24, 25 март көннәрендә Яр Чаллы шәһәрендә "Класс җитәкчесе-2017" конкурсының йомгаклау этабы  булды. Конкурста безнең мәктәпнең 6 класс җитәкчесе Файзрахманова Г.И. уңышлы чыгыш ясады һәм финалист дипломы белән бүләкләнде.   Гөлназ Ильясовнаны шушы зур җиңүе белән чын күңелебездән котлыйбыз!   Иҗади потенциал , саулык- сәламәтлек, күңел тынычылыгы, уңышлар телибез!!!   Гөлназ Ильясовна, без Сезнең белән горурланабыз!!! 

18 март көнне Шушмабаш урта мәктәбендә РТ экономика министрлыгының Арча зонасы бүлекчәсе “Эшмәкәрлеккә ярдәм итү” үзәге, Шушмабаш урта мәктәбе, Шушмабаш авыл җирлеге һәм “Северный” авыл хуҗалыгы предприятисе тарафыннан очрашу үткәрелде.Ул яшьләрне авылда калдыру һәм аларга үз эшләрен ачып җибәрүне аңлату максатыннан оештырылды. Анда Шушмабаш авыл җирлегендә яшәүче укучылар, эшмәкәрләр, яшьләр катнашты. Җыелышны районның “Эшмәкәрлеккә ярдәм итү” үзәге җитәкчесе Сафиуллина Лилия Рафаилевна ачты. Ул эшмәкәрләр өчен дәүләт булыша торган программалар, кечкенә займнар турында аңлатты. Ул яшьләрне үз эшләрен башлап җибәрүдән курыкмаска, дәүләтнең һәрвакыт аларга ярдәм итәчәген искәртте. “Северный” АХП нән кадрлар бүлеге җитәкчесе Кәримова Л. Р. сөйләде. Ул килешү төзеп авыл хуҗалыгы өлкәсе буенча укыган яшь белгечләргә ай саен ун меңгә кадәр өстәмә стипендия биреп барылуын, шушы өлкәдә эшләгән яшь семьяларга йорт җиткергәндә АХП ның акчалата булышуын җиткерде.Үзләренең язмышын авыл хуҗалыгы белән бәйләргә теләге булган укучылар өчен өстенлекле программа турында аңлатты. Мондый укучылар белән АХП арасында килешүне бүген үк төзү мөмкинлеге бар. Шушмабаш авыл җирлеге рәисе Сәгыйтов В. В. җирлектә яшәп, үз эшләрен башлаучылар белән таныштырды.Сүзне камыр ризыклары пешерү цехы җитәкчесе Вәлиева Н.Г. дәвам итте. Ул бүгенге көндәге уңышлары, бу юнәлешнең нечкәлекләре турында сөйләде. Эшмәкәр Камалов А. И. йөк ташу белән шөгыльләнә башлаган. Ул бу юнәлешкә әле яңа гына кереп киткән, лизинг системасы буенча йөк машиналары алып, кулланучыларга хезмәт күрсәтә. Эшмәкәрләр яшьләргә үз киңәшләрен бирделәр. Укучылар, авыл яшьләре үзләрен кызыксындырган сорауларга җаваплар алдылар. Килгән һәр кеше бу очрашудан бик канәгать калды.

18 нче мартта Шушмабаш авылы мәдәният йортында 2000 нче елгы егетләр һәм аннан яшьрәкләр арасында “Северный” күмәк хуҗалыгы җитәкчесе призына татарча көрәш буенча Арча районы беренчелеге узды.Бу ярышларда районыбызнын 19 мәктәбеннән һәм Арча педагогия көллиятеннән 142 яшь көрәшче катнашты. Ярышлар 10 үлчәү категориясендә үтте.Безнең мәктәп командасы 1 урын яуладылар.

Хөрмәтле коллегабыз Чулпан Миннуловнаны искитмәле ЗУР җиңүе белән чын күңелебездән кайнар КОТЛЫЙБЫЗ. Бөтенроссия ЕЛ УКЫТУЧЫСЫ - 2017 конкурсының региональ этабында коллегабыз үзен чын профессинал, иҗади эшләүче, эзләнүчән, талантлы шәхес булуын күрсәтте.Таләпчән, мәртәбәле жюри алдында конкурсның  һәр биремен үзенчәлекле әзерләп, бик матур чыгышлар ясады. Укытучының һәрьяклы үсешен өйрәнү һәм сынау өчен бирелгән  биремнәрне методик яктан иҗади төрләндереп, замана сулышы өреп, үз практикасына нигезләнеп республикабыздагы коллегалары белән уртаклашты. Һәм мәктәбебезгә, районыбызга үз хезмәтенең лаеклы,күркәм нәтиҗәсе белән куанып кайтты.Бүгенге көндә коллегабыз конкурсантлар арасында бик матур баллар җыеп "Иң яхшы эссе номинациясе" иясе. Без коллегабыз белән горурланып аңа сәламәтлек, тормыш иминлеге, яңадан - яңа уңышлар телибез.

17 март көнне Разил Вәлиевның тормыш һәм иҗат юлына багышланган Республикакүләм "Дулкыннар" бәйгесенең гала концертында 3 класс  укучысы Хәлиуллин Ислам  нәфис сүз номинациясендә  I урынга  лаек булды. 4 класс укучысы Кәримов  Таһир Гран-при иясе булды һәм  мәктәбебезгә әлеге бәйгенең кубогын алып кайтты. Афәрин!

5 класста III чирек йомгаклары белән таныштыру, каникулга киткәндә куркынычсызлык кагыйдәләрен аңлатып  куллар куйдыртып укучыларны имин каникулларга озатуга багышланган ата - аналар җыелышы булды. Җыелышның көн тәртибендә классның мәктәп тормышындагы чараларда активлыгы,  укучыларның  тәртипләре, үзләрен дөрес тоту мәсьәләләре, дәрескә әзерлекләрнең торышы, аерым фәннәрдән белем алуга адаптацияләре турында сөйләнде. Җыелышта 5 класс укучыларын укыткан - укытучылар да катнашты: Гөлназ Ильясовна (рус теле), Эльвира Альбертовна (татар теле һәм әдәбияты), Рамил Шәрифуллович (математика). Класс җитәкчесе Рузиля Рафиковна әти- әниләрнең мәктәп тормышы белән кызыксынып, балаларны тәрбияләүне ныклы элемтәләрдә торып дәвам итү кирәклеген тәкъдим итте.

Бүген 7 класс укучыларының ата-аналар җыелышы булып узды.Җыелышта балаларның укулары,якынча чирек билгеләре белән таныштыру булды.Шулай ук куркынычсызлык кагыйдәләре аңлатылды һәм куллар куйдырылды

Татарстанның халык шагыйре Разил Вәлиевнең тормыш һәм иҗат юлына багышланган Республикакүләм "Дулкыннар" бәйгесендә мәктәбебездән 6 укучы уңышлы чыгыш ясап кайтты. 17 март көнне Кәримов Таһир һәм Хәлиуллин Ислам Халыкара Дуслык Йортында гала-концертта катнашачак. Афәрин!

Бүген башлангыч класс укучыларының ата-аналар җыелышы булды. "Укучыларның уку эшчәнлегендә әти-әниләрнең роле" дигән темага доклад тыңланды. Язгы каникул чорына куркынычсызлык кагыйдәләре аңлатылды, әти-әниләрнең кулларына памяткалар  тапшырылды. Җыелыш классларда дәвам итте.