Бүген Ш.Биктимеров исемендәге район мәдәният йортында “Талантлар утравы” кастингы үткәрелде. Кастингта җыр-моң сөюче гаиләләр катнашты. 1 нче сыйныф укучылары Гарифуллина Чулпан әнисе белән, Имамиева Нәфисә әтисе, әнисе, сеңелесе белән чыгыш ясадылар һәм гала-концертта катнашу хокукына ия булдылар. Котлыйбыз һәм уңышлар телибез!

Мәктәбебездә “Яхшылык”  атнасы бара. Бүген “Чиста чишмә” акциясе үткәрелде. 5 нче сыйныф укучылары педагог-оештыручы Миннуллина Н.Н.җитәкчелегендә  чишмәгә бардылар. Чишмә кырыен кардан арындырдылар, кеше йөрерлек итеп сукмак ясап куйдылар.  Укучылар белән очрашуга,  узган җәйдә чишмәне матурлап ясаган , төзекләндергән, Илдар абый Ибрагимов  та килде. Ул укучыларга үзенең изге теләкләрен җиткерде.

Беренче китап син булдың,

Әлифба дус, хуш инде...

Юк ла, хуш димик, исән бул –

Син аерылмас дус инде!

Мин үсә-үсә буйга җитәрмен,

Бәлки юлларым китәр еракка.

Таулар үтәрмен, сулар кичәрмен,

Сине онытмам, дустым Әлифба!

Табиб, игенче, шагыйрь булырбыз,

Бик озын-озак юллар узарбыз.

Кайда йөрсәк тә, кемнәр булсак та,

Күңелдә һәрчак җан дус - Әлифба! - дип саубуллаштылар яраткан китаплары белән беренче сыйныф укучылары Чулпан, Нәфисә, Адилә, Иркә, Язилә, Иделия, Рүзәл һәм Рамазан. Беренче укытучылары Минзилә Зөфәровна, әти-әниләре, дәү әниләре  укучыларның сәламәт, акыллы, уңган, тырыш булуларын теләделәр.

Хәрби-патриотик тәрбия айлыгы буенча мәктәбебездә күп төрле чаралар үтә. Шуларның берсе - "Аҗаган-2015" уены бүген үткәрелде. Уенда укучылар ике командага "Ястреб" һәм "Орел"га бүленеп түбәндәге ярышларда көч сынаштылар: 1) Строевой смотр; 2) Автомат сүтеп-җыю; 3) Турникта тартылу; 4) Отжимание ясау; 5) Пакет эзләү; 6) Окоп казу һәм граната ату; 7) Кече һәм олы байракларны эзләү; 8) Аркан тарту; 9)  Башлангыч класс укучылары белән чаңгыда эстафета.  Кече байракны “Ястреб”лылар тапса, олы байракка  беренче булып “Орел” командасыннан Алмаз Шамилов барып җитте. Нәтиҗәләр мини-футбол, гер күтәрү ярышларыннан соң ясалачак.

    Хәрби-спорт уеннары тәмамлангач, һәркем күтәренке күңел белән таралышты.