Яңа атна, традицион рәвештә, укучыларның гомуми линейкасыннан башланып китте. Бүгенгесе линейкада төрле бәйге-ярыш җиңүчеләрен тәбрикләүләр өстенлек итте. Беренче чиратта "Җимлекләр бәйгесе" нә йомгак ясалды, җиңүче укучыларга (Минуллина Алия, Гатиятуллина Гөлгенә, Сафина Алинә - 3 класс, Газизов Ришат - 5 класс) грамота һәм бүләкләр тапшырылса,катнашучылар исә  истәлекле бүләкләр белән билгеләнеп узды. Шулай ук туризм буенча җиңүче укучыларны һәм шимбә көнне Танайда узган Көрәш ярышында җиңү яулаган укучылар да тәбрикләнде. Котлыйбыз!

Бүген Татар Танаенда Татар көрәше буенча ярышлар узды. Анда безнең укучыларыбыз да үз көчләрен сынады һәм сынатмадылар диясе килә. Уңышлы гына эшләп килүче көрәш түгәрәгенә йөрүче 4 егетебез катнашты анда. Үз авырлык үлчәмнәрендә 11 класс укучысы Гайнуллин Нияз һәм 8 класс укучысы Гафиятуллин Рәдис 2 һәм  3 урыннарны яулап кайттылар. Котлыйбыз!

Бүген Яшел Үзән шәһәрендә “Новогодние забавы” дип исемләнгән туризм буенча муниципаль ярыш узды. Мәктәптә уңышлы гына эшләп килүче “Яшь  турист” түгәрәге командасы әлеге ярышта уңышлы гына катнашып кайтты. Кышкы туризм элементларын үз эченә алган әлеге чара,  Яңа ел тематикасына багышланган иде. Укучылар карта буенча Кар кызын эзләделәр, топознаклар буенча Кыш бабай хатын укыдылар, Убырлы карчык әзерләгән сынауларны уздылар һәм башка кызыклы да авыр да биремнәрне үтәделәр. Барлык командалар арасында иң яхшы вакыт күрсәтеп 1 урын алуга ирештеләр. Моннан башка тагын ике бәйгедә беренче һәм икенче урыннар яуладылар. Мәктәп командасын һәм тренерлары Шакиров Р.Ф. ны уңышлары белән котлыйбыз. Афәрин, укучылар!

 Бүген 9 класс укучылары татар теленнән тестирование узды. 90 минут эчендә укучылар белемнәрен тест формасында тикшерделәр. Эшләр Казан шәһәренә озатылды, анда бәяләнәчәк алар.

IT - чемпион конкурсының йомгаклау этабы нәтиҗәләре билгеле булды. Мәктәбебез ике номинациядә телгә алына. "Иң актив укучы" исеменә 11 класс укучысы Шигабутдинов Алмаз лаек булды, ул ноутбук белән бүләкләнәчәк. Котлыйбыз Алмаз! Һәм менә икенче зур шатлыгыбыз ул - мәктәпнең "Иң актив мәктәп" номинациясендә җиңүе. Җәмәгать! Безнең уку йортыбыз интерактив җиһаз белән бүләкләнә! Афәрин!

 Әлеге чарада актив катнашкан укучыларбызны һәм укытучыларыбызны котлыйбыз. Бигрәк тә зур ктивлык күрсәткән укытучыларыбыз Замалиева Ф.Г. һәм Шигабутдинова Г.Ф. рәхмәтләребезне җиткерәбез.

Бүгеннән мәктәптә тарих-география атналыгы башлана. Укучылар төрле бәйге -ярышларда, интеллектуаль уеннарда, ачык чараларда катнашып үз белемнәрен сынап, күрсәтә алачаклар.

  4-12 декабрь көннәрендә мәктәп укучылары Бөтенроссия күләмендә уздырылучы "Час кода" акциясендә катнаштылар. Әлеге чара информатика фәне кысаларында, укучыларның информацион технологияләргә һәи информатиканы өйрәнүгә кызыксынучанлыкны арттыру максаты белән уздырылды. Информатика укытучысы Абзалина Л.Р. укучылар белән әлеге акциядә актив катнашты, катнашучылар сертификатларга ия булдылар.

һәр мәктәпнең үз укучылар үзидарәсе органы бар. Бездә ул "Идел" укучылар оешмасы. Бүген әлеге оешмага керүче укучыларның зур җыелышы узды. Беренче булып һәр классның уку секторлары, группа рәисләре уку торышы, классның төрле чараларда ничек катнашулары, проблемалары турында чыгыш ясадылар. Оешма җитәкчеләре үз эшчәнлекләренә анализ ясадылар. Үзләрен борчыган мәсьәләләргә ачыклык кертергә, проблемалы ситуацияләрне чишеп карарга тырыштылар. Укытучыларның фикер-тәкъдимнәрен тыңладылар. Җыелыш әхлакый тәрбия темасына багышланган "Хикмәтләр дөньясы" циклыннан кыска фильм карау белән тәмамланды.

   Әлеге җыелыштан соң һәр укучы үзе өчен нинди дә булса нәтиҗә ясар дип ышанып калабыз.

Икенче чирек укучылар һәм мәктәп коллективы өчен бик тә җаваплы чор. Чөнки нәкъ бу вакытта район һәм шәһәр укучылары арасында фәннәрне иң яхшы белүче укучыларны билгеләү буенча киеренке көрәш уза. Әлбәттә инде монда сүз фән олимпиадалары турында бара. Менә безнең мәктәпкә дә беренче куанычлы хәбәр килеп иреште. 7 класс укучысы Бикмуллина Гөлия немец теленнән Бөтенроссия олимпиадасының муниципаль турында җиңүче дип табылды. Без Гөлияне һәм аны әзерләгән укытучысы Гобәйдуллина Р.А. ны чын күңелебездән әлеге зур җиңүләре белән котлыйбыз. Алга таба да зур уңышлар сиңа Гөлия! Афәрин!

  9 класс укучылары имтиханнарга әзерлек йөзеннән тус теле һәм математикадан тестирование уздылар инде. Менә чират татар теленә дә җитте. Шимбә, 6 декабрь, районыбызның һәр мәктәбендә 9 лар татар теленнән тест яздылар. 2 сәгать аралыгында биремнәрне башкарып чыгарга тиешләр иде алар. Ничек эшләүләрен биремнәрне тикшергәннән соң белербез!