Гимназиянең волонтерлар отряды, "Игелекле эшләр башкар" акциясе кысаларында, көзге агач утырту эшләрен башлап җибәрде. 57 нче бистәнең гимназия территориясе янына 114 төп миләш агачы утыртылды.

21 сентябрь көнне "Лачын" чаңгы трассасында  җиңел атлетика буенча спорт остасы  Фирдәвис Шәем улы Шәемов призына кросс үтте. Анда безнең гимназия командасы уңышлы чыгыш ясады : 7а сыйныф укучысы Ибрагимов Раиль – II урын, 8б сыйныф укучысы Вахитов Булат -IIIурынга лаек булдылар. Егетләрне җиңүләре белән котлыйбыз. Киләчәктә дә уңышлар телибез

20 нче сентябрь көнне, “Актаныш” универсаль спорт комплексында , сәламәт яшәү рәвешен пропогандалау максатыннан, укытучыларның җәйге спартакиадасы булып узды. Анда безнең мәктәпнең укытучылары да уңышлы чыгыш ясап кайтты.Гарипов Р.М.- II урын (VIP йогерү) : Исламов М.М.. - II урын (армрестлинг), Сибгатуллин Р.Т. - IIурын (винтовкадан ату), Тимирова Л.Ф.- IIурын (винтовкадан ату), Харрасова А.Р. - I урын (озынлыкка сикерү), канат тартышу буенча команда - Iурын..Афәрин!

Узган атнада Казанда “Авыл укытучысы -2016” бәйгесенең йомгаклау этабы үтте. Республикабызның төрле төбәкләреннән килгән авыл укытучылары Мәгарифне үстерү институты галим-методистларыннан торган мәртәбәле жюри әгъзалары каршында имтихан тотты, үзләренең талант-сәләтен, осталыкларын күрсәтте. Алар әзерләгән мастер-класслар темаларының төрлелеге, актуальлеге, яңа технологияләргә корылганлыгы белән аерылып торды. Бәйгенең абсолют җиңүчесе – гимназиянең татар теле, әдәбияты укытучысы Л.Ф.Әһлетдинова. 5 октябрьдә Укытучылар көне уңаеннан үткәрелгән республика чарасында Ландыш Филүс кызы бүләкләнәчәк. Конкурсның партнерлары ТР Мәгариф һәм фән министрлыгы, ТР Мәгарифне үстерү институты.

Бөек Җиңү бәйрәменә багышлап үткәрелгән, II Республикакүләм "Җиңү җыры" әдәби конкурсының "Иң яхшы фильм" номинациясендә гимназия укучысы Әдилә Вилданова (җитәкчесе Ленар Хусаинов) I дәрәҗә дипломга лаек булды. Яңа уку елындагы тәүге җиңүләре белән котлыйбыз, тагын да зуррак иҗади уңышлар телибез!

МТС, 57 нче бистәләрдә яшәүче мөселманнар өчен гимназия-интернат бинасында бәйрәм чарасы үткәрелде.

Бүген гимназиядә, "Казан утлары"  журналының баш мөхәррире, якташыбыз Илфак Мирза улы Ибраһимов белән очрашу булды. Шагыйрь, укучыларга, үзенең яңа гына "табадан төшкән" шигырьләрен укыды,  журнал турында кызыклы мәгълүматлар җиткерде.

Мәктәп бакчасындагы бердәм хезмәт -  укучыларның бер-берсе белән танышу, дуслашу чарасы. 

Кояшлы 1 сентябрь таңы “Сәләтле гуманитар гимназия – интернат” укучыларын кабат бергә җыйды. Бәйрәмебез кунагы - Актаныш муниципаль район Советы рәисе урынбасары Бариев Илфак Шамил улы укучыларыбызга узенең изге теләкләрен юллады.

Узган атнада  “Идел” яшьләр үзәгендә ”Алтын каләм – Золотое перо–2016” XXI Республика фестиваленең йомгаклау өлеше узды. 
Бәйге нәтиҗәләре буенча гимназия-интернат укучылары быел да җиңүчеләр рәтендә. “Дизайн һәм верстка” буенча “Яшьләрдә патриотик тәрбия” номинациясендә Лилия Габдрәхимова һәм татар журналистикасы буенча “Укуны яшьләр арасында  ничек популярлаштырырга” дигән номинациядә Алсу Рәшитова җиңүче булдылар.