Бүген мәктәп-бакчабызда   1,2.3,4   класс  укучыларына  "Укучының  мәдәни  көндәлеге"  тапшырылды.   Авыл  китапханәчесе   Сабирҗанова  Рәйфә  Нурияздан  кызы  укучыларны  көндәлек,   аны  тутыру  тәртибе,   районыбызның  һәм  республиканың  тарихи  объектлары,   истәлекле  урыннары  белән     таныштырды.  

 16  октябрь  көнне  коллективыбыз  белән  Болгар  дәүләт  тарихи-архитектура  музей-тыюлыгына   сәяхәт  иттек.  Изге  урыннарда   сәяхәтебезне   дөньядагы  иң зур   Коръән   сакланган   Истәлек  билгесе  дип  аталучы   музейдан   башлап,  Болгар   цивилизациясе     музеенда  дәвам  иттек. 2013  нче  елның   маенда  ачылган  8500  дән  артык  археология   табылдыклары  тупланган   әлеге  музей -  искиткеч  кызыклы   урын.  Андагы   археология  табылдыклары    Болгар  шәһәренең  тарихи  үсеше,  дөньяда  тоткан  урыны  турында  сөйлиләр.  Аннан  соң  тәҗрибәле,   һәр   сорауга   тулы  җаваплар  бирүче   экскурсовод  Люция  ханым   безне  шәһәрчектәге   Җәмигъ    мәчете,   Зур  манара,  Успение  чиркәве,    Ак  пулат,  Кара  пулат,  Хан  сарае,  Төньяк  һәм  Көнчыгыш   төрбәләр,  сәхәбәләр  һәйкәле,   Кече  манараларга  алып  барды. Район  үзәгендәге   "Болгар"  кафесында   төшке  ашны  ашагач,   Ак  мәчеткә  аяк  бастык.  Татарстан  Республикасының    архитектур  хәзинәсе  саналган  Ак  мәчет    безне  үзенең   искиткеч   гүзәл   гөмбәзләре,  манаралары,   ярым  айлы  колонналары,   мәчетне  көзгедәгечә  чагылдырган  сулыгы,   эчендәге   матурлыгы   белән    гаҗәпкә  калдырды.  Дөяләр  патшалыгына  да   керми  мөмкин  түгел - анда  да  булдык.   Сәяхәткә  барган    һәрберебез   истәлек   фотолары,   Болгар   сувенирлары   һәм  әлбәттә  онытылмаслык  тәэсирләр  белән    белән  кайттык.

10  октябрь   көнне  Казан  шәһәренең  Агропромышленный  паркында  узган  ярминкәдә  безнең  мәктәп-балалар  бакчасы  да  катнашты.  Тәҗрибә  участогында   үстерелгән  уңыштан   тыш   ярминкәгә    Шүрәле, аты  белән  Былтыр   да  алып барылды.  

Район  күләмендә  үткәрелгән    "Минем  яраткан  укытучым"  конкурсына  мәктәп-бакчабыздан    4   укучының     эше   җибәрелгән  иде   һәм   аларның  барысы  да   призлы    урынга  лаек  булган.  Җиңүчеләр  -  Котдусов  Руслан,  Зарипов  Илназ,   Хәбибиуллина  Лилия    һәм  Хәкимова  Алияне   тәбрик  итәбез!   Киләчәктә  дә  шундый     иҗади,  актив    укучылар   булып  калуларын   телибез!   

      Бу   атнада  мәктәп-бакчабызда   антикоррупция     буенча  "Надо  жить  честно!"   район  конкурсының   мәктәп  этабы  үткәрелде.   Район  этабына   1  класс   укучысы  Котдусов  Русланның  һәм  4  класс  укучысы  Закирҗанова  Гөлинәнең  эшләре  җибәрелде.  Район  этабында  да  уңышлар телибез  сезгә,  укучылар!

Кичә   районыбызда  үткәрелгән   укытучылар   көнендә   безнең  мәктәп-балалар   бакчасыннан   5  педагог  катнашты.  Искиткеч   матур   итеп   оештырылган   бәйрәмдә    мәктәбебезгә   "Яңа  уку  елына  әзерлек   буенча   җиңүче"   дипломы   һәм   кыйммәтле   бүләк     тапшырылды.    Шулай  ук   дәүләт     түләүләре   түләү   конкурсы   буенча  да   мәктәбебез    III   урынга   чыгып,   грамота  һәм   бүләккә  ия  булды.  Ә   педагог-оештыручыбыз   Галәветдинова  Р.Ә.   "Иң  күп  түләүче    педагог"   номинациясендә   II   урынга  лаек  булды.  Бу  бәйрәмнән  барыбыз  да   күтәренке   кәеф   белән   яңа  үрләр  яуларга  рухланып  кайттык.

              Мәктәп-бакчабыз   сайтында    кунак   булган   барлык    укытучыларны,   хезмәттәшләребезне     һөнәри  бәйрәмебез  -  УКЫТУЧЫЛАР  көне  белән  тәбрик  итәбез!

           Илләребез   тыныч,    гаиләләребез   имин  булсын,     мәктәпләребез    һәрчак  гөрләп  торсын,   Ходай  сәламәтлектән   аермасын  дигән  изге   теләкләрдә   калабыз!

Кадерле  ветеран  укытучыларыбыз,   техник  хезмәткәрләребез,   укучыларыбызның    әби-бабайлары,   дәү  әти,  дәү  әниләре!    

Сезне  иң   гүзәл,  иң   лаеклы   бәйрәм - Өлкәннәр  көне  белән   тәбрик  итәбез!   Сау-сәламәт   булып,   балаларыгызның,   оныкларыгызның    игелеген    күреп,   хөкүмәтебезнең   ихтирамын  тоеп    озак   яшәвегезне   телибез!

Бүген   мәктәбебезнең  1-4  класс  укучылары  белән   "Время  доверять"  акциясе  кысаларында    класс  сәгате   үтте.  Укучыларыбызга   ышаныч  телефоны  турында  аңлатылды,   кызыклы  уеннар  оештырылды.

Кичә  мәктәп  яны  тәҗрибә  участогыннан     кишер  һәм  чөгендер  уңышын  җыеп  алдык.   Бу  күңелле  өмәдә    барлык  укучылар  һәм  хезмәткәрләр   дә  катнашты.  Җәй  буе  тырышып  эшләвебез    бушка   китмәгән  -  яшелчәләр  ишелеп  уңганнар!    Аеруча  кишер   барыбызны  да  шаккатырды.   Иң  зурын  сайлап  үлчәп  тә карадык,    810  грамм  авырлыкка   җиткән!    Кыш    буена   җитәрлек   уңыш  -  витаминнар  чыганагы   җыелганга  барыбыз  да  шатландык.