Мәктәбебездә татар халкының традициясен, культурасын, гореф-гадәтләрен өйрәнүгә зур игътибар бирелә. Бу тема класс сәгатләрендә, әңгәмәләр вакытында тирәнтен карала.

1 октябрь - өлкәннәрне хөрмәтләү һәм ихтирам көне уңаеннан 1 нче сыйныф укучылары әби-бабайларын тәбрикләргә открытка ясадылар. "Үз кулларың белән ясалган бүләктән дә яхшысы юк", - диләр алар.

1991 елның 1 октябреннән башлап бөтен дөньяда Өлкәннәр көне билгеләп үтелә. Бу көнне бигрәк тә ялгыз әби-бабайлар, мөмкинлекләре чикләнгән өлкәннәр, тормыш шартлары начар булган олы кешеләр игътибар үзәгендә булырга тиеш. Аларның аздан да күңелләре була. Бу көнгә 6 нчы сыйныф укучылары күршеләрендә яшәүче әби-бабаларына бүләкләр ясадылар.

28 нче сентябрь көнне Арчаның 6 нчы номерлы мәктәбендә 2004-2005 нче елгы яшүсмерләр арасында көрәш ярышы узды. Мәктәбебезнең 9 нчы класс укучылары Закирҗанов Әлфис 60 кг , Вәлиев Илмир 45 кг кадәрге үлчәүдә 2 нче урынны яуладылар. (Тренерлары - Ахмадиев М.Г.) Егетләргә алдагы ярышларда да уңышлар телибез!

Сарай-Чокырча башлангыч мәктәбе укучылары җәй буе мәктәп бакчасында тырышып эшләделәр. Мәктәп бакчасы һәркемне үзенә җәлеп итеп торды. Менә хәзер бакчада көзге эшләр бара. Укучылар, кечкенә булсалар да, барлык эшләрдә дә актив катнашалар.

1 нче сыйныф укучылары "Китапка икенче тормыш бүләк ит! ("Подари книге вторую жизнь") акциясенә кушылдылар. Алар китапханәгә тапшырылган берничә китапны яңартуда катнаштылар.

Мәктәбебездә  «Тынычлык күгәрчене» акциясе булып узды. Бөтен дөньяда тынычлыкны саклау максатыннан уздырылган  әлеге акциядә   укучыларыбыз актив катнаштылар. Алар кәгазьдән күгәрченнәр ясадылар, кошларга  үзләренең теләкләрен яздылар, җир йөзенә тынычлык теләделәр.  Яшь буын тынычлыкның әһәмиятен яхшы аңлый. Күкләребез тыныч, гел аяз булсын!

Көз җитү белән бакчаларда көзге эшләр башланды. Бездә үзебезнең мәктәп яны участогында эшләп алдык.Җәй буе мәктәбебезне ямьләндереп торган чәчәкле бакчабызны көзге ялга әзерләдек.

21 нче сентябрь көнне Арчада 2007-2008 нче елгы малайлар арасында Республика күләм волейбол ярышы үтте. Арча данын яклап, безнең мәктәп укучылары 6 нчы һәм 7 нче сыйныф малайлары Гарифуллин Галим, Гатауллин Радик, Минһаҗев Камил, Ахунҗанов Айзат уйнады. Команда икенче урынга лаек булды.

Оча яфрак, уйный яфрак
Һаваларда әйләнеп.
Бүген, бүген, бүген, бүген
Яфракларның бәйрәме...
1 нче сыйныф укучылары көзге матурлыкны күзәтергә экскурсиягә чыкты.