2 нче февраль көнне ,Күәм урта мәктәбе базасындагы бозлавыкта, район мәктәпләре арасында Зарипов Илгизәр истәлегенә хоккей турниры оештырылды.  Һәм мәктәбебез хоккей командасы 1 нче урында. Алар күчмә кубок белән бүләкләнде. 2 нче урында Бәрәскә , 3 нче урынны Олы Мәңгәр мәктәбе яулады. Алар мактау грамоталарына лаек булдылар. Хоккейчыларыбызны чын күңелдән уңышлары белән  котлыйбыз, алда уңышлар телибез.

2018 нче елның 1 нче февраленда    районыбыз укучылары   тантаналы  хәрби - патриотик  сборга җыйналды. Бу укучылар арасында мәктәбебезнең 10 укучысы да катнашты. Алар балаларның хэрби - патриотик оешмасы Юнармия сафларына кабул ителде. Һәр укучыга таныклык бирелде. Укучыларыбыз сбордан зур горурлану хисе белән кайттылар. 

2018 нче елның 31 нче гыйнваренда математика укытучысы Хәбибуллина Айсылу Мөбәрәкҗан кызы 6 нчы сыйныф укучылары белән ачык дәрес күрсәтте. Дәрестә укучылар пропорция темасын өйрәнделәр. Парларда, группаларда эшләделәр. Төрле мисалларны  формулалар ярдәмендә чиштеләр, нәтиҗә ясадылар. Һәр эшләнгән эшкә үзбәя куйдылар.

Мәктәбебездә ачык чаралар гел үтеп тора. Бүген дә укучылар танылган әдибебез Ш.Мәрҗанинең 200 еллыгын билгеләп үтү максатыннан  мәктәпкүләм чарага җыелдылар. Укучылар, укытучылары Алия Садриева җитәкчелегендә, Ш.Мәрҗанинең тормыш юлы һәм иҗатын өйрәнеп, нәтиҗә ясадылар. Аның эшчәнлеге һәм аның турында бик күп мәгълүмат алдылар. Ш.Мәрҗанинең татар халкының  мәрҗәне икәнлегенә тагын бер кат инандылар. Кичә бик җылы һәм  файдалы булып үтте. 

29 нчы гыйнвар көнне  4 сыйныфлар, сыйныф җитәкчеләре Ганиева Люция Фәесхан кызы белән берлектә, "Якташ әдипләребез" дигән темага ачык тәрбия сәгате үткәрделәр. Үзләренә кунак итеп, 1-3 нче сыйныф укучыларын да чакырдылар. Тәрбия сәгатендә укучылар С.Шакир, С.Хәким, Х.Халиков, Нәҗип Мәдьяровның тормыш юлы һәм иҗаты белән таныштылар, әсәрләрен яттан сөйләделәр, китаплар күргәзмәсе белән таныштылар, кроссворд чиштеләр. Тәрбия сәгате укучылар өчен файдалы һәм кызыклы булып үтте.

22 нче гыйнвар көнне Дусым башлангыч мәктәбендә ачык дәресләр көне иде. 2 нче сыйныфта Фзылҗанова Р.И. татар теленнән " Кеше исемнәрен, фамилияләрен баш хәрефтән язу", шул ук сыйныфта Закирҗанова Э.Р. әдәби укудан  "Р . Миңнуллинның "Рәсем" шигырен уку" дигән темага ачык дәресләр  күрсәттеләр. Бу дәресләрдә укучылар сүзлек диктантлары яздылар, тестлар эшләделәр , мәсьәләләр чиштеләр. Дәресләр ФДБС шартларына туры китереп, әзерлекле  формада үтте.

 Укучыларыбыз өчен көтеп алынган бәйрәмнәрнең  берсе  - студентлар белән очрашу. 20 нче гыйнвар көнне 11 нче сыйныф укучылары, сыйныф җитәкчеләре Садриева А.Г. җитәкчелегендә, студентлар белән очрашу оештырдылар. Очрашуга узган уку елында мәктәпне тәмамлап, төрле уку йортларына кергән студентлар килде. Укучылар уку йортлары белән кызыксындылар, студентларга сораулар яудырдылар. Кичәге укучылар студент тормышы турында, дәресләр, яшәү шартлары хакында,беренче көннәрдә дулкынланулары, мәктәпне сагынулары турында сөйләделәр. Очрашу күңелле итеп, чәй табыны артында үтте.

18 нче гыйнвар көнне мәктәбебездә физкультура укытучыларының райокүләм семинары үтте. Семинарда физкультура укытучысы Зарипов Б.А. 6 нчы сыйныф укучылары белән "Чаңгы шуу буенча теория һәм практик яктан аны күрсәтү" дигән темага ачык дәрес күрсәтте. Мәктәпкүләмендә 2-6 нчы сыйныф укучылары арасында шорт - трэк буенча ярыш булды. Укучылар бу ярышта чын күңелдән тырышып, конькида шудылар.

2018 елның 16 нчы гыйнваренда  "Ел укытучысы - 2018" конкурсының район турында башлангыч сыйныфлар укытучысы Гатауллина Г.Р. мастер -класс күрсәтеп, лауреат исеменә лаек булды. Котлыйбыз!

10 нчы гыйнвар көнне чираттагы педсовет утырышы булды. Педсоветның темасы:   ФДБССның төп нигезе булган системалы- эшчәнлекле юнәлеш куллану үзенчәлекләре. Көн  тәртибендә түбәндәгеләр каралды:

1.“ФДББС шартларында укучыларның  дәрестән тыш эшчәнлеген файдалы итеп үткәрү”  

2) II чирек йомгаклары, алда торган бурычлар.