Мәктәбебездә башлангыч сыйныф укучылары үз тапкырлыкларын табышмаклар кичәсендә сынады. Дөрес җавап биргән саен, кулларында йолдызлар артты аларның. Оештыручыларга да иң тапкырларны билгеләү җиңел булмады! "Барлык укучыларыбызның да зирәк, тапкыр икәннәрен күрү тагын да күңелле,"- диләр алар.

   Мәктәптә башлангыч сыйныф укучылары атналыгы бара. Бүген 3 нче сыйныф укытучысы Ганиева И.И. тарафыннан “Әкияттә кунакта” темасына чара үткәрелде. Укучылар бик теләп укытучының сорауларына җавап бирделәр, әкиятләр сөйләделәр, табышмаклар чиштеләр.

Бүген мәктәбебез  Рәсәй мәктәп укучылары хәрәкәте белән берлектә "Бөтенрәсәй тыюлык дәресе"нә кушылды.  Дәрес барышында укучылар илебездәге тыюлыклар, сакланучы җәнлекләр, табигый бергәлекләр,төрле  халыклар йолалары турында мәгълүмат алдылар. Гамәли күнегүләр башкардылар. Әлеге дәрес укучыларда зур кызыксыну уятты. 

Бүген мәктәбебез укучылары "Ышаныч" ППМС үзәге психологлары белән очрашты. Алар тарафыннан оештырылган тренингларда катнашты. Дуслык һәм бердәмлекнең көче, һәркем холкындагы уңай сыйфатлар, 9нчы сыйныф укучыларының киләчәккә сайлаган һөнәрләренең мөмкинлекләренә туры килү-килмәве тагын бер кат ассызыкланды. Укучылар үзләрен борчыган сорауларга җаваплар да алды. Гомумән, бүгенге көннән мәктәптәге һәркем бик канәгать калды.

Эзтабарларыбыз "Бердәм Россия"нең Нурлат районы бүлекчәсе тарафыннан уздырылучы Яңа ел символы конкурсында катнаша. Укучылар тарафыннан якынлашып килүче ел хуҗасы  Әтәч нинди генә алымнар белән ясалмаган: чигү, ябыштыру, сәйлән тезү, тегү, оригами һ.б.  Мәктәп эчендәге узган конкурста җиңүчеләрнең эшләре конкурсның финал турына җибәрелде.

Бүген барлык сыйныфларда тематик сыйныф сәгатьләре узды. Алар төрле формада оештырылган иде. Кемнәрдер математик исәпләү юлы белән юл һәлакәтеннән имин булу һәм зыян күргән очракта чыгымнарны санады, кемнәрдер кибеттән сатып алынган СВЭ ны киемгә беркетү буенча гамәли күнегүләр башкарды, җанлы әңгәмәдә катнашты, ДДД битләрендәге тематик язмаларны укыды . Әлеге чаралар укучыларыбызныңюлларда исән-имин йөрүен тәэмин итүдә нәтиҗәле чара булыр дип өметләнәбез.

Озакламый кышкы каникуллар.Укучыларның юл йөрү һәлакәтләреннән иминлеген тәэмин итү максаты белән, мәктәптә төрле чаралар уза. СМС балаларның "Шатлык" отряды егетләре 1-5 сыйныфларда "Яктылыкны кире кайтаручы элементлар һәм аларның әһәмияте" дигән темага кызыклы мәгълүмати чаралар уздырды. Үз киемнәрендә урнаштырылган СВЭ рекламалады. 

"Алмаш" балалар оешмасы активы,  укучылар тарафыннан киемнәрдә яктылыкны кире кайтару элементларын куллану дәрәҗәсен ачыклау максатыннан, "Игътибар! Тагын бер кат СВЭ турында" дигән рейд уздырды. Рейд нәтиҗәләре канәгатьләнерлек: укучыларның өс киемнәрендә һәм укучы сумкаларында яктылыкны кире кайтаручы элементлар беркетелгән.