1926 елдан башлап  Россиядә 1 апрель - Бөтендөнья кошлар көне дип билгеләп үтелә. Шул уңайдан, бүген безнең мәктәптә дә "Исәнмесез, кошкайлар!" дигән темага чара уздырылды. Аны биология укытучысы Мөхетдинова Алия Рафаэлевна оештырды. Бу чарада укучылар кошлар турында күп кызыклы яңалык ишеттеләр, үзләре белгән мәгълүматлар белән уртаклаштылар. Шулай ук чарага әзерлек барышында укучылар рәсемнәр ясадылар, агачларга сыерчык оялары элделәр. Озакламый кошлар безне матур җырлары белән куандырыр.

Бүген Бөек Ватан сугышы ветераны Габделхаев Габделхак Габделхаевичның туган көне – 90 яшьлек юбилее. Шул уңайдан “Таң” оешмасы активистлары тәрбия эшләре буенча директор урынбасары Мөбарәков Р.Г. җитәкчелегендә ветеранның өендә булдылар. Алар юбилярны олы бәйрәме белән котладылар, истәлек бүләкләре тапшырдылар. 

Районыбызда, 25 нче март көнне, якташыбыз, күренекле галим, тел белгече Әбрар Кәримуллинның иҗади мирасын өйрәнүгә багышланган республикакүләм фәнни-гамәли конференция үткәрелде. Безнең мәктәптән бу чарада 10 нчы сыйныф укучысы Мөхәммәтова Илсинә (җитәкчесе: Мөхәммәтова С.М.) катнашты. Ул "Татар халкының мәдәнияте һәм тарихы" секциясендә уңышлы чыгыш ясады һәм II дәрәҗә Диплом белән бүләкләнде. Мәктәп дирекциясе укучыбызга рәхмәт белдерә, алга таба уңышлар тели.

 Укучыларының язгы каникулын файдалы һәм мавыктыргыч итеп үткәрү максатыннан төрле чаралар оештырыла. 23нчы март көнне Шәмәрдән лицее базасында флорбол ярышы үтте. Мәктәбебезнең егетләр  командасы өченче урынга лаек булды.  Аларны  җиңүләре белән  котлыйбыз! 

Каникулның беренче көне күңелле башланды. Бүген баскетбол уены буенча Тимершык һәм Шыңар командалары арасында  дусларча очрашу узды. Хәрәкәттә-бәрәкәт дип белми әйтмиләр. Уен ике командага да бик ошады. 

Яз килде. Тиздән җылы яклардан канатлы дусларыбыз - сыерчыклар да кайтыр. Ә безнең укучылар кошларны каршы алырга күптән әзер. Буш вакытларын файдалы эштә уздырды алар: сыерчык оялары ясадылар.   Технология укытучысы Мөхетдинов Ф.Я. җитәкчелегендә 7 нче сыйныф егетләре ясаган матур ояларны күреп күңел сөенә. Афәрин, егетләр! 

Мәктәптә "Игелек кыл!" акциясе дәвам итә. Тимурчылар  игелекле эш башкаруларын дәвам итә. Бүген "Кыңгырау" отряды варислары  Кече Шыңар авылында гомер итүче тыл ветераны Әскарова Нәкыя апага шефлык оештырдылар. Нәкыя апа тимурчыларның эшеннән канәгать калды. 

Яз килә, кояш көлә! Яз көне авыл халкын күп төрле хезмәт көтә. Бу көннәрдә тимурчылар өчен дә  эш җитәрлек. Һәр авылда ярдәм көтүче өлкәннәребез яши. Тимурчылар аларга ярдәмгә ашыгалар: кар тараталар, боз ваталар, чишмәләрне дә онытмыйлар. Әби-бабайларны игелекле эшләре белән куандыралар алар. Барыбыз да өлкәннәргә карата игътибарлы, ихтирамлы булыйк!

"Язгы игелек атнасы" дәвам итә. Бүген варислар авылыбыз гүзәллеге булган чишмәләребезне күзәттеләр. Алар чишмәләрнең  кардан ачылган урыннарын чүптән чистарттылар.

11-13 март көннәрендә Казан шәһәрендә Республика "Дулкыннар" конкурсы булды. Быелгы конкурс шагыйрь Хәсән ага Туфанның 115 еллыгына  багышланган иде. Мәктәбебезнең 2-4 сыйныф кызлары "Нәфис сүз"номинациясендә "Кызыксындыру бүләге"нә ия булдылар, Диплом белән бүләкләнделәр һәм Гала концертта чыгыш ясадылар.