Мәктәбебез укучылары, кышкы салкыннарда кошларга ярдәм итү максатыннан, бик матур җимлекләр ясап куйдылар. Хәзер үзләре дә, балалар бакчасына йөрүче нәниләр дә кошларны көн  саен сыйлап торалар.

Көннәр  бик   салкын  булган   очракта  укучыларның   мәктәпкә  килү  тәртибе. 

23  нче  январь көнне   Арча  шәһәрендәге   "Казан  арты"   музеенда   "Каурый  каләм"  әдәби  иҗат  берләшмәсе   әгъзаларының    шигырьләре    һәм  Г.Ахунов  әдәби  премиясе  ияләренең   әсәрләре  тупланган   җыентыкларның  презентациясе  булып  үтте.  Башта   "Шигъри  тәлгәшләр"   җыентыгына   шигырьләре   кергән  авторлар  чыгыш  ясады,  аннары  Г.Ахунов  премиясе  алган  яшьләр   сәхнәгә  чакырылды.   Алар  арасында   безнең  мәктәп-балалар  бакчасы  педагог-оештыручысы  Рания  Галәветдинова    да  бар.  Аның  шигырьләре   ике  җыентыкта  да  урын  алган.  Һәм  ул  шушы  тантанада   чыгыш  ясады,   китапларга  ия  булды.  Хезмәттәшебезне  тәбрик  итәбез,   иҗади   уңышлар   телибез!

Кичә  мәктәп-балалар  бакчасында  I  яртыеллык  нәтиҗәләре  буенча   ата-аналар  җыелышлары  уздырылды.  Әти-әниләр  башта   һәр  класста  ачык  дәресләр  карады,   соңыннан   класс  җыелышларында   катнашты.   

Бүген  зурлар  һәм мәктәпкә  әзерлек  төркеменә   йөрүче  балаларның   әти-әниләре бакчага   ачык  шөгыльләргә   килде.  Сөйләм  теле  буенча  үткәрелгән  шөгыльдә   балалар  кыш  айлары,    кышлаучы  кошлар,   җимлекләр  ясау  турында  сөйләштеләр,   кошларны  санадылар,    аларның    тавышларын  тыңладылар,  рәсемнәрен  ясадылар.  Әти-әниләр  балаларны   кызыксынып  күзәттеләр,  нәтиҗәләр  ясадылар.

Балалар бакчасында   әти-әниләр  өчен  ачык  шөгыльләр  күрсәтелде.  Кечкенәләр  төркемендә   әти-әниләр  сөйләм  үстерү   буенча  шөгыль   карадылар.  Нәниләренең   тырышып  үзләренчә  җавап  бирүләрен,   соңыннан  пумала  белән  рәсем  ясауларын    күрү    әти-әниләр  өчен  бик  күңелле   булды.  

Каникулдан   килүгә   мәктәп-бакчабызда   чаңгы  шуу   сезоны  башланып  китте.  Укучыларыбыз   укытучылар     белән  берлектә  чаңгы  юлы  салдылар  һәм  шуа  башладылар.   Мәктәп-бакча  артындагы  болынлыкның   бик  якын   булуы   рәхәтләнеп  шуарга  мөмкинлек  бирә.   Бакчада  тәрбияләнүче  балалар  да  укучылардан  калышмый - алар  мәктәп   ишек  алдында   шуалар.  Киләчәктә   чаңгы  ярышы  уздырылыр  дип  көтелә.   

Менә  көтеп  алган  кышкы  каникуллар   узып   та   китте...  Рәхәтләнеп  саф   һавада    уйнап,  кунакларга  барып  ял  иткән  укучыларыбыз   көч  туплап  мәктәп-бакчага  җыелды.  Алар  бер-берсен  бүлдереп   каникулдагы  вакыйгаларны  сөйлиләр,   кем   кая  барган,   кем   нинди   кызык  хәлләргә  юлыккан...  Ә  нәниләр  белән  башкача  -  аларның  кайберләре   бакчаны  онытырга  да  өлгергән.   Шулай  булса  да,   борчылырга  урын  юк.   Иң   мөһиме  -   нәниләребез,  укучыларыбыз  тулы  составта,  сау-сәламәт!  Яңа  елның    тәүге   эш      һәм  уку   көне    башланып  китте.   Хәерле  сәгатьтә!  

31  декабрь  көнне   Арча   шәһәре   стадионында   "Зима - 2015-2016"   конкурсына  йомгак  ясалды.   Һәм  безнең  мәктәп-балалар  бакчасы      территорияне   яңа  елга карата   бизәү   буенча    3  урынга  һәм   кыйммәтле   бүләккә  ия  булды.  Бу  җиңү  -  коллективның  уртак  хезмәт  һәм  иҗат  җимеше   нәтиҗәсе.  Һәр  хезмәткәргә  олы  рәхмәтебезне   җиткерәбез  һәм  тәбрик  итәбез!