1 декабрь – СПИДка каршы көрәш көне. Укучыларга наркомания, токсикомания, СПИД кебек афәтләрнең кешелеккә бик ничек куркыныч булуы турында аңлатылды. Ихтыяр көче булу, кешегә иярмичә - үз җавабыңны төгәл әйтә белергә кирәклеге әйтелде.

Бүген, ягъни 30 нчы ноябрь көнне, укытучылар өчен вебинар оештырылды. Аның темасы: “Балалар һәм яшүсмерләр арасында сәламәт яшәү рәвеше формалаштыру һәм ВИЧ-инфекция таралуны кисәту буенча профилактик чараларны оештыру”.
Бөтендөнья СПИДка каршы көрәш көне ел саен 1 декабрьдә билгеләп үтелә. Бу көн - ВИЧ/СПИД эпидемиясенең Глобаль таралуын туктату кирәклеге турында искәртүгә хезмәт итә.
СПИД – специфик вируслар китереп чыгарган һәм дәвалауга бирешмәүчән йогышлы авыру. Вирус кешенең канына үтеп керә һәм организмның иң мөһим саклану чарасы булган ак кан тәнчекләрен, лимфоцитларны зарарлый. Нәтиҗәдә СПИД йоктырган кеше төрле авырулар китереп чыгаручы микробларга, яман шешләргә бирешүчән була.

Бүген мәктәбебезгә Арча үзәк больницасыннан врач нарколог-психиатр Әхмәтҗанов Рөстәм Әдһәм улы, Арча шәһәренең 6 нчы номерлы мәктәбе психологы Хадиева Эльвира Ринат кызы, Арча муниципаль районы башкарма комитеты аппаратының яшүсмерләр арасында хокук бозуны кисәтү буенча әйдәп баручы белгече Хабирова Рамилә Гомәр кызы укучылар белән очрашуга килделәр. Һәр белгеч үз юнәлеше буенча укучылар алдында чыгыш ясадылар, төпле киңәшләрен бирделәр. Балалар үзләрен кызыксындырган сорауларга тулы җаваплар алдылар.

Акрын гына табигатькә кыш якынлаша. Көннәр салкыная.Кошларга ризык табу кыенлаша. Аларга ярдәм йөзеннән башлангыч класс укучылары белән җимлекләр элдек.Кошларга ипи валчыклары , ярмалар салдык. Рәхәтләнеп сыйланыгыз, кошкайлар!

Бүген мәктәбебезнең СМС балалар төркеме “Сәламәт әни-сәламәт бала” (Здоровая мама-здоровый ребенок”) акциясендә катнашты. Халык күп йөри торган урыннарда очраган хатын-кызларны сәламәт яшәү рәвеше алып барырга өндәделәр. Аларны якынлашып килүче әниләр көне белән котлап, ярату билгесе булып торган йөрәк һәм беләкзекләренә уңыш, кояш, шатлык билгесе булган кызгылт-сары тасма бәйләделәр.

Мәктәбебездә "Гомумфизик әзерлек" һәм "Яшь натуралистлар" түгәрәкләре эшләп килә. Әлеге түгәрәкләрдә укучылар бик теләп шөгылләнәләр, сәламәтлекләрен һәм белемнәрен арттыралар.

Бүген мәктәбебез укучылары өчен “Эколята – молодые защитники природы” дигән темага экологик дәрес үткәрдек. Башлангыч сыйныф укучылары туган ягыбызның хайваннар дөньясы белән танышты. Югары сыйныф укучылары чүп-чарны төрләргә аерып җыю һәм икенче эшкәртү турында видеоролик карадылар. Туган ягыбызның табигатен, хайваннар дөньясын саклыйк! Тирә-юнебезгә сакчыл караш булдырыйк!

2005 елның октябреннән БМО Генераль Ассамблеясы резолюциясе нигезендә, ноябрьнең өченче якшәмбесе Бөтендөнья юл-транспорт һәлакәтләре корбаннарын искә алу көне дип игълан ителде.
БМО мәгълүматларына караганда, ел саен юл-транспорт һәлакәтләре 1 миллион 300 мең кешене алып китә.
Тагын 20дән 50 миллионга кадәр кеше төрле тән җәрәхәтләре ала.
Юл-транспорт һәлакәтләре нәтиҗәсендә барлык үлем очракларының 50% тан артыгы 15тән 44 яшькә кадәрле яшь төркеменә туры килә.
Ни өчен мондый хәл килеп чыга?
Күп вакытта:
• Юл аркылы чыгу өчен билгеләнгән урыннардан тыш, тиеш булмаган җирдән чыгу
• Көтелмәгән юлдан хәрәкәт итүче яки туктап торучы транспорт чараларының кинәт килеп чыгуы аркасында
• Светофор сигналына буйсынмаганда
• Юлда уйнаганда, тротуар булып та аннан йөрмәгәндә
Бүгенге тәрбия сәгатендә укучыларга юлда сак булырга, яктылык кайтаручы элементларны тагып йөрү мөһимлеге кабат искәртелде.

Бүген физкультура дәресендә башлангыч класс укучылары белән "Күңелле эстафета" үткәрдек.Укучылар рәхәтләнеп ярыштылар. Эстафетаның программасы бай: мавыктыргыч ярышлар, йөгерү, туплар белән сикерү ,эскәмиядә ятып шуышу биремнәре үткәрелде.Укучылар рәхәтләнеп уйнадылар, ял иттеләр.