29  ноябрь  көнне  Пешәнгер  авылы  клубында  мәктәп-бакчабызның  педагог-оештыручысы,   үзешчән  шагыйрә   Рания  Галәветдинованың  иҗат  кичәсе  оештырылды.  Өч  сәгать   дәвам  иткән  кичәдә  Рания   иҗат  иткән  шигырьләр   сөйләнде,    җырлар   яңгырады,  видеоклип   күрсәтелде.  Яшь  шагыйрәне    әти-әнисе, беренче  укытучысы,   тормыш  иптәше,  балалары,   авыл советы   башлыгы  һәм  без -  хезмәттәшләре   котладык.  Бакчабыз  нәниләре     Инзилә,   Ильяс,   Илшат,  Инзиләләр   үзләренең    дәртле  биюләрен,   матур  җырларын    бүләк  иттеләр.  Укучыларыбыз    хор  белән  "Туган  авылым -Пешәнгер"   җырын  башкардылар,   Зарипов  Илназның  шигырен,  Галәветдинова  Гөлфия  белән   Әхмәдуллина  Гөлзирәнең    мари  биюен,   Хәбибуллина  Лилиянең   чабата  биюен   да  тамашачылар  яратып  кабул  итте.   Хезмәттәшләребез   хоры  башкаруындагы  "Мәңге  яшә,  Арча!"  җыры,    Гөлия  Лотфуллина, Лилия  Нигъмәтҗанова,  Булат  Лотфуллин,   Гөлия  Усмановаларның  җырлары,   Энҗе  Әхмәтҗанова,   Лилия  Мөхәммәтҗанова,   Илсаф  Галәветдиновларның     нәфис  сүзләре, Зәлия  Бульмакова - татар  халык,    Гөлназ  Котдусованың  чегән  биюе   дә  искиткеч   күркәм  килеп  чыкты. Кичәне    Кзыл-Игенче    башлангыч  мәктәбе  укытучысы   Хәят  Сәләхова    эчтәлекле,   җанлы,  килешле  итеп  алып  барды.   Хезмәттәшебезне   әлеге    гүзәл   бәйрәме  белән  тәбрик  итәбез!   Иҗат  кичәсендә  катнашкан   һәркемгә   олы  рәхмәтебезне   җиткерәбез!   

Кичә   4  класс  укучылары  инглиз  теленнән   диагностик  тест  тапшырдылар.  

Бүген   мәктәп-балалар бакчасында  укучыларга  һәм  балаларга   "Юка  боз"  турында   аңлатылды.  

Бүген мәктәп-бакчабызның  4  класс  укучысы  Хәкимова  Алия   математика   фәненнән   районкүләм  олимпиадада    катнашты.  Мәктәбебезнең  данын  яклап  катнашуы,   үзенең  белемен  сынап  каравы  өчен  алдынгы  һәм  тырыш  укучыбызга  рәхмәт  белдерәбез! 

Бу  атнада  балалар  бакчасында   балаларның  һәр   төрле      эшчәнлегенә   мониторинг  нәтиҗәләре  ясала,   нәтиҗәләрдән  чыгып   тәкъдимнәр,    карарлар   кабул  ителә.  Тәрбиячеләргә    уңышлар   телибез!        

Бүген  бакча  нәниләре,  укучылар   һәм   укытучылар   каршында   2  класс  укучыларын  мәктәп-бакчабызның   "Карлыгач"   балалар   оешмасына  кабул  иттек.   Тантана  барышында   укучылар   Казан  шәһәрендәге  паркларга,   скверларга     сәяхәт  иттеләр,   һәйкәлләр  каршында  җырлар    башкардылар,  "Карлыгач"ның   кагыйдәләрен    әйтеп,   гимнын   җырладылар.  Бу  көтелгән  бәйрәмнәре   белән  котлап   аларга  бүләкләр  тапшырылды,   "Карлыгач"  значогы  тагылды.  

Балалар  бакчасы  нәниләре  кар  яуганны  түземсезләнеп  көттеләр.  Чөнки   алар  көндезге  прогулка    вакытында   ап-ак   карда   рәхәтләнеп  уйный  алалар.   Бүген   дә   саф   һавада  төрле-төрле  уеннар   уйнаган  вакытта  фотога     төшердек  нәниләрне.   

Мәктәп-бакчабызның    2  класс  укучылары   "Карлыгач"   балалар  оешмасына  керергә   әзерләнәләр.  Алар  Карлыгачларның   гимнын,  кагыйдәләрен   өйрәнәләр,   бәйрәм  тантанасына   җыр-биюләр  әзерлиләр.  

Бүген   мәктәп-балалар  бакчасында   әти-әниләр   җыелышы  булып  үтте.  Ул  өч  өлештән  торды.   Иң  беренче    әти-әниләр   бүленеп,    бакчада -   ачык   шөгыльләр,    мәктәптә   ачык  дәресләр  карадылар.  Аннан   соң  мәктәп  дирекциясе   тарафыннан   гомуми   җыелыш  үткәрелде.  Бу   өлештә   2015-16  нчы  уку  елының  1  чиреге  нәтиҗәләре,  2  чиреккә    планлаштырылган   эшләр,   мәктәп-бакчаның   финанс   эшләренә  отчет,   укучыларны  озын   тәнәфестә   тукландыру   мәсьәләсе    буенча  чыгышлар   ясалды.  Өченче  өлештә   класс   җыелышлары  үткәрелде.  Җыелыш   оешкан  төстә  һәм   нәтиҗәле   үтте.   

Мәктәп-бакчабызда   Тукай  рәсемнәренә  иллюстрацияләр   конкурсы  үткәрелеп,   җиңүчеләрнең   эшләре  район   мәгариф  идарәсенә   җибәрелгән  иде.   Шушы  көннәрдә    конкурс   нәтиҗәләре  чыгарылды.    Безнең  мәктәп-балалар  бакчасыннан  4  класс  укучысы     Закирҗанова   Гөлинәнең   2  урын,  3  класс  укучысы   Касимова  Камиләнең    3  урын,    балалар  бакчасының   хәзерлек  төркеме  тәрбияләнүчесе   Фазуллина  Инзиләнең   3  урын   алуы  билгеле  булды.  Аларны    җиңүләре  белән  тәбрик  итәбез!   Барлык  катнашучыларга   да  олы  рәхмәтебезне  белдерәбез!