Бакчабызга бүген башлангыч укытучылары кунакка килделәр. Аларга тәрбияче Р.Х. Әгъләмова уртанчылар төркеме белән "Яз килә" танып белү эшчәнлеге; тәрбияче Л.Х. Султанова уртанчылар төркеме белән "В гостях у курочки Рябы" рус теле эшчәнлеге; тәрбияче Л.В. Мирзасалихова мәктәпкә әзерлек төркеме белән "Тамчы - шоу" грамотага өйрәтү уен-шөгыле күрсәттеләр. Укытучылар эшчәнлекләрне бик ошатты, балаларның белемнәрен яхшы яктан бәяләделәр.

Бүген бакчада "Бакчада һәм гаиләдә балаларны тормыш иминлеге кагыйдәләренә өйрәтү" дигән темага гомуми ата-аналар җыелышы булды. Җыелышта тәрбиячеләр Л.Р. Максутованың "Балаларны яратыйк, саклыйк һәм өйрәтик", Л.Х. Султанованың "Балалар имин үссен" дигән чыгышлары, шәфкать туташы Р.Р. Ильясованың язгы авитаминоз турында чыгышы тыңлынды. Ата-аналар тәрбиячеләр Ф.У. Закирова һәм Р.Х. Аглямова әзерләгән сорауларга җавап эзләделәр. Җыелышны төгәлләп, бакча мөдире Г.Р. Сарварова балаларның иминлеген саклау барыбызның да уртак бурычы икәнен ассызыклады.

Бүген уртанчы-икенче кечкенәләр төркемендә "Иң якын кеше - әни" дип исемләнгән әниләр бәйрәме иртәсе үтте. Әниләр, дәү әниләр бәйрәмдә бик актив катнаштылар. Әниләребез тозлы камырдан татар халык ашлары конурсында да бик теләп катнаштылар, аларга бик зур рәхмәт.

Дөнья ямьле булсын өчен әни кирәк,

Гөлләр чәчәк атсын өчен әни кирәк,

Бәхет-шатлык артсын өчен әни кирәк.

Иң кадерле кеше җирдә - Әни димәк! 

Бүген мәктәпкә әзерлек төркеме балалары Һәм ата-аналары "Безнең гаилә - тату гаилә" дип аталган гаилә бәйрәменә җыелдылар. Бәйрәмгә ЮХИДИ фонды директоры Р.З. Сәетова да чакырулы иде. Бәйрәмдә гаилә, әти-әнинең кадере төшенчәләре белән беррәттән балаларның юл йөрү кагыйдәләре буенча белемнәре баетылды, ныгытылды. Балалар төрле сорауларга җавап бирделәр, уеннар уйнадылар, Сәләвигә юл билгеләре төзергә булыштылар. Әти-әниләргә дә биремнәр җитәрлек булды.

Хөрмәтле Яңа Әлем балалар бакчасы хезмәткәрләре!
Көннең яктылыгы кояшта, күкнең матурлыгы йолдызларда, җир йөзенең гүзәллеге хатын-кызларда. Сезне шул җир йөзен бизәгән халыкара хатын-кызлар көне белән тәбриклибез!
Шушы бәйрәм көне, елмаеп баккан кояш матурлыгын, табигатьнең самимилеген өстәп, күңелегезгә шатлык, тәнегезгә сихәтлек, өегезгә иминлек алып килсен. Бәйрәм белән сезне!

Бүген бакчабызның ясле төркемендә "Курчак белән уйныйбыз" дип аталган күңел ачу - гаилә бәйрәме узды. Бәйрәмгә әти-әниләр чакырылган иде. Бәйрәмнең максаты - балалаларны әти-әнинең, гаиләнең кадерен белергә, әти-әнине тыңларга, әти-әни хакын хыкларга кирәклеген уеннар аша төшендерү. Бәйрәмдә әти-әниләргә төрле сораулар, биремнәр бирелде. Ахырда балалар әти-әниләренә үзләре ясаган бүләкләрне тапшырдылар.

Бүген уртанчы-зурлар төркемендә бала белән ата-ана арасында мәхәббәт, әти-әниләргә карата ихтирам хисләре тәрбияләү, бакча белән гаилә хезмәттәшлеген ныгыту максатыннан гаилә бәйрәме үткәрелде. Балалар әти-әниләренә багышлап шигырьләр сөйләделәр, җыр-биюләр башкардылар. Бәйрәмнең икенче өлешендә гаиләләр арасында конкурслар, уеннар уйнатылды.

Бу дөньяда ничек яшәсәк тә

Агымсудай вакыт тиз үтә.

Уфтанмаслык булсын сезнең гомер,

Татулыкка өйдә ни җитә!

Бүген Актаныш муниципаль районы 6нчы санлы балалар бакчасында "Ел тәрбиячесе - 2016" бәйгесе булды. Бу бәйгедә Яңа Әлем балалар бакчасыннан мәктәпкә әзерлек төркеме тәрбиячесе Закирова Фирүзә Өлфәт кызы катнашты. Комиссия әгъзаларына мәктәпкә әзерлек төркеме балалары белән "Тылсымлы кабырчыклар" дигән танып белү, аралашу, сөйләм, нәфис-нәфасәти өлкәләрне берләштергән эшчәнлек күрсәтте.

Бүген уртанчы - икенче кечкенәләр төркемендә балаларда патриотик хисләр, әтиләре, абыйлары белән горурлану тәрбияләү, Ватанны саклаучылар турында күзаллауларын киңәйтү, аларның мөһимлеген аңлату, әти белән бала арасындагы элемтәне ныгыту, балаларның иҗади мөмкинлекләрен үстерү максатыннан әтиләр бәйрәме үткәрелде. Уеннарда, биремнәрдә барлык әтиләр дә актив катнашты.

Ватанны саклаучылар көне уңаеннан уртанчы - икенче кечкенәләр төркеме этиләре һәм балалары арасында "Мавыктыргыч уенчыклар" кул эшләре һәм "Минем әти" рәсем күргәзмәсе оештырылды. Барлык катнашкан әтиләргә дә зур рәхмәт!