Мәктәптә хәрби-патриотик айлык кысаларында троеборье буенча ярышлар булып узды. Әлеге ярышны ТИН укытучысы Шайхуллин Р.Г. үткәрде.

   Бүген 4 класс укучылары үз белемнәрен тестирование аша сынап карадылар. Математика һәм татар теленнән килгән биремнәрне укучылар 2 дәреслек вакыт аралыгында башкарырга тиеш булдылар. Башкарылган эшләр конвертларга салынып мәгариф идарәсенә җибәрелде. Без исә эшләнгән эшләрнең нәтиҗәләре яхшы булуга өметләнеп, иртәгә буласы тагын 2 фәннән, рус теле һәм әйләнә-тирә дөньядан укчыларга уңышлар теләп калабыз!

  Бүгенгесе көнне мәктәп эчендә булып узган берничә яңалыкны билгеләп узарга мөмкин. Гомуми линейкада узган атнада булып узган конкурс һәм ярышларның җиңүчеләрен котлап уздылар, аларга грамота, дипломнар тапшырылды. 5,6,8 классларда ата-аналар җыелышлары булып узды. Җыелышларның төп темасы әлбәттә-уку. Шунлыктан анда катнашкан укытучылар әти-әниләгә үз тәкъдим-фикерләрен җиткерделәр. Төштән соң волейбол секциясе эшләде, класслар Аҗаган уенына әзерлек эшләре алып барды. Менә шундый яңалыклар белән узды бу көн!

   Бүген мәктәп беренчелегенә чаңгы буенча ярышлар булып узды. Дәресләрне кыскартып укыганнан соң, барлык коллектив чаңгы ярышлары буласы трассага җыйналды. Көч сынашу 3 этапта узды: башлангычлар, урта буын һәм югары як класслар. Кызлар чабасы дистанция кыскарак булса да, егетләргә шактый тир һәм көч түгеп чабышырга туры килде. Һәм менә алар мәктәп чемпионнары: кызлардан-

   Гайнутдинова Энҗе - 7 класс

   Гайнуллина Илүзә - 10 класс

егетләрдән-

Габидуллин Рәмис - 7 класс

Гайнуллин Нияз - 9 класс укучылары.  Спорт бәйрәмендә катнашкан барлык укучыларны да яхшы, югары нәтиҗәләре белән котлыйбыз. Ярышны оештыручы физик тәрбия укытучысы Шайхуллин Р.Г. ка рәхмәтләребезне җиткерәбез!

   Бүген мәктәбебезнең 3 укучысы районыбызның Карагуҗа урта мәктәбендә булып узган III республика фәнни-тикшеренү эшләре конкурсында катнашып кайтты. Шуны әйтергә кирәк, безнең укучылар әлеге бәйгедә өченче ел рәттән уңышлы гына чыгыш ясап киләләр. Быелгысы да искәрмә түгел. Укучыларыбызның һәрберсе бик тә уңышлы чыгышлар ясады һәм нәтиҗәләре дә югары. Шулай итеп:

Шигабутдинов Алмаз (9 класс укучысы)- 2 урын (җитәкчесе Максумов М.М.)

Бикмуллин Рәсим (9 класс) - 3 урын (җитәкчесе Гатиятуллин М.Г.)

Гайнуллин Нияз (9 класс) - 3 урын (җитәкчесе Шакиров Р.Ф.)

  Афәрин егетләр! Егетләргә һәм аларны әлеге бәйгегә  әзерләгән укытучыларыбызга зур рәхмәтебезне җиткерәбез!

"Туризм һәм экология" түгәрәгенә йөрүче укучылар Буа елгасына чаңгы походы оештырдылар. Алар вакытларын чаңгы шууга гына түгел, ә елгага килеп урнашып яши башлаган кондызларны (боберлар) өйрәнүгә дә багышладылар. 3 сәгатькә якын барган сәяхәт рәхәт тә, файдалы да булды.

  2013 ел Татарстанда Һәм Россиядә әйләнә-тирә мохитне саклау елы буларак игълан ителде. Шунлыктан һәр дүшәмбедә узучы укучыларның гомуми линейкасында бу елны официаль рәвештә тәкъдим  итү булды һәм шул уңайдан табигатебезне саклауга юнәлдерелгән төрле чараларга старт бирелде.

Мәктәптә чисталык дәресләре булып узды. Дәреснең төп темасы башлангычларда "Без - табигать дуслары" булса, урта һәм югары якта "ТР да махсус сак астында булган табигать объектлары". Дәресләр укучыларга файдалы булгандыр дип ышанып каласы килә. 

 Табигатьтә  кышның иң матур вакытлары бара. Дәрестән тыш вакытта укучыларның яраткан шөгыльләреннән берсе чаңгы шуу. Салкыннар булу сәбәпле Яңа елга кадәр бик үк шуып булмаса да, бүгенгесе көннәрдә чаңгы шуар өчен бк матур көннәр урнашты җиһанда. Мәктәптә эшләп килүче "Яшь туристлар" түгәрәгенә йөрүче егетләр бүген табигатькә чаңгы походы ясады. Рәхәтләнеп таудан шудылар, чаңгы туризмы техникасы буенча күнекмәләр булдырдылар.

    Дуслар! Сез дә саф һавада күбрәк булырга тырышыгыз. Бигрәк тә чаңгыда шуу бик файдалы, чөнки кеше тәненең күпчелек мускуллары чыныга. Шулай итеп Барыбыз да чаңгыга! 

  Бүген, 14 гыйнвар, мәктәптә хезмәт куючы укытучылар коллективының чираттагы 3 нче педагогик киңәшмәсе булып узды.  "Уку сыйфатын күтәрүдә методик эшне оештыруның юнәлешләре" дип исемләнгән киңәшмәдә төп докладчылар булып укыту эшләре мөдире Гатиятуллин М.Г. һәм фәннәр буенча мәктәпнең метод берләшмә җитәкчеләре булды. Киңәшмә шактый эшлекле характерда барды. Һәр укытучыны борчыган проблемалар, мәсьәләләр күтәрелде.