Яшел Үзән шәһәрендә фән олимпиадаларының муниципаль туры дәвам итә. Әлбәттә авыл мәктәпләренә шәһәрнең меңәр укучылы уку йортлары белән ярышуы бераз кыенрак. Әмма шулай булуга карамастан авылларда да белемле, уңган, тырыш укучылар бар. Һәм менә шундый укучыларыбызның берсе булган, 11 класс укучысы, Абзалутдинов Булатның бүген ОБЖ буенча 2 урынга лаек булуын белдек. Булатны һәм аны олимпиадага әзерләгән укытучысы Шайхуллин Рафаэль Гарәфетдиновичны чын күңелебездән зур уңышлары белән тәбрик итәбез. Аларга киләчәктә тагы да зуррак уңышларга ирешүләрен теләп калабыз.

   Афәрин Булат!  

   Бүген мәктәптә Сибгат Хәкимнең тууына 100 ел тулуга багышланган "Сибгат Хәким - үзе бер тау" дип исемләнгән әдәби-музыкаль кичә булып узды. Аны татар теле һәм әдәбияты укытучысы Сабитова Тәнзилә Нәбиулловна оештырды. Танылган халык шагыйре, күпләгән дәүләт бүләкләре иясе, халык күңеленә җырлары аша үтеп кергән күренекле әдипкә багышланган кичәдә 5-9 класс укучылар катнашты. Укучылар Сибгат Хәкимне һәр яклап ачып күрсәтергә тырыштылар, авыр тормыш юлын, шигырь һәм җырларыннан өзекләр тәкъдим иттеләр. Кичә һәркемнең күңелендә онытылмас бер хатирә булып уелып калыр дигән фикер белән таралыштылар кичәне оештыручылар һәм анда катнашучылар.  

  Математика атналыгы кысаларында бүген лекторлар группасы һәр класска кереп кызыклы чыгышларын тәкъдим итте. "Бөек математиклар" дип аталган әлеге чыгышлар һәр укучыга кызыклы булгандыр дип ышанып калабыз. Әлеге вазыйфаларны 9 класс укучылары башкарды. Алар укучыларның игътибарына Евклид, Ф.Виет, Пифагор, Н.И.Лобачевский, Декарт, С.Ковалевская һ.б. дөньяга танылган бөек шәхесләрнең тормыш юлларын һәм ачышларын тәкъдим итте.

   Шулай итеп математика атналыгы ахрына якынлашып килә, үткәрелгән чараларга нәтиҗәләр гомуми линейкада ясалачак.

   Математикадан чираттагы класстан тыш чара булып узды. "Иң тапкыр укучы" дип аталган әлеге бәйге 2-6 класс укучылары катнашында үткәрелде. Бәйгедә укучыларга төрле катлаулылыктагы логик мәсьәләләр бирелде. Укучылар кызып-кызып шушы мәсьәләләрне чиштеләр, һәрберсенең башкалардан зирәгрәк, тапкыррак буласы килде. Әмма "Иң тапкыр укучы" исеменә 5 класс укучысы Кашапова Әлфинә лаек дип табылды. Аннан кала бары бер балл аермасы белән шулай ук 5 класс укучысы Минһаҗев Эмиль дә җиңүчеләр рәтенә керде, аңа 2 урын бирелде. Бәйгене оештырганы өчен Асия Габбазовнага рәхмәт белдерәбез! 

   Математика атналыгы кысаларында мәктәбебезнең математика укытучысы Җәмәлиева Асия Габбазовна 5 нче класста ачык дәрес күрсәтте. Тәҗрибәле укытучы, "Иң яхшы укытучы" республика конкурсы җиңүчесе Асия Габбазовна бу юлы да үзенчәлекле дәрес үрнәге күрсәтте. "Натураль саннар белән гамәлләр башкару" темасына укучылар "Пегас" космик кораблендә очты. Очу барышында төрле каршылыкларны кызыклы мәсьәләләр чишеп җиңеп бардылар. Дәрес интерактив такта ярдәмендә башкарылды, шунлыктан яңа укыту технологияләре дәресне тагы да нәтиҗәлерәк һәм үкучыларга үтемлерәк итте.

   Үткәрелгән дәрескә коллектив югары бәя биреп, укытучыга тагы да иҗади уңышлар теләде.  

     Бүген 2 сыйныф укучылары мәктәпнең "Идел" оешмасының "Тамчылар" берлегенә кабул ителделәр. Хәзер инде алар да мәктәп тормышында актив катнашып, аның сулышы белән сулый башларлар. Тантаналы шартларда әйтелгән вәгъдәләрендә дә алар нәкъ шуның турында җиткерделәр. Аларны бу баскычка күтәрелүләре белән "Идел" укучылар оешмасының президенты Абзалутдинов Булат та котлады. Аларга мәктәп тормышында актив катнашып, яхшы укуларын теләде. Шулай ук, тәрбия эшләре буенча директор урынбасары Абзалина Гөлнур Ахматовна да укучыларны тәртипле, тәрбияле, акыллы һәм мәктәпнең йөзек кашы булуларына ышанып калуын белдерде. Амин, шулай булсын.

     Математика фәнен белү, аның катлаулы мәсьәләләрен чишү теләсә кемнең хәленнән килми. Ә менә математика укытучысы Җәмәлиева Асия Габбазовна укучыларга шушы катлаулы фәнне дә кызыклы итеп, яраттырырлык итеп бирә ала. Шуңа да ел саен диярлек БДИ да аның укучылары югары балларга ирешә. Бу, әлбәттә, укытучының үз фәнен яхшы белуе, укучыларга төпле, тирән белем бируендә. Әле менә шушы атна дәверендә Асия Габбазовна укучыларны, математика фән атналыгы кысаларында, төрле чараларда катнашырга чакыра. Әйтик, буген 7-9 сыйныф укучылары арасында үткән "Геометрик аукцион"да укучылар үзләренең геометриядән булган белемнәрен аукционда саттылар. Тик, башка аукционнардан аермалы буларак, укучылар лотларга куелган мәсьәләрне чишеп кенә үзләренә кирәкле әйберләрне ала алдылар. Кызып-кызып төрле катлаулылыктагы мәсьәләләрне чиштеләр, мисаллар эшләделәр. Һәр укучының да җиңүче буласы килде. Атна дәвамында әле мондый чаралар куп булыр, ә менә иртәгә исә Асия Габбазовна үзенең тәҗрибәсе белән уртаклашып, 5 нче чыйныф укучылары белән ачык дәрес күрсәтәчәк. Уңышлар телибез аңа!

Бүген мәктәбебездә,чын мәгънәсендә, моң бәйрәме булып узды. "Халкымның күңел җәүһәрләре" дип исемләнгән бу бәйрәмдә,  халкыбызның бөек легендар җырчысы Флера Сәләйманова һәм татар халкының оста гармунчысы, төрле уен коралларында уйнаучы Солтан Шиһап катнашты. Флера апаның челтерәп чыккан тавышын тын да алмый тыңладык, хәтта бүгенге яшь буын вәкилләре-укучылар да-олы яшьтәге апаның шундый моңлы тавыш белән җырлавына сокландылар. Бәйрәмгә килгән олы апалар Флера Сөләйманованың җырларын тыңлап, үзләренең яшь чакларына кайтып килгәндәй булдылар. Ә Солтан Шиһапның татар халкының милли уен коралларында оста итеп уйнавы, сандугач тавышыдай моңлы гармун тавышларын чыңлатуы - беркемне дә битараф калдыра алмады. Әйе, бай, моңлы безнең халкыбыз. Укучыларда милли үзаң тәрбияләүдә үзләренең көчләрен кызганмыйча, картлык көннәрендә дә милләт,  халкым дип янучы бөек шәхесләребез булганда татар халкы яшәр, үлмәс һәм бетмәс. Мондый милли моң бәйрәмнәре киләчәктә дә булсын иде дигән теләктә калабыз.

 Бүген мәктәп укытучылары чираттагы педагогик киңәшмәгә җыелды. Көн мәсьәләсенә берничә сорау чыгарылды: мәктәп шартларында поликультуралы белем бирү, рус теле укытуның торышы, аттестация узучы укытучыларның иҗади отчетлары һәм чирек йомгаклары.

   Беренче көн мәсьәләсенә мәктәп директоры Марс Маликович тукталып китте. Ул поликультуралы белем бирүнең бурычларына, максатларына, юнәлешләренә һәм безнең мәктәп шартларында аны ничек башкару кирәклегенә игътибар итте.

   Һәр мәсьәлә укытучыларның фикер алышулары белән үрелеп барды. Бигрәк тә кайбер авыр укучыларның укуга булган мөнсәбәтләре кызу дискуссия китереп чыгарды. Нәтиҗәдә киңәшмә карары кабул ителде һәм алгатаба эшкә кулланма итеп алу йөкләнелде 

  Якынлашып килүче Аналар көне уңаеннан мәктәптә "Бәйрәм открыткасы" исеме астында рәсем конкурсы узды. Бәйгенең максаты әниләрне бәйрәм белән котлап зур форматта открытка-котлау ясау. Бәйгедә мәктәпнең 5-9 класс укучылары катнашты. Иң яхшы котлау-открыткалары авылның төрле урыннарына урнаштырылып, һәрбер кешегә бәйрәм кәефе генә бүләк итеп калмас, ә ул-кызларга бәйрәм белән котлау кирәклеген дә искә төшереп торыр дип уйлый бәйгене оештыручылар. Бәйге нәтиҗәләре чираттагы линейкада игълан ителәчәк.

   Без исә, барлык Әниләрне бәйрәмнәре белән тәбрик итәбез. Сезгә исәнлек-саулык, тыныч тормыш, гаилә бәхете һәм һәрвакыт балаларыгызның кадер-хөрмәтен тоеп яшәвегезне теләп калабыз.