26 март көнне Саба районы Шәмәрдән поселогында Бөек Җиңүнең 70 еллыгына багышланган стройда җырлана торган җырлар республика смотр конкурсы булып үтте. (республиканский смотр-конкурс строя и песни) Зона ярышларында  Питрәч, Биектау, Арча, Саба, Теләче, Балтач, Кукмара, Әтнә командалары көч сынашты. Конкурста Арча районы данын яклап Шушмабаш мәктәбе командасы катнашты (җитәкчесе-Гараев Рамил Камилевич). Безнең команда уңышлы чыгыш ясап 2 призлы урынны алды. Капитаннар арасында  узган ярышта команданың  капитаны Хадиев Илгиз 3 урынны яулады. Хәзер команда Казанда узачак ярышларга әзерләнә. Егетләребез һәм кызларыбызга уңышлар телибез!

         25 март көнне Шушмабаш мәктәбе базасында "Преобразование обучения в XXI веке: развитие культуры мышления"  темасына сингапур   укулары үтте. Укуларда Апаз, Ашытбаш, Носы, Хәсәншәех, Шушмабаш мәктәбе укытучылар коллективлары катнашты. Тренерлар критик фикерләүнең принципларын аңлаттылар, сигез фикерләү тибын сингапур структуралары ярдәмендә күрсәттеләр,фикерләү культурасы асылына төшендерделәр. Эшлекле аралашу, эчтәлекле  презентацияләр, тренерларның материалны оста , аңлаешлы , кызыксындыра торган  итеп бирүләре сингапур укуларының сизелмичә дә үтеп китүенә сәбәп булды. Барлык тренерларга зур рәхмәтебезне җиткерәбез! 

23 мартта Түбән Мәтәскә мәктәбендә   «Яшь кулибинчы-2015» республика конференциясе үткәрелде. Конференцияне оештыручылар булып  Татарстан республикасы уйлап табучылар, рационализаторлар җәмгыяте һәм “Мәгариф” журналы тора. Конференция 3 бүлектән торды: яшь эзләнүчеләрнең техника өлкәсендәге ачышларыннан төзелгән күргәзмә; тәҗрибә уртаклашу, фикер алышу өлеше; галимнәр катнашында оештырылган осталык дәресләре.  Конференция кунаклары һә оештыручылар: Татарстан уйлап табучылар һәм рационализаторлар җәмгыяте президенты ӘЮПОВ Мөхәммәт Йосыф улы, Казан дәүләт энергетика университеты доценты, Татарстанның атказанган уйлап табучысы, техник фәннәр кандидаты, шагыйрь, «Яшь кулибинчы-2015» конкурсының жюри рәисе НУРУЛЛИН Ринат Гали улы, Казан федераль университеты профессоры, тарих фәннәре докторы, археолог, Татарстанның атказанган фән эшлеклесе ХУҖИН Фаяз Шәриф улы, «Сүз» нәшриятенең баш мөхәррире, эзтабар-язучы, Татарстанның атказанган мәдәният хезмәткәре, Россия хәрби-тарихи фәннәр академиясенең һәм Петр I исемендәге Фән һәм сәнгать академиясенең мөхбир-әгъзасы МОСТАФИН Шаһинур Сафа улы, «Мәгариф» журналының бүлек мөхәррире САБИРҖАНОВ Таһир Әюп улы.

Бу конференциядә безнең мәктәп укучысы Каримов Камил катнашты һәм өченче призлы урынга лаек булды. Кул сәгате белән бүләкләнде. Җитәкчесе-физика укытучысы Р.Р.Нуриева. Аларны чын күңелдән уңышлары белән котлыйбыз! 

Шушмабаш-Шекә мәктәбе башлангыч укучылары Кырлайга “Нәүрүз” бәйрәменә кунакка барып кайттылар. Бәйрәмдә әкият геройлары катнашты.Төрле халык әкиятләреннән өзекләр куеп, килгән тамашачыларны сәламләделәр. Укучылар белән берлектә уеннар уйнадылар.Карачкы ясау буенча мастер класс үткәрделәр.Һәрбер катнашучы үзенең куллары белән ясаган карачкыны утта яндырды.Карга боткасыннан авыз иттеләр.Мероприятиенең ахыры музей карау белән тәмамланды. Укучылар өчен күңелле чара узды, алар бәйрәмнән күтәренке күңел белән кайттылар.

21 март – Халыкара Урман көне. БМО инициативасы белән 1971 елда билгеләнә. Әлеге датаның төп максаты планетабыз халкын урман экосистемаларының әһәмияте, аларны саклау, урман мәйданнарын арттыру,торгызу кирәклеге турында таныштыру. Урман мәйданнарының кимүе, деградациясе – халыкара проблемага әверелде. Аны чишү дөньяның барлык илләре бердәм эш иткәндә генә булачак. Сүзсез урманнарның бетүе халык санының артуы белән дә тарихи бәйле. Урман территорияләре һәртөрле хуҗалык эшчәнлеге өчен уңайлы итеп үзгәртеләләр. Шулай ук янгыннар, корткыч бөҗәкләр, авырулар, уңайсыз табигать шартлары һәм башка сәбәпләр дә аларның мәйданнарын киметә. Ә нәтиҗә нинди соң? Һичшиксез глобаль дәрәҗәдәге проблемалар: туфрак эрозиясе, үсемлек һәм хайваннар күптөрлелеге кимү, су бассейннары үзгәреше, атмосферада углекислый газ артуы, яхшы үзагачның кимүе һәм ахыр чиктә кешелекнең тереклек потенциалы азаю. Укучыларыбызның шушы юнәлештә белемнәрен тагын да тулылындыру максатыннан “Урман дәресләре” үтте. 5-7 классларда – “Урман яшәеш” чыганагы дип аталган беседа үткәрелде. Биология –география укытучысы Х.Рузиля Рафиковна Россиядә урман зоналары турында презентациягә нигезләнеп информация биргәннән соң, урманнның әһәмияте турында укучылар белән эчтәлекле әңгәмә алып барды. “Урман Адәм баласына эшләргә көч-куәт биргән, аңа үзенең байлыгын бүләк иткән, гомер буена хезмәт кылган сихри урманнан башка тормышыбызны күз алдына китерүе кыен. Агачлар кадерле, яшәү өчен бик тә кирәкле . Мәсәлән, агачтан ясалган тараклар чәчне үстерә һәм нерв системасына уңай тәэсир итә. Баш авыртканда усактан ясалган ятакта ятарга кирәк. Үлән белән дәвалаучылар, усак энергияне ала да бирә, дип исәпли. Чыршы энәләренә ятсаң, ул арганлыкны бетерә. Бармакларыгызны нарат күркәләре арасына тыгып, бер генә минут тотып карагыз әле, шунда ук үзегездәге начар хисләрнең китә баруын сизәрсез” һәм тагын күп мәгълүматлар укучыларны һичшиксез кызыксындырды.

11 класс укучылары атна дәвамында мәктәпкүләм дежур тордылар. Һәрвакыттагыча гөлләрне дә игътибарсыз калдырмадылар.Күп еллар дәвамында биология укытучылары Рузилә Рафиковна белән берлектә гөлләрне яратып карадылар. Рәхмәт аларга. 

     Атна дәвамында 11 класс укучылары соңгы тапкыр мәктәпкүләм  дежур тордылар. Мәктәбебез директоры Рәзилә Габделнуровна  өченче чирекне йомгаклау линейкасында укучыларга бу мәсьәләдәге фикерләрегезне башкаларга  да җиткерегез диеп, сүз бирде. Укучыларның : "Мәктәпне саклагыз,безнең кебек матур булыгыз" һ.б.шундый фикерләре тыңланды. Укыту - тәрбия завучы Чулпан Миннуловна тулы отчетлар язып, эчтәлекле матур "Яшен" чыгарып дежурлыкка йомгак ясый торган класс булдыгыз, диеп мактады. Киләчәктә уңышлар сезгә, укучылар!