Актанышта Бөек Җиңүнең 80 еллыгын билгеләп үтүче тантанада гимназиябез укытучылары, укучылар, ата-аналар, дәү әти-дәү әниләр - һәммәбез бер гаилә булып катнаштык.
Бәйрәмнең театральләшкән тамашасында гимназиябезнең җырчы, биюче укучылары да катнашты. Укытучыларыбыз мәйдан уртасында "Җиңү җырын җырлый Актаныш" хор бәйгесендә җиңгән җырларны башкарды.
Өлкән сыйныф укучылары хәрби формадан киенеп, Җиңү парадына басты.
Бәйрәм тантанасы Җиңү паркында Бөек Ватан сугышында һәлак булганнар истәлегенә куелган һәйкәлгә венок салу һәм алар истәлегенә бер минут тынлык белән дәвам итте.
Гимназиябез директоры Венера Хәмәтнәсыйх кызы Хәева-Хәмәтҗанова, аның тәрбия эшләре буенча урынбасары Ленар Зөфәк улы Шәвәлиев батырлар истәлегенә һәйкәлгә чәчкәләр салды.

КОТЛЫЙБЫЗ!
Ватанны саклау һәм иминлек нигезләре фәненнән республика олимпиадасында катнашып, гимназиябезнең 4Б сыйныф укучысы Габделгалиева Камилә призер булды!
Укытучысы Светлана Риф кызы Шәйхуллина.

КОТЛЫЙБЫЗ!
Төрек теле буенча "Олимпка юл" республика олимпиадасында катнашып, гимназиябезнең 9А сыйныф укучылары Ильясова Энҗе һәм Харисова Гүзәл призер булдылар!
Укытучылары Румия Данис кызы Темел.
Афәрин, Энҗе, Гүзәл!

Гимназиянең 11 сыйныф укучысы Минһаҗева Нурзилә татар теленнән Төньяк-Көнчыгыш федераль олимпиадасында җиңүче булды. Әлеге җиңү югары уку йортына кергәндә Нурзиләнең профиль имтиханнарына 100 балл өстәү мөмкинлеге бирә.
Укытучысы - татар теле һәм әдәбияты укытучысы Шәрипова Чулпан Рәмзил кызы.

Гимназиябезнең 8А-8В-8Г сыйныф укучылары, Туган тел көне һәм татар халкының бөек шагыйре Габдулла Тукайның туган көне уңаеннан, Казан шәһәренә экскурсиягә бардылар.
Казанның Яңа Татар бистәсе зиратында татар халкының бөек шагыйре Габдулла Тукай каберенә чәчәкләр салдылар. Иске Татар бистәсе һәм Яңа Татар бистәсендә экскурсиядә булдылар. Кабан күле буенда урнашкан Камал театрының яңа бинасында да булырга өлгерде алар!

Гимназиябез укучылары якташыбыз: йөгерү буенча Россия һәм Татарстанның спорт мастеры -
дөнья чемпионы Фирая Солтанова- Жданованың күчмә Кубогына узучы җиңел атлетика ярышларында катнашты.

19 апрель көнне укучыларыбыз Флүс Латыйфи исемендәге "Сәләткә нур булган йолдызлар" ачык әдәби конкурсында катнаштылар. Конкурсның максаты - талантлы яшь авторларның татар әдәбияты өлкәсендәге иҗади потенциалын үстерүдә булышлык күрсәтү. Нәтиҗәләребез куанычлы: "Шигърият" номинациясендә Ильясова Энҗе - Гран-при, "Шигърият" номинациясендә Шакирова Резеда 3 урын, "Балалар әдәбияты" номинациясендә Гиздатуллин Мансур 3 урын, "Мин горурланам" номинациясендә Шәрипова Сөмбел 3 урын, "Публицистика" номинациясендә Шакирова Илзия 2 урын, "Мин горурланам" номинациясендә Мөхәмәтов Йосыф 1 урын яуладылар. Шакирҗанова Сафия бәйгенең финалисты. Укытучылары Шәрипова Чулпан Рәмзил кызы, Муллаярова Сөмәя Тәлгат кызы, Шакирова Әлфирә Индус кызы.

14 апрельдән алып 17 апрельгә кадәр Казанда татар теле һәм татар әдәбиятыннан Халыкара олимпиада узды. Биредә Казахстан, Төркия, Кыргызстан, Әзербәйҗан һәм Россиянең 28 регионыннан 500 укучы катнашып, көч сынашты. Халыкара олимпиада үз эченә татар теленнән һәм әдәбияттан язмача биремнәр үтәүне, телдән җаваплар әзерләүне, халкыбызны данлаган шәхесләр турында проект яклауны үз эченә ала. Әлеге дәрәҗәле олимпиадада гимназиябезнең 10 сыйныф укучысы Шакирова Лиана җиңүче булып танылды. Укытучысы Шәрипова Чулпан Рәмзил кызы. Афәрин, Лиана!

"Алга! Поехали!" - лаеклы җиңү!

Гимназиябезнең 9Б сыйныф укучылары "Быть в Движении" номинациясендә "Алга! Поехали!" республика премиясе лауреатлары булдылар!
8-10 класс укучылары бәйрәмдә, хореограф Миләүшә Робсон кызы Солтанова җитәкчелегендә, "Омтылыш" биюе белән чыгыш ясадылар!