Бүген 8 нче сыйныф укучылары авылыбызда Бөек Ватан сугышында һәлак булучылар истәлегенә куелган һәйкәл тирәсен чистарттылар. Алар башкарган игелекле эш Республикабызда игълан ителгән Чисталык икеайлыгы һәм шулай ук "Язгы игелек атнасы" ның матур бер чагылышы булды.  Укучыларыбызга игелекле эшләрендә уңышлар һәм матур нәтиҗәләр телибез, афәрин!

Беренче сыйныф укучыларының "Әлифба  бәйрәм"нәрен Г.Тукай туган көн алдыннан уздырулары матур гадәткә керде. Туган телебезнең матурлыгын, мөмкинлекләрен әлифба ярдәмендә аңлаган нәни дусларыбыз киләчәктә милләтебез данын төрле өлкәләрдә лаеклы яклый алыр. Бүген алар үзләренең матур биюләре, дәртле җырлары, сәхнәләштергән күренешләре белән барлык тамашачыларны, кунакка килгән әти-әниләрне кабат  1 нче сыйныфларның үзенчәлекле һәм кызыклы көнкүрешенә кайтарды. Бәйрәм һәркем өчен истә калырлык итеп уздырылды, сыйныф җитәкчесе Ганиева Иркәнур Исламнур кызына ата-аналар һәм мәктәп җитәкчелеге исеменнән зур рәхмәт җиткерәбез.

Язгы каникул чорында мәктәп укучылары сугыш һәм тыл ветераннарына тимурчлык ярдәме күрсәттеләр, ветераннарны юбилей медальләре алу белән тәбрикләделәр.

 6 нчы сыйныф укучылары Җамалетдинова Хәдичә апа янында

Мәктәбебез укучылары  әдәби иҗат белән даими шөгыльләнәләр, "Көмеш кыңгырау" балалар һәм яшүсмерләр гәҗите белән хезмәттәшлектә торалар һәм әсәрләрен төрле бәйгеләргә тәкъдим итәләр. Бүген 7 нче сыйныфтан Динмөхәммәтова Алсу (Ганиева Г.Ф. җитәкчелегендә); Ганиев Фәдис (Ганиева И.И. җитәкчелегендә); Колмөхәммәтов Зөлфәт, 6 нчы сыйныфтан Колмөхәммәтов Илсаф, Әхмәтова Ләйлә (җитәкчеләре татар теле һәм әдәбияты укытучысы Колмөхәммәтова З.Э.) Татарстан Республикасы яшьләр эшләре һәм спорт министрлыгы, ТР мәгариф һә фән министрлыгы, "Сәләт" я иҗтимагый фонды һәм "Сәләт" яшьләр үзәге тарафыннан уздырылган Бөек Ватан сугышында  җиңүнең 70 еллыгына   һәм Г.Тукай туган көнгә  багышланган  "Сәләткә нур булган йолдызлар" Республикакүләм ачык әдәби ярышның бүләкләү тантанасында катнашып кайттылар. Барысы да ярышта катнашучы таныклыгына ия булды, укучыларга иҗади эшләрендә уңышлар телибез, киләчәктә яңа үрләр яулауда җиңеллекләр насыйп булсын. Тукаебыз варислары әле киләчәктә татар әдәбиятында үз урыннарын табарлар дип өметләнәбез.

"Язгы игелек атнасы"ның бүгенге көне "День доброго слова"  девизы астында узды. 6 нчы сыйныф укучылары -бүгенге көннең оештыручылары . Алар тарафыннан Бөек Ватан сугышы һәм тыл ветераннарына Республикабыз Президенты Р.Н. Миңнеханов исеменнән котлау открыткалары язылды һәм хуҗаларына тәмле сүзләр, изге теләкләр белән тапшырылды.. Кизләү авылында бүген 26 кеше шундый котлау открыткалары алып сөенде. Ил-көннәребезгә тынычлык насыйп булсын, укучыларыбыз тарафыннан кылынган игелекле гамәлләр үзләренә дә изгелек булып кайтсын иде.

Бүген мәктәбебезнең "Актерлык осталыгы"  түгәрәгенең хисап чарасы буларак төшерелгән "Волшебное слово" (Е.Осееваның шул исемдәге хикәясенә нигезләнеп сәхнәләштерелде) кыскаметражлы  фильмы #ДОБРЫЙ ТАТАРСТАН И #МЫ ВМЕСТЕ исеме астында башлангыч сыйныф укучыларына күрсәтелде. Ахырдан фильмдагы вакыйгалар буенча фикер алышу узды. Тамашачылар ъзебез тцшергщн киноны бик ошаттылар.

"Язгы игелек атнасы"ның бүгенге көн инициаторлары- 6 нчы сыйныф укучылары 5-9 нчы сыйныфиа укучылар арасында "Сез әдәпле кешеме?" дип исемләнгән анкеталаштыру уздырды һәм укучылар арасында "тәмле" сүзләр куллану активлыгын билгеләде. Укучылар тарафыннан иң еш кулланылучы сүзләр: исәнмесез, сау булыгыз, рәхмәт, тыныч йокы, зинһар өчен һ.б. Күпчелек укучылар әдәпле сүзләрне барлык кешеләргә карата да куллана, шул ук вакытта бу сүзләрне өлкәннәргә карата гына кулланучы укучылар барлыгы да беленде.. Сораштыруда катнашкан 23 кешенең 20 се үзен әдәпле кеше дип саный,  ә 3 кеше бу сыйфатны үзләрендә юк дип исәпли. Синең әдәплеме , түгелме икәнлекне башкалар билгеләсә дөресрәктер , мөгаен.  Үзеңнең яхшы якларыңны үзең тануны мактанчыклык дип тә бәяләргә мөмкин бит, шуңа күрә без ул 3 укучыны бүген бары тик тыйнаклыкта гына "гаеплибез". 

Сурәттә: анкета нәтиҗәләрен компьютер презентациясендә чагылдыру барышы

7 нче сыйныф укучысы Колмөхәммәтов Зөлфәт ТР Мәгариф һәм Фән министрлыгы тарафыннан  оештырылган "Ватанга хезмәт итәм" республикакүләм тарихи-мәдәни, мәгълүмати проектлар конкурсында лауреат булды.