Татарстанда 1 апрельдән чистарту икеайлыгы башланды. Экологик һәм хезмәт тәрбиясе бирү айлыгы кысаларында без дә "Эко-яз 2024" акциясенә кушылып балалар бакчасы территориясен чистарттык.

   Китап – безнең тормышта иң мөһим, иң кирәкле әйберләрнең берсе. Ул киңәшче дә, ярдәмче дә, дөреслеккә юл күрсәтүче дә. Балалар китабы киләчәк буынны тәрбияләүдә, тормышта дөрес юнәлеш сайлауда зур ярдәм булып тора.
Шул уңайдан без алдан мәктәп китапханәсенә экскурсиягә бардык. “Китапханәче һөнәре белән таныштык. Өлкән төркем балалары нәниләргә “Мин китапханәче” исеме астында сюжетлы-рольле уен тәкъдим иттеләр. Әлеге уен аша балалар үзләрен китапханәче һөнәрендә сынап карадылар һәм аны зур кызыксыну белән башкардылар.

      Бүген безнең балалар бакчасында күңел ачу чарасы узды. Көлке көне - балалар өчен генә түгел, өлкәннәр өчен дә күңелле бәйрәм. Бу көнне балалар белән шаярдык, күңелләрне күтәрә торган уеннар уйнадык, үз талантларын ачарга өйрәндек. Иртәдән үк балалар шаярып, бер-берсен алдады. Төркемнәрдә шатлыклы һәм күңелле хәл хөкем сөрде.Балаларга көлке көнендә генә түгел һәрвакыт шатлык бүләк итик! Аларның бәхетле күзләрен күргәч, бу көннең юкка гына үтмәгәнен аңлыйсың!

     Безнең балалар бакчасында да театр көне узды. Тәрбияче балалар белән әңгәмә үткәрде: "Нинди театрлар була?", "Театрда үзеңне ничек тотарга", "Курчак театры булдыру тарихы". Балалар театр атрибутларын һәм әкият персонажларын кулланып, халык әкиятләре буенча драматизация уеннарын рәхәтләнеп уйнадылар. Театр артисты булу һәр балага да ошады.
     Театр мәктәпкәчә яшьтәгеләрнең сәләтләрен ача, эмоциональ яктан әзерли, балаларның үз-үзләренә ышанычын уята, халык алдында чыгыш ясау күнекмәләрен үзләштерергә ярдәм итә.

   Бүген балалар бакчасында Нәүрүз бәйрәме гөрләп узды. Нәүрүз – татар халкының иң матур йола бәйрәмнәреннән берсе, ул 21 мартта көн белән төн тигезләшкән көнгә туры килә. Бу бәйрәм безнең төбәкләрдә, язны каршылап, язгы чәчү эшләре алдыннан үткәрелә торган халык бәйрәме булып санала. Ул – дуслык, киң күңеллелек, кунакчыллыкны үз эченә ала. Нәүрүз – фарсыча “яңа көн” дигәнне аңлата, икенче төрле язгы Яңа ел, дип тә әйтәләр.

      Балалар бакчасы һәм мәктәп дәвамлылыгы планы нигезендә бүген әзерлек төркеме балалары Лашман урта гомуми белем бирү мәктәбендә "Үсеш ноктасы" кабинетында булдылар. Балалар алдында искиткеч мәктәп тормышының яңа дөньясы ачылды.
    Экскурсияне физика укытучысы Илһам Фәрит улы үткәрде. Ул “Үсеш ноктасы” белем бирү сыйфатын арттыруга шартлар тудыруын, укучыларның физика, химия, биология фәннәрен үзләштерү өчен мөмкинлекләрен арттыруын, табигый-фәнни һәм техник юнәлештә өстәмә белем алу мөмкинлекләре киңәйтелүен әйтеп үтте.

      Без Идел буе халкының бәйрәм-йолаларын һәрвакыт өйрәнәбез. 2024 елда Май чабу 11-17 мартка туры килә. Май чабу бәйрәме — бик борынгы заманнан сакланып килгән, көтеп алынган иң күңелле бәйрәмнәрнең берсе.Ул христиан динен тотучыларның Бөек пост башланыр алдыннан җиде көн, Пасхага кадәр җиде атна алдан билгеләп үтелә торган бәйрәм.         Бүген безнең балалар бакчасында да Май чабу бәйрәме күңелле генә үтеп китте. Балалар рәхәтләнеп күңел ачтылар, биеделәр, төрле уеннарда катнаштылар. Ә соңыннан коймак белән сыйландылар. 

  Хөрмәтле гүзәл хатын кызларыбыз, әниләр, дәү әниләр, апалар - сеңелләр, матур кызларыбыз! Үзегезне ихлас күңелдән ямьле язның беренче бәйрәме белән котлыйбыз!
   Яз — безнең тыйнак тормышыбызга яңа көч, дәрт, омтылыш, ышанычлар алып килә торган вакыт.
Яз сулышы гаиләгезгә муллык алып килсен, күңелләрегезгә сабырлык, барчагызга саулык китерсен.

   Бүген балалар бакчасында үзара дуслык хисләре тәрбияләү, әниләрне хөрмәтләү, алган белем һәм күнекмәләрне тормышта куллана белергә өйрәтү, кешеләр арасында үз-үзеңне культуралы тоту күнекмәләрен үстерү максатында "Ягез әле, кызлар!" уен-конкурсы узды. Бар яктан да килгән кызларыбыз сынатмады.
Афәрин, нәниләребез! Киләчәктә әти-әниләрегезнең таянычы, куанычы булыгыз

    5 нче март көнне балалар бакчалары арасында "Яшь мастер" (BebySkills) төбәкара чемпионатының муниципаль этабы булып узды. Безнең балалар бакчасында тәрбияләнүче Гатина Таңсылу "Пешекче" компетенциясе буенча 2 урынны алды.
Котлыйбыз, Таңсылу!!! Алга таба да зур уңышларга ирешергә насыйп булсын!