10 нчы октябрь көнне үткәрелгән “Россия - минем горизонтларым” сыйныфтан тыш эшчәнлек курсы кысаларында дөрес һәм кирәкле профессия сайлау формуласы турында сөйләшү алып барылды. Укучылар диагностика үттеләр, видеоөзекләр карадылар.
Шулай ук 8 - 10 нчы сыйныф укучылары Казан милли тикшеренү технология университеты (КНИТУ) вәкилләре белән очраштылар. Алар әлеге уку йортының максатлары һәм юнәлешләре белән таныштылар.

Һөнәри юнәлеш бирү кысаларында 7А сыйныфы укучылары белән "Цифр дәресе" үткәрелде. "Цифр дәресе" проекты- цифрлы күнекмәләргә өйрәтү һәм программалаштыру буенча гадәти булмаган дәресләр сериясе. Дәреснең темасы "Ясалма интеллект: промпт-инжиниринг" дип аталды. Дәрес барышында укучылар актив эшчәнлек алып бардылар, үзләрен кызыксындырган сорауларга җаваплар таптылар, практик биремнәр эшләделәр, IT- сферасында перспектив юнәлешләр белән таныштылар.
Әлеге дәрес укучылар өчен кызыклы һәм файдалы булды. Очрашуны оештырган өчен тәрбия эшләре буенча директор киңәшчесе Гөлчәчәк Әсхатовнага зур рәхмәт!

Атна дәвамында гимназиябездә “Алдынгылар хәрәкәте” нең беренчел бүлек советы рәисен сайлау буенча чаралар үткәрелде.
Төп кандидатлар исемлеге:
1. Афзалова Аделя Айнуровна - 8Б сыйныфы укучысы;
2. Валеева Алимә Тагировна - 8Б сыйныфы укучысы.
Агитация барышында барлык кандидатлар үзләренең эш программасын тәкъдим итттеләр, сайлау алды программасы белән листовкалар тараттылар, кандидатлар дебатында катнаштылар. Без үз чиратыбызда барлык кандидатларга да сайлауларда уңышлар телибез! Лаеклы кандидатны бергәләп сайлыйк!

Видеога сылтама: https://vk.com/club216931602?z=video-216931602_456239325%2F04a9e48cc37752d305%2Fpl_wall_-216931602

Уку- иң файдалы шөгыльләрнең берсе, ул үз- үзеңне һәм әйләнә- тирә дөньяны яхшырак аңларга мөмкинлек бирә. Уку көне уңаеннан гимназия китапханәсендә төрле чаралар үткәрелде, видеоөзекләр каралды, викторина сорауларына җаваплар бирелде.
Шулай ук гимназия укучылары "Китапка икенче тормыш бүләк ит- 2024" акциясендә актив катнашып киләләр. Исегезгә төшерәбез, әлеге акция 31 нче октябрьгә кадәр дәвам итәчәк.

Бакчадагы тулып пешкән җимешләре, кырдагы мул уңышлы игеннәре белән кешеләрне сөендереп җиргә алтын көз аяк басты. Быел көз бигрәк ямьле булды, кояшлы җылы көннәр дә озакка барды. Шушы матур көннәрне тагын да ямьләп, гимназиябездә "Кабатланмас көз" дип исемләнгән күргәзмә оештырылды. Укучыларның табигый материаллардан ясалган композицияләрен сезгә дә тәкъдим итәбез!

Бүген гимназиядә дүшәмбе иртәсе Рәсәй һәм Татарстан гимннарын башкарудан башланып китте. Гимн җырлаганнан соң "Мөһим сөйләшүләр" дәресләр циклы уздырылды. Укучылар белән "Россия турында легендалар" дигән темага сөйләшү алып барылды. Дәреснең максатлары:
- укучыларга "фольклор" төшенчәсенең мәгънәсен аңлату;
- халык авыз иҗаты турында алган белемнәрне ныгыту;
- фикерләү һәм анализлау сәләтен үстерү.

Гимназиянең 8В, 10 нчы сыйныф укучылары сыйныф җитәкчеләре Розия Базаровна һәм Эльмира Вагизовна белән берлектә "Пушкин картасы" проекты кысаларында В. И. Ленин исемендәге мәдәният йортында "Осенняя феерия" дип исемләнгән концерт карап кайттылар. Укучылар танылган җырларны заманча аранжировкада тыңладылар, яшь башкаручылар белән таныштылар, яхшы кәеф алдылар!

5В сыйныфы укучылары сыйныф җитәкчеләре Индира Рифкатовна һәм әти- әниләре белән берлектә Кремль буйлап сәяхәт кылдылар. Квест маршруты барышында укучылар шәһәрнең истәлекле урыннары турында белделәр, архитектура объектлары, легендалар белән таныштылар. Әлеге чара позитив һәм уңай эмоцияләргә бай булды!

Җир йөзендә иң- иң матур теләкләрне
Сорасалар, багышларга кемгә, диеп,
Үзенә бик күп йөрәкләрне әсир иткән
Укытучыга, дияр идем, башым иеп!
5 нче октябрь- Укытучылар көне. Әлеге күркәм бәйрәм көнендә йөрәктән чыккан иң изге теләкләрне, иң җылы хисләрне кабул итегез, хөрмәтле укытучылар! Барыгызга да исәнлек- саулык, күңел тынычлыгы, гаилә бәхете, эшегездә яңа үрләр яулавыгызны теләп калабыз! Сезнең һәр дәресегез укучыларны яңа белемнәргә, фәнни ачышларга этәрсен!
Гимназиядә Укытучылар көне уңаеннан бәйрәм концерты уздырылды. Бәйрәмгә күп еллар гимназиябездә эшләп, лаеклы ялга чыккан укытучылар, хезмәткәрләр чакырылды. Укытучыларга һәм өлкәннәребезгә укучыларыбыз үз куллары белән эшләнгән бүләкләр тапшырдылар, үзләренең талантларын күрсәттеләр. Укытучыларыбыз, килгән кунакларыбыз тарафыннан һәр чыгыш кайнар алкышларга күмелде! Концерттан соң очрашу бәйрәм табыны артында дәвам итте.

Видеога сылтама: https://vk.com/club216931602?z=video-216931602_456239319%2F580771aa19fd19b01c%2Fpl_wall_-216931602

4 нче октябрь– Бөтендөнья җәнлекләрне яклау көне. Әлеге көн барлык кешеләрнең игътибарын җәнлекләр проблемаларына юнәлтү һәм безнең кечкенә дусларыбызга карата ярдәмчел булу максатыннан үткәрелә. Дәрес барышында укучылар белән сирәк очырый торган һәм юкка чыгып баручы җәнлекләр турында сөйләшү алып барылды, кинолекторий үткәрелде. Балалар "Галчонок" мультфильмын карадылар һәм фикер алыштылар.