24 нче март көнне Арча стадионында 2007-1999 елгы һәм өлкәнрәкләр арасында Т.Зарипов истәлегенә чаңгы ярышы үтте. 1 км лы арада 2006-2007 нче елгы укучылар арасында мәктәбебезнең 6 нчы класс укучысы Бикбаева Алия 2 нче урынны алды. Яруллин Дәниф, Зәйнетдинов Илмир, Бакирова Диләрә дә әлеге ярышта уңышлы чыгыш ясадылар. (тренер – Минһаҗев М.В.) 

Укучыларыбыз музыка буенча Республика һәм Россиякүләм конкурсларда даими катнашалар һәм уңышлары белән сөендереп торалар. Март ае бәйгеләргә аеруча бай булды. Закирҗанов Кәрим мәшһүр җырчыбыз Әлфия Авзалова истәлегенә оештырылган "Дулкыннар 2018" республика бәйгесендә уңышлы чыгыш ясап диплом һәм кубок белән бүләкләнде (укытучысы Гайнуллин Б.М.) Уңышларыгыз белән котлыйбыз! 

26 нчы мартта 1 нче мәктәп базасында "Минем балачагым шигырьләре" район конкурсы узды. Конкурс балаларның иҗади сәләтләрен үстерү һәм оста шигырь сөйләүчеләрне барлау максатыннан оештырылды. Конкурста 3 нче сыйныф укучысы Гайнуллина Зөләйха Р. Миңнуллинның "Сезне дә чакырачакмын" шигырен оста башкарып II урынга лаек булды, 4 нче сыйныф укучысы Гарифуллин Галим "Юкка малай булганмын" шигырен сөйләп катнашучы сертификатына ия булды. Котлыйбыз!

Мәктәпләр арасында волейбол уеннары буенча көчле командаларны ачыклау һәм сәламәт тормыш рәвеше алып баруны пропагандалау максатыннан мәктәпләрдә волейбол ярышлары үтә. Бүген Урта Курса төп гомуми белем мәктәбендә үткәрелгән зона ярышында МБОУ "АСОШ №2", МБОУ "Сикертән  төп гомумбелем мәктәбе", МБОУ "Урта Курса төп гомумбелем мәктәбе" хатын -кызлар командалары көч сынашты. Финал ярышларында катнашу хокукын МБОУ "АСОШ №2" командасы яулады. Алдагы уеннарда да аларга уңышлар телибез!

Бүген мәктәптә ата-аналар җыелышы үтте. Ата-аналарны укыту-тәрбия эшләре буенча директор урынбасары Вәлиева Н.Т. 3 нче чирек йомгаклары, укучыларның конкурсларда ирешкән уңышлары белән таныштырды. 9 нчы класс җитәкчесе Гыймадиева Г.Н. "Хезмәт тәрбиясе һәм һөнәри юнәлеш бирү" темасына,  тәрбия эшләре буенча директор урынбасары Садриева Н.З. "24 нче март - туберкулезга каршы көрәш көне" уңаеннан чыгыш ясадылар. Мәктәп директоры Хәбибуллин Ф.М. укучыларның куркынычсызлыгын тәэмин итүгә, каникул вакытында укучыларның иминлеге өчен ата-аналарның җаваплы булуларына басым ясады. Җыелыш классларда дәвам итте.

Казанда көрәш буенча уздырылган Россия беренчелеге  ярышларында Татарстан данын яклап мәктәбебезнең 9 нчы класс укучысы Нурисламов Рәниф тә катнашты. Күптән түгел Татарстан беренчелегендә ул үз үлчәү авырлыгында 1 нче урынны яулаган иде инде. Бу юлы тагын да зур җиңү -  2002-2003 нче елгы егетләр арасында 75 кг га кадәрге үлчәү авырлыгында Рәниф Россия чемпионы булды ! (тренеры Әхмәдиев Марат Госман улы). Нурисламов Рәнифне һәм тренеры Марат Госман улын зур җиңүләре белән котлыйбыз!

Бүген Урта Курса авыл мәдәният йортында "Без бергә" фестиваленең зона этабы үтте. Бәйгегә Сеҗе, Сикертән, Курса Почмак, Урта Курса мәктәпләренең иң талантлы балалары җыелды. Нәни артистлар хореография, вокал, нәфис сүз номинацияләрендә чыгыш ясадылар. Афәрин!

Бүген мәктәптә "Авыл хатын-кызы" районкүләм бәйгесенә иҗат ителгән рәсемнәрдән күргәзмә оештырылды. Иң яхшы дип саналган эшләр район этабына җибәрелде.