Традицион рәвештә гимназиябез базасында "Казан сандугачы- 2025" җыр бәйгесенең шәһәр этабы булып узды. Бәйгенең максаты- моңлы яшь башкаручыларны барлау һәм аларны халыкка таныту. Катнашучылар эстрада, халык җыры, ансамбль номинацияләрендә үзләренең сәләтләрен күрсәттеләр.
Әлеге бәйгедә гимназиянең 6В сыйныфы укучысы Нотфуллин Солтан I дәрәҗәдәге дипломга лаек булды! Барлык җиңүчеләрне чын күңелдән котлыйбыз, киләчәктә дә уңышлар телибез!

4А сыйныфы укучылары сыйныф җитәкчеләре Дания Габдулловна белән берлектә "Киномакс" кинотеатрында "Волшебник Изумрудного города" фильмын карап кайттылар. Әлеге сәяхәт укучыларга уңай эмоцияләр һәм күтәренке кәеф бүләк итте!

"Ел укытучысы- 2025" конкурсының шәһәр, зона этапларында гимназия һәм районыбызның данын Сиринә Ринатовна яклап чыкты. Өч көн дәверендә Сиринә Ринатовна жюри әгъзаларына югары дәрәҗәдә дәрес, сыйныф сәгате, методик остаханә һәм мастер- класс күрсәтте. Нәтиҗәләрне көтеп калабыз!
"Сиринә Ринатовна, сезнең тирән эчтәлекле, мәгънәле һәм сыйфатлы чыгышларыгыз укучыларга, жюрига бик ошады! Без сезнең белән сокланабыз һәм горурланабыз! "- дип матур теләкләрен җиткерде гимназия директоры Гөлшат Әбүзәровна.

27 нче һәм 28 нче гыйнвар көннәрендә үткәрелгән чаралар:
- Математик лотерея;
- "Күңелле саннар" рәсем бәйгесе.
Укучылар ярышлар вакытында фән буенча булган белемнәрен генә түгел, физик яктан да күнекмәләрен күрсәттеләр.

27 нче гыйнвар- тормыш сөючән кешеләр көне! Шул уңайдан, башлангыч сыйныф укучыларыннан кызыклы сораштыру үткәрелде. Укучылар "Әгәр синең тылсымлы таягың булса нишләр идең?" дигән сорауга җаваплар бирделәр.  "Галәм медиа" юнәлеше активистларыннан видеоны сезгә дә тәкъдим итәбез!

Видеога сылтама: https://vk.com/club216931602?z=video-216931602_456239360%2F487eec3170df740071%2Fpl_wall_-216931602

27 нче гыйнвар көнне үткәрелгән "Мөһим сөйләшүләр" дәресләр циклында укучылар белән "Ватанны саклаучылар елы" темасына сөйләшү алып барылды. Дәрес барышында укучылар Ватанны саклаучылар, аларның илебез язмышындагы роле турында фикер алыштылар. Тарихи хәтерне сакларга һәм киләчәк буынга тапшырырга кирәк дигән нәтиҗә ясалды.

27 нче гыйнвар көнне илебездә ике истәлекле дата — Ленинград блокадасы өзелү һәм Холокост корбаннарын искә алу көннәре билгеләп үтелә. Шул уңайдан, гимназиядә бердәм дәресләр үткәрелде, күргәзмә оештырылды.

Гимназия базасында эшләп килүче регби түгәрәгенә йөрүче укучыларыбыз республика күләмендә үткәрелгән "Новогодний турнир" ярышында 15 команда арасында 5 нче урынны яуладылар. Афәрин, укучылар! "Лучший игрок команды" призына 2В сыйныфы укучысы Карама Ильсаф лаек булды. Балаларга һәм регби түгәрәге җитәкчесе Сатаров Кирилл Вадимовичка рәхмәтебезне белдерәбез!

Гимназиябездә тарих һәм җәмгыять белеме фәннәре атналыгы кысаларында атна дәвамында өстәл уеннарыннан торган күңелле тәнәфесләр оештырылды. Мондый тәнәфесләрдә укучылар күбрәк аралашалар, дуслар табалар. Ә иң мөһиме- телефоннан аерылып торалар.

20 нче гыйнвар көнне үткәрелгән "Мөһим сөйләшүләр" дәресләр циклында укучылар белән "Студентлар көне" темасына сөйләшү алып барылды. Дәрес барышында укучылар әлеге бәйрәмнең килеп чыгу тарихы турында видеоөзекләр карадылар, фикер алыштылар. 7 - 11 нче сыйныфлар гимназиянең 2022 нче елгы чыгарылыш сыйныф укучылары Искандәр Гильмутдинов, Айсылу Басырова и Аделия Мухтарова белән очраштылар. Очрашу барышында килгән кунаклар үзләренең имтиханнарга әзерләнүләре, студент тормышы, укыту юнәлешләре, сессияләр, фәнни эшчәнлек һәм университет традицияләре турында сөйләделәр. Шулай ук яхшы уку һәм өлгереш серләре белән уртаклаштылар, укучыларның сорауларына җавап бирделәр. Искәндәр, Айсылу һәм Аделиягә әлеге җылы очрашу өчен зур рәхмәт!