Бүген мәктәбебездә "Милләтләр кроссы" акция кысаларында йөгерү бәйгесе үткәрелде.Физкультура хәрәкәтен киң массаларга тарату, авыл халкында физик культура белән даими шөгыльләнү буенча кызыксыну тудыру максатында үткәрелгән бу чарада барлык мәктәп укучылары, укытучылары, техник хезмәткәрләр катнашты. Барлык сыйныфлар арасында беренчелекне яулаган укучылар:

Башлангыч сыйныфлар арасында 1 -  Гыйлметдинов Әдел,  2 - Хуҗиәхмәтов Илданур, 3 - Яхин Рафил.

5 - 8 сыйныфлар арасында 1 - Шарифуллин Рәдис һәм Кадыров Ранил , 2 - Мөхәммәтгалиев Азат, 3 - Галимуллин Нәзир.

9 - 11 нче сыйныфлар арасында 1 - Яхин Ранил, 2 - Сафин Камил, 3 - Нәбиуллин Илгизәр.

Кабак бәйрәмен укучылар түземсезлек белән көтеп алалар. Һәр елны яңа идеяләр, кызыклы композицияләр уйлап табарга тырышалар. Быел да бу бәйрәмгә һәр сыйныф бик теләп әзерләнде. Кабактан ташбака, чәчәкле вазалар, кәрзиннәр ясап, Саба район үзәгендә узачак  күргәзмәгә җибәрделәр.

Быел көз бик матур килде.Янгыр да сирәк кенә ява, көннәр дә җылы, кояш та якты нурлары белән безне иркәли. Экскурсия-походларга йөрер өчен менә дигән вакыт! Кайбер сыйныф укучылары үткән атнада ук дәресләрдән соң табигать кочагына  барырга өлгерделәр инде. Саф һава сулап, туйганчы футбол-волейбол уйнап, учак янында җыелышып аралашып утырып, вакытларын күңелле үткәреп бик канәгать булып кайттылар. Бу атнада да экскурсияләр сезоны дәвам итә!

Көзге уңыш җыю дәвам итә. Буген 5-11 нче сыйныф укучылары укытучылар белән берлектә чөгендер, кишер, кәбестә алу өмәсендә катнаштылар. Уңышның бик мулдан булуы барыбызны да шатландырды.

Татарстан Варислары Берлегенең 15 нче сентябрьдә туган көне. Бу барлык варислар өчен көтеп алынган көн. Бүген мәктәптә 5 нче сыйныф укучыларын "Таң" балалар оешмасының Варислар сафына кабул итү тантанасы узды. Булачак варисларны төрле уеннарда, конкурсларда сынап карадылар, оешма законнарын белүләрен тикшерделәр. Барлык сынауларны үтеп, барлык сорауларга җавап биреп бетергәч кенә 5нче сыйныф укучылары яхшы варис булырга һәм Татарстан Варислар Берлегенең законнарын төгәл үтәргә вәгьдә бирделәр. "Көн саен игелек кылырга әзерме?" дигән сорауга " Без һәрвакыт әзер!" дигән җавап яңгырады.

Буген безнең мәктәптә ГБУ "Сабинское РГВО" -"Саба район ветеринар берләшмәсе"нән  килгән врач эпизотолог Гимадиев Ренат Габдельaхатович укучылар алдында чыгыш ясады. Ул "котыру" чире турында мәгьлүмат ззерләгән иде. Барлык укучылар да бу чыгышны бик игътибар белән тыңладылар. Бу авырудан саклану чаралары һәм бу авыруның хайваннарда күзәтелгән беренче билгеләре белән танышу бик мөһим иде дигән нәтиҗә ясадылар. 

Һәр ел фасылы үзенчә матур, көзне бер төрле төсләргә бай табигате, үзенчә моңсулылыгы өчен һәм мул уңышлары өчен яратабыз. Менә бүген дә мәктәп яны территориясендә, көзнең төп уңышы - бәрәнге алу өмәсе үтте. 8, 10, нчы сыйныф укучылары берничә сәгать эчендә бер бакча бәрәңгене җыеп та алдылар.

Балаларның күңелендә мәрхәмәтлелек тәрбияләү, кечкенә авылларда яшәүче өлкәннәргә мәдәният хезмәте күрсәтү, аларга кечкенә генә бәйрәм ясау, күңелләрен күтәрү максатыннан          9 сентябрь көнне түгәрәк җитәкчеләре, түгәрәкләргә йөрүче балалар белән, Түлешкә авылына бардылар. Өч ир-аттан гына торган гаиләгә  яңа гына мичтән чыккан ризыклар, күчтәнәчләрен тапшырганнан соң , балалар белән “Тамчы булып тамабыз” дип аталган концерт программасы күрсәтелде. Балалар -  Хаҗинур абыйларының  агач эшләнмәләр эшли торган остаханәсен бик кызыксынып һәм сокланып карадылар, сораулар бирделәр. Хайруллиннар гаиләсе безне рәхмәтләр әйтеп, тагын килегез, - дип озатып калды.

"Яшә чишмә!" акциясе кысаларында, 5-8 сыйныф укучылары Олы Шыңар һәм Кече Шыңар авылы чишмәләрен чистарттылар.

Бүген, 5 сентябрь көнне, "Финанс грамоталылыгы көне" кысаларында 9-10 сыйныф укучылары белән "Гаилә һәм дәүләт бюджеты" дигән темага дәресләр үткәрелде.