Яңа ел! Бу сүзләрне ишетүгә безнең күз алдыбызга хуш исле зифа чыршы, ап-ак кар бөртекләре, җемелдәвек сихри утлар килеп баса.Яңа ел диюгә – уен-көлке, җыр-бию, Кыш бабай, Кар кызы күз алдына килә.
Өр-яңа ел килә, өр-яңа.
Чынлап яңа булсын ул.
Кояш кебек, һәммә кешегә дә
Тигез көлеп торсын ул.
Күз яшьләре онытылып торсын,
Артка чиксен кайгы-борчулар.
Элеккечә утлар янып торсын,
Балкып торсын шулай чыршылар.
    Менә шундый сүзләр белән бәйрәм башланып китте. Укучылар чыгышын килгән кунаклар бик җылы кабул итте. Яңа еллар бәхет-шатлык кына китерсен! 

    Мәктәбебез ишегалды сихри әкият дөньясына күмелде. Һәр иртәне укучыларны төрле төстәге утлар, кыш бабай, кар кызы , әкият геройлары каршы ала. Дәресләрдән соң укучылар бәйрәмгә әзерләнәләр,яңа җырлар, биюләр өйрәнәләр. 

    Республикакүләм "IT-Чемпион" 2018 бәйгесенең беренче этабы тәмам. "Дружный класс" ("Иң дус класс") номинациясендә мәктәбебезнең 3нче классы (җитәкчесе Ибраһимова Р.Ә.) саллы гына баллар җыеп җиңүчеләр исемлегендә. Афәрин, котлыйбыз! Һәрчак шулай актив гражданлык позициясендә булыгыз...

    Район күләмендә уздырылган "Минем яраткан әнием" рәсем конкурсында 3 нче сыйныф укучысы Минһаҗева З.А. беренче урынга лаек булды. Афәрин, Зәлинә! Киләчәктә дә уңышлар сиңа.

    12 декабрьдә Россия Федерациясенең күпмилләтле халкы илебез тарихында иң мөһим дәүләт бәйрәмнәренең берсе - Конституция көнен билгеләп үтә. Бүген, тәрбия сәгатендә, 8 – 9 нчы сыйныф укучылары арасында, аларның белемнәрен гомумиләштерү максатыннан, “Россия Федерациясе Конституциясе көне” дип исемләнгән интеллектуаль уен оештырылды. Алар ике командага бүленеп, көчләрен сынаштылар. Нәтиҗәдә, 8 нче сыйныфлар, күбрәк балл җыйнап, җиңүгә иреште. 

    12 декабрь - Россия Федерациясе Конституциясе көне.
    Конституция көне Россиядәге иң мөһим бәйрәмнәрнең берсе булып санала һәм ел саен 12 декабрендә билгеләп үтелә. 1993 елның 12 декабрендә кабул ителгән Төп закон Кешене, аның гражданлык хокукларын һәм демократик ирекләрен иң зур хәзинә дип игълан итте. Конституция Россиянең, социаль дәүләт буларак, федератив корылышы нигезләрен законнар белән ныгытты, аның прогрессив үсешенең хокукый нигезен булдырды, җәмгыять үсешенең яңа сәхифәсен ачты, гражданнар арасында татулыкны һәм үзара аңлашуны саклап калу өчен ныклы терәк булды. Узган еллар дәвамында дәүләт хакимиятенең какшамас демократия нигезләрен гарантияли торган тотрыклы конституция системасы барлыкка килде.
    Шушы дата уңаеннан, мәктәбебездә клуб, китапханә мөдирләре класстан тыш чара үткәрделәр.Алар балаларны Конституция төшенчәсе, тарихы, балаларның хокуклары һәм бурычлары белән таныштырдылар. 

    Мәктәбебезнең башлангыч сыйныф укытучысы Шәяхмәтова Р.Ф. районда уздырылган “Ел укытучысы” конкурсының зона этабында катнашты. Ул 4 нче сыйныф укучыларына туган тел фәненнән ачык дәрес бирде, шул ук сыйныфта “Кем миллионер булырга тели?” дигән дәрестән тыш чара үткәрде. Коллегабызга уңышлар телибез!

    «Г.Камал исемендәге Сикертән төп гомуми белем мәктәбе»ндә IV Районара Мөхәммәт Мәһдиев укулары узды. Бу чараның максаты Мөхәммәт Мәһдиев иҗатын тирәнтен өйрәнү, пропагандалау; укучыларда фәнни-тикшеренү күнекмәләре формалаштыру; халкыбызның тарихы, мәдәнияте, милли үзенчәлекләре белән кызыксындыру тудыру; укучыларда әдәби иҗатка омтылыш тәрбияләү иде. Безнең мәктәп укучылары Бикчәнтәев Р. һәм Хәбибуллина И. “М.Мәһдиев әсәрләрен беләсеңме?” һәм "Туган як – кадерле төбәк” юнәлешләрендә катнашып, үз номинацияләрендә призлы икенче урын алып кайттылар. Фәнни җитәкчеләре: Әюпова Р.Ф. Без алар белән горурланабыз һәм киләчәктә дә уңышлар телибез!

    Һәр елны 3 декабрь – Халыкара инвалидлар көне буларак билгеләп үтелә. Тумыштан инвалид булып, дөньяның рәхәтен күрми үскән балалар, һәлакәткә дучар булып, яшьнәп яшәр чакта урын өстенә, инвалид коляскасына беркетелгән кешеләр...
    «Ачның хәлен тук белми» дигәндәй гарип кешенең җан сыкрануын сәламәт кеше ишетеп, аңлап җиткерми дә кебек. Тик ишетергә, аңларга тырышырга кирәк, бик кирәк. Язмыш тарафыннан кимсетелгәннәргә ярдәм кулын сузарга беркайчан да соң түгел. Кыйммәтле даруларга, катлаулы дәвалану чараларына һәм, иң мөһиме, безнең җылы карашка, таянычыбызга мохтаҗ кешеләр барлыгын онытмасак иде.
    Бүген, инвалидлар декадасы уңаеннан, башлангыч сыйныф укучылары белән, “Шәфкатьлелек бизи кешене” дигән темага тәрбия сәгате үтте. Кече яшьтәге мәктәп укучыларына инвалидлар кемнәр булуы, аларга ничек итеп ярдәм күрсәтергә мөмкин икәнлеге турында сөйләшенде.

    Янәшәбездәге болай да үзләрен кимсетеп тойган дусларыбызга игътибарлырак булыйк, хәлләрен аңларга, күңел авазларын ишетергә тырышыйк, авыр тормышларына – терәк, сырхауларына – шифа, кайгы-хәсрәтләрендә юаныч булыйк!