Укучылар кышкы каникул чорында сыйныф җитәкчеләре белән берлектә кышкы табигатькә экскурсияләргә йөриләр. Бүген 6 нчы сыйныф укучылары тауга чана шуарга чыктылар.

Укучыларның каникуллары файдалы да,  күңелле дә үтсен өчен әти-әниләр дә, укытучылар да тырыша. Бүген мәктәбебезнең 2, 5 һәм 7 нче сыйныф укучылары "Салават күпере" спорт-сәламәтләндерү комплексына су коенырга бардылар.

Иртәгә 9 нчы сыйныф укучыларының математика фәненнән сынап карау имтиханы үткәреләчәк. Шул уңайдан укучылар бүген математикадан белемнәрен ныгыталар.

Бүген 9 нчы сыйныф укучылары өчен лагерьда татар теленнән консультация үткәрелде. Төшке аштан соң балалар сыйныф җитәкчеләре һәм физик тәрбия укытучысы белән берлектә чаңгыда экскурсиягә чыктылар. Укучыларның каникуллары файдалы һәм кызыклы үтә.

Мәктәбебездә кышкы лагерь үз эшен башлады. 9 нчы сыйныф укучылары өчен ял итү һәм дәүләт йомгаклау имтиханнарына әзерлекне алып бару максатыннан оештырылган  лагерь эшчәнлеге график нигезендә алып барыла. Бүген укучылар биология фәненнән биреләчәк имтиханга әзерләнәләр. Шул исәптән, алар ял вакытында спорт залда шөгыльләнәләр, көн ахырында алган белемнәрне ныгыту өчен брейн-ринг уенында катнашалар.

Бүген Кайбыч районында "Салават күпере" ССКнда мәктәп укучылары - активистлары өчен район җитәкчесе Рәхмәтуллин А.И. һәм мәгариф бүлеге җитәкчесе Шакиров И.А. катнашында Чыршы бәйрәме оештырылды. Бу бәйрәмдә безнең мәктәптән 8 нче сыйныф укучылары Әхмәтшина А., Гиниятуллина К., Сафина А. һәм Хәйруллина А. катнашты. Бәйрәм бик күңелле үтте.

Бүген укытучыларның педагогик киңәшмәсе уздырылды. Киңәшмә барышында түбәндәге сораулар каралды: 2 нче чирек нәтиҗәләре, сыйныфларда уку торышы, 9 нчы сыйныф укучыларының төп дәүләт имтиханына әзерлек барышы, дәрестән тыш эшчәнлек. Шулай ук киңәшмәдә башлангыч сыйныф җитәкчесе Вилданова Д.Р. "Толерант шәхес тәрбияләү - заман таләбе" темасына чыгыш ясады.

Яңа ел алдыннан Кайбыч районы мәктәпләре арасында мәктәп яны бизәлеше буенча бәйге үткәрелде. Әлеге бәйгедә төп игътибар кар һәм боз сыннарына бирелде. Бу чарада безнең мәктәбебез дә актив катнашты һәм зур уңышка иреште: Кошман мәктәбе II нче урынга лаек дип табылды һәм акчалата сертификат белән бүләкләнде! Шундый зур уңышка ирешүебезгә мәктәпнең барлык укучылары һәм укытучыларының да керткән өлешләре бик зур. Барчагызга да олы рәхмәтебезне белдерәбез!

Бүген мәктәптә башлангыч сыйныфлар өчен "Яңа ел могҗизалары" бәйрәме булып үтте. Яңа ел тамашасы әкиятләштерелгән формада уздырылды. Балалар чыршы әйләнәсендә үзләренең матур шигырьләрен, җырларын башкардылар, биюләрен күрсәттеләр, төрле уеннарда катнаштылар. Тамашага укучыларның әти-әниләре дә килде.  Тамаша ахырында барлык укучыларга да Яңа ел бүләкләре таратылды.

Бүген 5-9 нчы сыйныф укучыларының "Зәңгәр ут яктысында" исемле Яңа ел бәйрәме уздырылды. Быелгы бәйрәм Россиядә Кино елы белән бәйле рәвештә оештырылды: сыйныфлар кинодан өзекләр күрсәттеләр, фильмнардан җырлар башкардылар. Шулай ук Яңа елга багышлап клип төшерү, бию башкару, плакат чыгару һәм оригиналь уенчык ясау номинацияләре буенча бәйгеләрдә катнаштылар. Бәйрәм ахырында жюри җиңүчеләрне билгеләде: I нче урында - 8 нче сыйныф, II нче урында - 5, 9 нчы сыйныфлар, III нче урында  - 6, 7 нче сыйныфлар. Тамаша ахырында барлык укучыларга да Яңа ел бүләкләре таратылды.