Республика күләмендә үтүче "Ел тәрбиячесе 2014"  бәйгесенең район этабы башланып китте. Бүген районыбызда “Ел тәрбиячесе” бәйгесендә катнашучы 4 педагог белем бирү эшчәнлеген  “Шатлык” балалар бакчасы базасында күрсәттеләр.  Безнең балалар бакчасыннан бәйгедә музыка җитәкчебез Галимуллина Алсу Ринатовна катнаша. Ул бүген  “Без язны эзләргә барабыз” темасына  музыка белем бирү эшчәнлеген зурлар төркеме балалары белән  үткәрде. Алсу Ринатовна  балаларны кызыксындырып музыка иленең серле дөньясына  алып керде, алар төрле музыкаль хәрәкәтләр ярдәменә язны эзләп киттеләр һәм музыкаль инструментлар, “Тылсымлы куллар”, матур биюләр башкарып язны эзләп таптылар. Язның  җылысын йөрәкләренә салдылар һәм төркемдәшләренә дә бүләк иттеләр. Балалар бик актив, шат күңелле, кызыксынучан булдылар. Балаларга һәм бакча  коллективына зур рәхмәтебезне җиткерәбез.

Барлык катнашучыларга да иҗади уңышлар телибез!

Мәктәпкә әзерлек һәм зурлар төркеме балалры һәм әтиләр белән күңел ачу, спорт бәйрәме үткәрелде. Балалар ике командага бүленделәр. "Яшелләр" -зурлар төркеме, ә "Аклар" - мәктәпкә әзерлек төркеме, алар үзара ярыштылар, әлбәттә инде балалар белән ярышта әтиләр дә катнашты. Алар туплар белән дә ярыштылар, балаларны күтәреп тә йөгерделәр, күзләрен бәйләп тә бик оста ярыша алдылар. Балалар аэробика, стречинг гимнастикалары күрсәттеләр, нәфис гимнастика түгәрәгенә йөрүче Тазиева Ясминә үзенең программасын биеп күрсәтте. Тәрбияче Алсу Хамитовна, Ләйсән Равилевна, Лилия Амировна, Мәдинә Равилевнага һәм коллективка әтиләр үзләренең рәхмәтләрен җиткерделәр. 

Бу атнада ясле төркеменең әти- әниләр белән очрашу кичәсе булып узды. Кичәне тәрбияче Сиренә Садретдиновна җыр башкарып башлап җибәрде. Аннан соң барлык әти- әниләр үзара танышып чыктылар. Алар өчен балаларның көндәлек эшчәнлекләрен чагылдырган фотолардан ясалган презентация күрсәтелде. Тәрбиячеләр һәр бала турында, бакчада үз- үзен тотышы, иптәшләре белән мөгалләмәсе һ.б.  сөйләп чыктылар. Әти- әниләр белән спорт ярышлары, логик фикерләр буенча биремнәргә җаваплар бирү, күмәк уеннар оештырылды. Алга таба бурычлар билгеләнде. Кичәдән балаларның бакчада үзләрен тотышларын чагылдырган презентация буенча  һәм гомумән белем, тәрбия бирү, ашату буенча әти- әниләр бик канәгать булуларын әйттеләр. Алга таба да бердәм булып, балаларны киңәшләшеп тәрбиялик.

Патриотик тәрбия бирү төшенчәсе киң мәгънәне аңлата, ягъни ул бала күңелендә Туган илнең табигатенә, туган йортына, туган авылына яки шәһәренә, халкының тарихына, аның мәдәниятенә мәхәббәт уятудан гыйбарәт. Безнең коллектив бу төшенчәләрне балалар күңеленә төрле эш формалары, уеннар аша сеңдерә. Менә бүген дә балаларның яраткан бәйрәме- “Аҗаган” үткәрелде. “Кызыллар”  (2 кечкенәләр) һәм “Сарылар” (уртанчылар төркеме )  беренче булып командирлар рапортны Флюзия Рафаиловнага бирделәр, ә аннан соң   “Саперлар”, “Азимут билгеләү”, “Медицина ярдәме” һ.б. ярышларында катнаштылар. Ә иң соңгы этап – флагны эзләп табу булды. Балалар бик җитез, тапкыр булдылар, флагны да эзләп таптылар һәм дуслык җиңде.

Зурлар төркеме- “Яшелләр” ә мәктәпкә әзерлек төркеме-  “Зәңгәрләр”,командасы булып көч сынаштылар. Бу командаларга “Чаңгы юлы”, “Биеклекне алу”, “Снайперлар” уеннары да өстәлде. Азимутны билгеләп схема буенча флагны бик тиз таба алды бу командалар да. Балалар күңелендә шатлык, дуслык хисләре иде бу минутларда.. Хөрмәтле әти- әниләр, "Аҗаган" ның фотолары  сайтка фотогалерияга куела.

20 февраль көнне уртанчылар төркеме балалары әтиләрне, бабайларны Ватанны саклаучылар көне белән котладылар. Балалар бик матур чыгыш ясадылар, " Янгын сүндерүче булам" әкиятен сәхнәләштереп әтиләргә күрсәттеләр, үзләре ясаган бүләкләрне тапшырдылар. Соңыннан әтиләр арасында күңелле ярышлар үткәрделәр. Барлык әтиләр дә актив булдылар.  Хөрмәтле әтиләр! Сезне бәөрәм белән тәбрик итәбез! Гаиләдә әти төп таяныч, терәк булып тора. Бала тәрбияләүдә әтиләрнең йогынтысы бик зур. . Ил терәге ир-егетләр булса,гаилә терәге-әтиләр. Менә шуңа күрә балаларыгыз  үскәч тә, аларга үрнәк әти булыгыз, кирәк вакытта файдалы киңәшләрегезне биреп, тормыш юлына аяк басканчыга кадәр таяныч булып яшәгез. Бәйрәм белән!!!

Ап-ак кышның уртасына җиткәч,

Бәйрәм килә ел да илемә.

Ишекләрне киереп ачып керә

Минем яши торган өемә.

Бәйрәм килә, өстәлләргә куна,

Ак ашъяулык, тәмле сый-нигъмәт.

Илне саклаучылар хөрмәтенә

Ява котлау, ява дан-хөрмәт.

Хезмәт иткән минем әтием дә

Илне саклаучылар сафында.

Солдат киеменнән төшкән рәсем

Һәрвакытта тора каршымда.

19 февраль көнне икенче кечкенәләр төркеме балалары әтиләрне Ватанны саклаучылар көне белән котлап бәйрәм иртәсе үткәрделәр.Балалар бик матур чыгышлар ясадылар. Бәйрәмнең икенче өлешендә әтиләр өчен “Ягез әле, әтиләр!” бәйгесе уздырылды. Бәйрәмдә әтиләр командаларга бүленеп көч сынаштылар.  Әтиләр бик актив та, артист та, җитез дә булдылар. Аларга балалар үзләре ясаган бүләкне, ә ярышта катнашучыларга бакча администрациясе исәлекле бүләкләр тапшырды. Бәйрәм һәркемнең күңеленә хуш килде. Бәйрәм белән сезне әтиләр!!!

21 февраль – Халыкара туган тел көне. Бүген бакчабызда “И тугантел, и матур тел!” бәйрәме үткәрдек.  Кичә “Әллүки” җыры белән башланып китте һәм туган тел турында шигырь, җырлар белән үрелеп барды, балаларга туган телне яратырга, онытмаска, бозып сөйләшмәскә кирәклеге аңлатылды. Туган тел! Һәркем өчен дә газиз бу сүз. Чөнки иң кадерле, бернәрсә белән дә алыштырылмый торган “әни”, “әти”, “әби”, “бабай” сүзләрен башлап туган телдә әйтәбез. Туган үскән ил-җирнең якынлыгын, Ватанның газизлеген без әүвәл туган тел ярдәмендә тойганбыз. Шагыйрьләребезнең матур – матур шигырьләрен ятлап. әле дә куанабыз, рухланабыз. Бүгенге бәйрәмебезне дә без Габдулла Тукай сүзләренә язылган җыр белән тәмамладык.

          Дөньяда иң-иң матур ил-

         Ул минем туган илем.

         Дөньяда иң-иң матур тел-

         Ул минем туган телем.

         “Балам”,-диеп туган телдә

         Эндәшә миңа әткәм.

         “Әнкәем”, -дип әниемә

         Мин туган телдә дәшәм.