11 октябрь көнне “Казан” агросәнәгатъ паркында белем бирү оешмаларының көзге ярминкәләре узды. Актаныш районы мәйданчыгында гимназия-интернат үзенең сату әйберләре белән катнашты. 

Олылар ункөнлеге уңаеннан 10 нчы октябрь көнне педагог-оештыручы Хафизова Алсу җитәкчелегендә гимназия-интернат укучылары Пучы авылында урнашкан картлар йортында концерт куеп кайттылар.

Гимназия-интернатның инглиз теле укытучысы Гарипов Рамил Марат улын “Мәгариф” өстенлекле милли проекты кысаларында узган Россия Федерациясенең иң яхшы укытучылары конкурсында җиңүе белән чын күңелдән котлыйбыз! 

"Фикерләү культурасы үсеше" исеме астында сингапур белем бирү технологияләрен өйрәнүнең 2 нче этабын үткәрү максатыннан 6-7 нче октябрь көннәрендә гимназия-интернат базасында гимназия-интернат, Аккүз һәм Такталачык мәктәп укытучылары өчен тренинг-курслар оештырылды. Укуларны тренерлар Әмирҗанова Ю.В., Имамразыева Г.Д., Гыймранова С.М. һәм Educare компаниясе консультанты Махалетчуми Сивалингам оештырдылар. Тренинглар кысаларында укытучылар яңа өйрәтү структуралары, яңа фикерләү алымнары өйрәнделәр. Дәресләрдә фикерләү культурасын үстерү кирәклеге ассызыкланды.

Бүген Казан "Баскет-хол"ында кичә билгеләп үтелгән Халыкара укытучылар көненә багышланган бәйрәм узды. Анда Татарстан Президеты Рөстәм Миңнеханов катнашты. Татарстан Президенты Рөстәм Миңнеханов сәламләү сүзе белән чыгыш ясап, бүгенге көндә республика мәгариф системасында 74 меңгә якын кеше эшләвен билгеләп үтте. "Бу республиканың гаять зур интеллектуаль потенциалы", - дип ассызыклады ул. Республика башлыгы сүзләренчә, мәгариф системасында Татарстанның көндәшлеккә сәләтлелеге үсә. "Әгәр дә без балалар бакчасы, мәктәп, ресурс үзәкләре, югары уку йортлары системасын төзи алсак (ә без бүгенге көндә моны эшлибез), Татарстан Республикасы илдә иң көндәшлеккә сәләтле булачак", - дип билгеләп үтте Рөстәм Миңнеханов. Ул шулай ук мәгариф системасын үстерү буенча эшләр төрле юнәлешләрдә алып барылуын ассызыклады: белем бирү оешмаларының матди-техник базасы яхшыра, яңа технологияләр кертелә. "Әмма иң мөһиме - укытучы. Укытучыларны әзерләү - бөтен бер система һәм без Татарстанда шундый система булу белән горурлана алабыз", - диде Р.Миңнеханов. МоныТатарстан укытучыларының укытучылары ярдәме белән Бөтенроссия һәм халыкара олимпиадаларда яулаган алдынгы урыннар раслый.
Чарада гимназия-интернат директоры Артур Кәрим улы Галиәхмәтов һәм биология укытучысы Рафига Габит кызы Галиева катнашты. 

Кадерле укытучылар! Сезне чын күңелдән һөнәри бәйрәмебез белән тәбрик итәбез. Йөзегездә бервакытта да елмаю сүнмәсен, якыннарыгызның ихтирамын тоеп, шатланып-куанып яшәгез! Бәйрәм белән!

Корбан бәйрәме - ислам дөньясында иң олы, мөбарәк бәйрәмнәрнең берсе. Корбан бәйрәме һәрберебезнең күңеленә иман нуры өстәсә иде. Бәйрәм белән!
Бүген Корбан бәйрәме уңаеннан гимназия-интернатта бәйрәм ашы узды.

Бүген гимназия-интернат укучылары өчен "Ялкын" журналы редакциясе вәкилләре "Журналистика", "Фотожурналистика", "Әдәбият", "Лидерлар мәктәбе" юнәлешләре буенча мастер-класслар тәкъдим иттеләр.

Кичә гимназия-интернат дирекциясе Казан шәһәрендә булды. Анда КФУ ның Филология һәм мәдәниятара багланышлар институты белән хезмәттәшлекне дәвам итү буенча килешү төзелде. Шулай ук Казан шәһәренең 4 нче гимназия-интернатының эшчәнлеге белән танышылды.

Бүген гимназия-интернатта М.Җәлил исемендәге Татар дәүләт академия опера һәм балет театры җырчысы, якташыбыз Илнар Ялалов белән очрашу үтте.