Гимназия-интернат делегациясе Казан шәһәрендә урнашкан 19 нчы гимназия һәм ИТ-лицей эшчәнлеге белән танышып кайтты.

Гимназия-интернатта "Зур биюләр" ("Большие танцы") сыйныфлар арасында биюләр бәйгесе үтте. "Иң яхшы башкару осталыгына ия бию" номинациясендә 5 нче сыйныф, "Иң эчтәлекле бию" номинациясендә 8б сыйныфы, "Иң ретро стильдәге бию" номинациясендә 11 нче сыйныф, "Иң заманча бию" номинациясендә 10 а һәм 10б сыйныфлары җиңү яулады. 

Гимназия директоры Артур Кәрим улы Галиәхмәтов 11-15 апрель көннәрендә Сабада узган "21 гасырда методик лидерлык" исеме астындагы Өстенлек мәктәбе курсларында булып кайтты.

9 нчы апрель көнне узган баскетбол буенча район беренчелегенең финал ярышларында гимназия-интернатның кызлар командаcы 2 нче урынны, егетләр командаcы 3 нче урынны яуладылар.

Бүген Казан шәһәрендә “Сәләтле балалар өчен инновацион белем бирү оешмалары челтәрен үстерү турында”  темасы буенча ТР Дәүләт Советы Мәдәният, фән, мәгариф һәм милли мәсьәләләр комитеты һәм Мәгариф өлкәсендә дәүләт проектларын һәм программаларын гамәлгә ашыруны тикшереп тору буенча ТР Дәүләт Советы комиссиясенең берләштерелгән утырышы уза. Утырыш кысаларында КФУның Филология һәм мәдәниятара багланышлар институты белән берлектә Актанышның гуманитар гимназия-интернаты һәм Сабаның сәләтле балалар белән эшләүче мәктәбе катнашында онлайн-конференция үтте.

Гимназия-интернатның инглиз теле укытучысы Рамил Марат улы Гарипов "Ел укытучысы - 2014" конкурсының финалында катнашачак. 11 - 29 март көннәрендә үткән конкурсның зона этаплары нәтиҗәләре буенча ул 15 финалист арасына керде. Конкурсның финал этабында Рамил Марат улына уңышлар телибез.

29 нчы марттан 4 нче апрельгә кадәр Смоленск шәһәрендә тарих буенча Бөтенроссия олимпиадасының финал этабы үтте. Гимназия-интернатның 10 нчы сыйныф укучысы Шәйхин Айдар олимпиада нәтиҗәләре буенча призер исемен яулады. Айдарны һәм аның укытучысы Миләүшә Магъсум кызы Абдуллинаны чын күңелдән шушы җиңүләре белән котлыйбыз һәм уңышлар телибез.

Халык язучысы, күренекле драматург, җәмәгать эшлеклесе Туфан Миңнуллин истәлегенә багышланган укытучыларның һәм укучыларның I республика конференциясенең "Туфан Миңнуллин иҗаты буенча фәнни эшләр. "Үзем сайлаган язмыш" номинациясендә 10 нчы сыйныф укучысы Галимова Айсылу 1 нче дәрәҗә дипломга, "Драматургия. "Театр яктылыкка, нурга илтә!.." (пьеса) номинациясендә 10 нчы сыйныф укучысы Шәкурова Гөлназ 3 нче дәрәҗә дипломга ия булдылар. Фәнни җитәкчеләре Әминова Ләйсән Галиәкбәр кызы.

7 нче апрельдә Балалар иҗат үзәгендә техник иҗат буенча I Республика фестиваленең муниципаль этабы үтте. Аны тантаналы рәвештә район мәгариф идарәсе җитәкчесе Васил Салихов ачты. Фестивальнең максаты-укучыларның техник иҗатын үстерүгә булышлык итү. Фестивальдә катнашучы укучылар экспозиция рәвешендә үзләренең проектларын куйдылар. Йомгаклау һәм җиңүчеләрне бүләкләү апрельнең икенче ункөнлегендә булачак.

Гимназия-интернатның "Ак җилкән" гәзите "Медиапокорение" V Бөтенроссия фестивалендә "Татар телендәге иң яхшы мәктәп гәзите" номинациясендә 1 нче урынны яулады.