Бүген Шәфигуллин Н.Ф. җитәкчелегендә 8 нче класс укучылары Әфганстанда хезмәт иткән авылдашыбыз Нигъмәтҗанов Рәис Могавия улының каберен кардан чистарттылар, аны бер минут тынлык белән искә алдылар. Әфганчы авылдашыбыз каберенә Арча һәм Әтнә районнары буенча хәрби комиссар Алмаз Борһанов та килде һәм чәчәкләр салды.

Бүген 7-9 нчы класс укучылары өчен "Татарстан-2030:үсеш стратегиясе" исеме астында Парламент дәресе үтте. Тарих һәм җәмгыять белеме укытучысы Шәфигуллин Н.Ф. укучыларны ТР ның 2030 нчы елларга кадәрге социаль - икътисади үсеш стратегиясе белән таныштырды.

Бүген мәктәптә рус теле фәненнән сынау имтиханы уздырылды. Сеҗе зонасындагы Сеҗе, Сикертән, Курса-Почмак, Курса разъезды, Урта Курса мәктәпләреннән килгән 9 нчы класс укучылары әлеге фәннән үзләренең белемнәрен сынадылар.

Хәрби-патриотик айлык кысаларында Сарай-Чокырча башлангыч мәктәбендә авыл китапханәсе белән берлектә китап күргәзмәсе оештырылды һәм батырлык турында әңгәмә үткәрелде.Укучылар якташларыбызның батырлыклары турында кызыксынып тынладылар.

4 нче гыйнвар көнне Арча шәһәре Спорткомплексында яшүсмерләр арасында «Сабантуй » газетасы призына узачак көрәш бәйгесенә сайлап алу туры үтте. Бу бәйгедә безнең мәктәпнең 8 класс укучысы Абдуалимов А.- 1 урынны (80кг), 8 класс укучысы Мөхәрләмов А. 1 урынны (80 кг нан югары), 8 класс укучысы Нурисламов Р. 2 урынны (65кг) яуладылар. Укучыларны ярышларга тренерлары Әхмәдиев М.Г. әзерләде. Җиңү яулаган укучыларыбызга һәм аларның тренерларына зур рәхмәт.

Батырлык темасы бүгенге көндә дә актуаль. Язучыларыбыз, шагыйрьләребез, рәссамнар үз әсәрләрендә бу темага зур урын бирәләр.Бүгенге тыныч шартларда кеше батыр була аламы? Моның өчен нәрсә эшләргә кирәк? Ничек батыр булырга? Батыр булу өчен үзеңдә нинди сыйфатлар булдырырга кирәк? Әлеге һәм башка сорауларга күргәзмәдә урын алган китаплардан җаваплар табарга мөмкин.

Бүген 5 нче класста “Батырлык дәресе” үткәрелде. Укучылар белән эчтәлекле әңгәмә корылды. “Нәрсә соң ул батырлык? Газинурлар,Матросовлар шикелле күкрәгең белән дошман амбразурасын каплаумы, әллә үзең ач чакта соңгы сынык икмәгең белән бүлешүме? Кешеләр төрле – төрле булган кебек,батырлык та күп төрле шул...” дигән темага укучылар җаваплар таптылар. Үзләренең нинди батыр, кыю гамәлләр кылуларын һәм ниндиләрен гамәлгә ашырып булулары турында фикер алыштылар.

Февраль ае - патриотик тәрбия бирү айлыгы. Бүген 6-7 нче классларда батырлык дәресе үткәрелде. Бөек Ватан сугышы батырлары, Әфганстан һәм Чечня сугышлары батырлары турында мәгълүматар җиткерелде. Укучылар тормышта батырлык эшләргә һәрвакыт мөмкин булуына төшенделәр.