкәртмәләре бүләкләнде.  

Гимназия-интернатның 9 нчы сыйныф укучысы Закирҗанов Алмаз Кыш бабай призына үткәрелгән көрәш буенча ярышларда 2 нче урынга ия булды.

Бүген гимназия-интернатның 11 нче сыйныф укучылары рус теле фәненнән районкүләм БДИ да катнашалар.

Гимназия-интернатның 4 нче сыйныф укучысы Дәүләтов Фаил Кыш бабай призына үткәрелгән шахмат буенча ярышларда 3 нче урынга ия булды.

Уку алдынгылары, фән олимпиадаларында җиңүчеләр, спортта һәм мәдәният өлкәсендә яхшы уңышларга ирешкәннәр – бер сүз белән әйткәндә, мәктәп тормышында кайнап яшәүче актив укучыларны ел саен муниципаль район башлыгы чыршысына чакыралар. Анда катнашу – зур мәртәбә, район башлыгының үз кулларыннан «Рәхмәт хаты» алу – һәр балага карата зур хөрмәт һәм игътибар дигән сүз.
Бүген, 7 январь көнне Актанышта Мәдәният сараенда узган Чыршы бәйрәменә төгәл 100 укучы чакырулы иде. Алар бәйрәм бүләге итеп үзләре кебек үк сәләтле балалар катнашында музыкаль тамаша карадылар.
Муниципаль район башлыгы Фаил Камаев укучыларны бәйрәм белән котлады, теләкләрен җиткерде: ”Без, өлкәннәр, мәктәптә сезнең көн саен фәннәрне өйрәнү генә түгел, ә тормышта кирәк булган барлык белемнәрне үзләштерүегезне телибез.  Сезгә уку, физик культура һәм спорт белән шөгыльләнү, төрле сәләтләрне үстерү өчен яхшы шартлар тудыру буенча без  бүген барысын да эшлибез. Сәләтле балаларга ярдәм итү-безнең эшебезнең төп юнәлешләреннән берсе”,– диде ул, һәр укучыга кулын кысып, Рәхмәт хаты һәм истәлекле бүләкләр тапшырды. Алар арасында гимназия-интернаттан Газизова Сөмбел, Шәйхуллина Фирүзә, Тимерова Илсинә, Фәйрушин Илдар, Шәяхмәтов Илдар да бар. Котлыйбыз!

Бүген мәгариф хезмәткәрләренең район спартакиадасы узды. Спартакиада кысаларында чаңгы, шорт-трек, өстәл теннисы, шахмат, аркан тарту һ.б. спорт төрләреннән ярышлар узды. Барлык нәтиҗәләр буенча гимназия-интернат командасы 1 нче урынны яулады. Афәрин!

Зур өметләр белән каршылыйбыз

2014 нче ел башын.

Игелек һәм миһербанлык кына

Булсын иде синең юлдашың!

28 нче декабрь көнне Казанның ИТ-паркында «ИТ-чемпион» конкурсының III этабында “Иң актив мәктәп укучысы” номинациясендә һәм “ТР Дәүләт һәм муниципаль хезмәтләре порталын үстерү” иҗади номинациясендә җиңүчеләрне бүләкләделәр. Конкурста иң актив катнашучыларга iPad планшетлары бирелде. Алар арасында гимназия-интернатның  10 нчы сыйныф укучысы Рушан Салахов та бар.
Чарада ТР Премьер-министры Илдар Халиков, ТР Премьер-министры урынбасарлары – мәгълүматлаштыру һәм элемтә министры Роман Шәйхетдинов, ТР мәгариф һәм фән министры Энгель Фәттахов катнашты.
Быел 1 нче мартта башланган һәм 3 этапта үткән конкурста 253 меңнән артык мәктәп укучысы катнашты. Алар ТР дәүләт һәм муниципаль хезмәтләре порталы белән эшләргә 320 меңнән артык өлкәнне өйрәткән. 3 этап нәтиҗәсендә, 459 укучы планшет алган.