Кемнәр спортны ярата,

Кемнәр өлгер һәм җитез?

Безнең белән ярышырга

Кемнәр тели, әйтегез?

Безнең белән ярышырга

Җитез балалар  кирәк.

Кемнәр ярышырга әзер,

Торып басыгыз тизрәк!

 Бүген безнең “Әллүки” балалар бакчасында күңелле стартлар булып үтте. Бу ярышларның максаты - балаларга сәламәтлекне саклау турында белем бирү, спорт ярышлары белән чыныктыру һәм сәламәт яшәү рәвеше белән кызыксындыру иде. Чыннан да, бу көнне балалар үзләренең чын батырлар икәннәрен расладылар. “Су ташу”, “Боҗра киеп йөгерү”, “Туп тәгәрәтү”, “Боҗралардан сикерү”, “Зур тупта сикерү” кебек уеннарда җитезлектә сынаштылар. Көчле, түзем, эшкә сәләтле булу өчен даими рәвештә физкультура һәм спорт  белән шөгыльләнергә кирәк икәненә тагын бер кат инандылар.

Хөрмәтле Әлфия Шамиловна! 

       Сезне туган көнегез белән котлыйбыз! Иң изге, якты, матур теләкләребезне юллыйбыз: көчле рухлы һәм кешелекле, юмарт һәм ярдәмчел, бәхетле һәм сәламәт булыгыз! Туар таңнарыгыз тыныч, саулыгыгыз ныклы, гомерегез бәхетле булсын! Кайгы- хәсрәт күрми, озын гомер итүегезне, гаилә шатлыгы, балаларыгызның, якыннарыгызның  игелеген  күреп  яшәргә  язсын  Ходай! Ныклы тазалык, озын гомер, ак бәхетләр белән мул тормышта яшәвегезне телибез.

Матур тормыш, сәламәтлек теләп,

Туган көнегез белән котлыйбыз.

Шатлык белән озын гомер үтеп,

Яшәвегезне генә телибез.

Гомер үтә диеп, моңсуланмагыз,

Өмет гөлкәйләрегез сүнмәсен.

Алтын төсендәге якты көннәр

Барыр юлларыгызны бизәсен.

Авырлыклар бер дә кичермәгез,

Кыенлыклар бер дә килмәсен.

Сезнең йөзегездә шатлык нуры,

Балкып торсын, мәңге сүнмәсен.

                           Бүген бездә Сабантуй –

                           Эшләреңнең барын куй!

                           Тизрәк йөгер мәйданга,

                           Бәйрәм башлана монда.

                           Чәчәккә күмелгән тугайлар,

                           Июннең иң матур көнендә,

                           Болынның иң матур җиренә

                           Килдек Сабантуй күрергә!

Сабантуй – ул хезмәт, дуслык бәйрәме. Һәркем көтеп алган изге бәйрәм. Әби-бабайларыбыз борын-борыннан Сабантуй бәйрәмендә күптөрле түгәрәк уеннары, җырлы- биюле уеннар уйнарга яратканнар.Без дә бүген  уйнадык,биедек,җырладык һәм рәхәтләнеп күңел ачтык.

22-23 май  көннәрендә  Балалар иҗат үзәгендә  мәктәпкәчә  белем бирү учреждениеләре  арасында  “Сәләтлеләр дөньясында - 2014”  (“В мире таланта – 2014”) дип аталган  балалар иҗаты конкурсының сайлап алу туры булып узды. Безнең  “Әллүки”  бакчасыннан  “Иң шәп бабай” җыры белән мәктәпкә әзерлек төркемендә тәрбияләнүче Галимзянова Лиана, хореография буенча зурлар төркемендә тәрбияләнүче Тимуршина Лиана, “Безнең ике бәйрәм” шигыре белән уртанчылар төркемендә тәрбияләнүче Гильмутдинов Бәхтияр уңышлы чыгыш ясадылар. 

Бакчабызда административ-хуҗалык эшләре нәтиҗәле оештырыла.  Бүгенге өмәдә дә коллектив активлык күрсәтте. Территориядәге чәчәклек, яшелчә түтәлләре казылды, тырмаланды. Тирә-ягыбызны  чистартуга, яшелләндерүгә, матурландыруга көчләрен керткән һәр хезмәткәргә зур рәхмәт

Табигать – без сулаган һава, безне иркәләгән җил, җылы кояш нурлары... Беркем дә табигатькә битараф түгел. Язучылар, шагыйрьләр табигать турында нинди генә әсәрләр язмыйлар! Табигать үзенең гүзәллеге белән кешене сокландыра, сәламәтлегенә уңай йогынты ясый. Һәр ел фасылының үз матурлыгы бар. Язын бар тирә-як яшеллегеннән күзләр камаша. Язгы җылы җил алмагачлардагы яшь бөреләрне уятты, алар хуш исле яфракларын ярдылар һәм ниһаять, ап-ак чәчәкләр атты! Яз дымлы җирне ямь-яшел үләннәр, сары тузганак чәчәкләре белән бизәде. Бакчабызның тирә-ягы шау чәчәкккә күмелде!                                           

Бүген, 16 май көнне, безнең балалар бакчасы  базасында  мәктәпкәчә  белем бирү учреждениеләре  арасында  “Сәләтлеләр дөньясында - 2014”  (“В мире таланта – 2014”) дип аталган  балалар иҗаты конкурсының зона этабы булып узды. Район үзәгендә урнашкан “Шатлык”, “Әллүки”, “Алтынчәч”, “Кыңгырау”, “Бәләкәч” балалар бакчаларыннан иң талантлы, җырга, биюгә, нәфис сүзгә оста, музыкаль инструментларда төрле матур көйләр уйнарга сәләтле балалар үзләренең һөнәрләрен күрсәттеләр