Балалар  бакчасында  тәрбияләнүче   балаларның  әти-әниләре   тарафыннан   искиткеч   матур,    үзенчәлекле   кул   эшләре   эшләнде.  Алар   үзләренең  шушы  җан   җылысын  кушып   эшләгән   эшләнмәләрен   бакчабызга  бүләк  иттеләр.  Кул  эшләре    күргәзмәсе  хәзерге  көндә   бакчага    ямь   биреп,   һәркемне  сокландырып   тора.  Балалар  күңелендә   матурлыкка  соклану,   аны  үз   кулларың  белән  тудыру  теләге   уята.  Рәхмәт  сезгә,   әти-әниләр!

  Барлык  кул  эшләренең  аерым  фотоларын   сайт     менюындагы   Медиатека    Фотогалерея   бүлегеннән   карый  аласыз.

  Мәктәп-бакчабызда   Бөек  Җиңүнең  70  еллыгына  багышланган  "Онытылмас  еллар  авазы..."  проекты   тормышка  ашырыла.   Проект  кысаларында  узган  әңгәмәләрдән   соң   каникул  вакытына   конкурс  эшләре  бирелгән  иде.  Конкурсларда    барлык  укучылар  да  тырышып  катнаштылар.   Җиңүчеләр   булып  түбәндәге  укучылар  билгеләнде:

"Нәкыйп   Сафин - безнең  горурлык!"  шигырь    конкурсында:    

1  урын - Фазуллин   Ленур,   Әсхәдуллин  Нияз

2  урын - Галәветдинова   Алсу

"Ул  елларның  даны  мәңгелек!"    шигырь  конкурсында:

1  урын  -  Галәмиев  Инсаф

2  урын - Зарипов  Илназ

3  урын - Хәбибуллина  Лилия

"Минем  гаиләм   тарихында  Бөек  Ватан  сугышы"    язма  эшләр  конкурсында:

1  урын - Галәветдинова  Гөлфия,   Хәкимова  Алия

2   урын - Фазылҗанова   Хәния,   Закирҗанова   Гөлинә,   Хәбибуллина  Гөлия

3  урын - Бульмакова  Наилә,  Шәйхиев   Ифрат 

 Молодцы,   укучылар!    Һәрвакыт   шундый  актив  һәм  иҗади   рухта  булыгыз! 

 Мәктәп-бакчабызда    укучыларыбыз   арасында   каен  бөресе   җыю  буенча   бәйге  игълан  ителгән  иде.  Каникулдан  килү   белән  бу  бәйгегә   йомгак  ясалды.  Мәктәп  буенча   иң  күп  бөре  җыючылар -  җиңүчеләр   билгеле  булды.  1  урын     Әсхәдуллин   Ниязга  бирелде.   Ул   57  шырпы  тартмасы  бөре  җыйган!    2  урын  26  шар  шырпы  тартмасы  бөре  алып   килгән      Галәветдинова  Гөлфиягә   һәм    Фазуллин   Ленурга   бирелде.  3  урынга  16 шырпы  тармасы   бөре  җыйган  Хәбибуллина  Гөлия   ия  булды.   Урын  алучыларга   үз  фотоларыннан   ясалган  коллаж   һәм   кызыклы  уен   тапшырылды.   Норманы  арттырып  үтәгәннәргә  дә  бүләкләр  бирелде.      Молодцы,  укучылар!     Калган  укучыларыбызга  да   тырышлыклары   өчен  зур  рәхмәт  белдерәбез!

26 нчы  март  көнне   мәктәбебездән  2  укучы   Бөек  Җиңүнең  70 еллыгына  багышланган  районкүләм  шигырь  сөйләүчеләр   конкурсында  катнаштылар.  2 класс  укучысы  Газимов  Рөстәм   Ф.Кәримнең   "Ватаным  өчен"   шигырен,  4  класстан   Галәветдинова  Алсу   М.Җәлилнең   "Вәхшәт"    шигырен  сөйләделәр,   катнашучы  сертификатына   ия  булдылар.  Аларга  зур  рәхмәтебезне  белдерәбез!   

Бүгеннән   укучыларыбыз   көтеп  алган   язгы  каникуллар  башланды.  Иң  озын  саналган    3  чирек  безнең  укытучылар  һәм  укучылар  өчен  бик  тиз  генә  сизелми  дә  үтеп  китте.  Чөнки    эшебез  бик    күп,  бик  тыгыз   булды  бит!    Укучыларыбыз   тырышып     уку  белән   беррәттән    төрле   конкурсларда,   "Онытылмас  еллар  авазы..."   проектында  катнаштылар.  Өч  зур    ачык  чарада   катнашу  үзе  күпме    әзерлек  сорый.   6  февраль      көнне   "Уйнагыз,   гармуннар!"   дип  аталган    гармунчылар  белән  очрашу   кичәсе  оештырылды,   5  март  көнне   "Ак  чәчәкләр - Оксана   бүләге"   спектакле   куелды,   18  март  көнне   республика  семинарында   "Заманча  уен"    театральләштерелгән   тамашасы   күрсәтелде.  Аларның  һәрберсендә   һәр  укучы   да  актив    катнашты,  үзенең   осталыгын,  сәләтен   күрсәтте.   Молодцы    укучыларыбыз!     Язгы  каникулда    да    бирелгән  конкурс   эшләрен  башкарып,   каен  бөресе    җыеп   ялыгызны  файдалы   үткәрерсез   дип   ышанабыз! 

18   март  көнне   мәктәп-бакчабызда  балалар  бакчалары  тәрбиячеләренең      "Федераль    дәүләт   белем  бирү    стандартларын   тормышка  ашыруда    проект  эшчәнлеге"     темасына    республика   семинары   булып  узды.  Семинар  программасы     мәктәп-бакча  белән   танышуны,     ачык  шөгыльләр,   ачык  чара   карауны,  мастер-класста   катнашуны  үз  эченә  алган  иде.  Шушы  эшчәнлек  барышында   кунакларыбыз    мәктәп-бакчаның   белем  һәм  тәрбия  бирү  процессы, педагогларыбыз   кулланган   үзенчәлекле   алымнар,   тормышка  ашырылучы   проектлар   белән   таныштылар,   музейда  булдылар,   кул   эшләре  күргәзмәсен    карадылар,  мастер-класста  катнаштылар,   ачык  чара  аша  авылыбыз   тарихы,  күренекле  шәхесләребез   турында  мәгълүмат  алдылар,  нәниләрнең   һәм  укучыларның   талантлылыгына   сокландылар.  Коллегаларыбызга          түгәрәк   өстәл   янында   биргән  уңай    бәяләре,    җылы  сүзләре,   киңәшләре  өчен   рәхмәт   белдерәбез.   Семинардан   үзләре  өчен  файдалы   мәгълүмат,   эш  тәҗрибәсе   туплаганнардыр  дип  ышанып  калабыз.   Мәктәп-бакчаның  барлык  хезмәткәрләренә,    нәниләргә,   укучыларга   олы  рәхмәтебезне  җиткерәбез.   

13  март  көнне   Арча   Үзәк  китапханәләр  челтәрендә  "Ул  елларның  даны  мәңгелек!"     исеме  астында   Бөек  Җиңүнең  70  еллыгына  багышланган   районкүләм   шигырь   укучылар   бәйгесе  булып  узды.   Анда  безнең    мәктәп-балалар  бакчасы   педагог-оештыручысы   Рания  Галәветдинова  да  чыгыш  ясады.    Ул    үзенең   "Язмышларда  әрем  ачысы..."   пьесасыннан    өзек   сөйләде.   Һәм     "Проза"   номинациясендә    25-55  яшьлекләр   арасында   1  урынга  лаек  булды.   Җиңүегез   белән  котлыйбыз!   Киләчәктә  иҗади   уңышлар  телибез   сезгә!

2015  нче  ел  - Парклар  һәм  скверлар  елы  уңаеннан  мәктәп-бакчабызда  стенд  эшләнгән,   чаралар  планы   төзелгән  иде.  Бу  көннәрдә  укучыларыбыз    арасында  "Белемеңне  тикшер!"   кроссвордын  чишү   бәйгесе  бара.  Кроссворд    стендта   урын  алды,    күчермәсе   күпләп     чыгарылып   укучыларга  таратылды.  Аның   биремнәре  Казан  шәһәрендәге  парклар  һәм  скверлар,   аларның  тарихы,  үзенчәлекләре  турында.   Уңышлар  телибез  сезгә,  зирәк  һәм  тапкыр  укучыларыбыз!     

Иң  матур  язгы  бәйрәм алды  көннәрендә  мәктәбебез  коллективы   Пешәнгер клубы  сәхнәсендә  Пешәнгер,  Мирҗәм   авыллары  халкы  өчен  зур  бүләк  ясады  -  "Ак  чәчәкләр -Оксана    бүләге"   исемле  спектакль  куйды.  Бу  спектакль  -  коллективыбызның   уртак  иҗат  җимеше.  Анда  барлык   укучылар  һәм  укытучылар  да   катнашты.  Спектакльдә  Бөек   Ватан   сугышы   елларындагы  тылдагы  тормышның     авырлыгы,   эвакуацияләнгән     балалар   язмышы,  ятимлек,  толлык  ачысы,   сугыш  китергән  кайгы-хәсрәт  ачык  чагылды.  Нәни  артерларыбыз  искиткеч  оста   уйнадылар.  Тамашачы   безне  алкышларга     күмде.         

      28 февраль  көнне   Апаз мәдәният йортында шушы авыл җирлеге территориясендә яшәүче сугыш һәм тыл  ветераннарына «1941-1945 елларда Бөек Ватан сугышында Җиңүгә 70 ел»   юбилей медальләре тапшыру тантанасы узды.  Бу  чарада   Пешәнгер  башлангыч  мәктәп-балалар  бакчасы   коллективы   "Язмышларда  әрем  ачысы..."   исемле   күренеш  белән  чыгыш  ясады.  Бу  күренештә  сугыш   елларындагы   тылдагы  тормышның   нинди   авыр,  михнәтле,  кайгылы  булуы  ачык  чагылды. Залда  утырган    бер  генә  кеше  дә  күз  яшьләрен  тыя  алмады...  Өлкәннәр  шул  дәхшәтле  елларны  кабат  хәтереннән   кичерде,  яшь   буыннар  сугыш   китергән   бәхетсезлекләрне  күз  алдыннан  үткәрде...