Гимназиянең 7А һәм 7Б сыйныфы укучылары Россия Эчке эшләр министрлыгының Казан шәһәре идарәсенең метрополитен юнәлешенең полиция бүлеге башлыгы урынбасары Гильмханов Булат Хәбирович һәм патруль- пост хезмәте полкы командиры урынбасары Ибрагимов Илнур Талгатович белән очраштылар.
Килгән кунаклар укучыларга хокук саклау органнары хезмәткәрләренең эш үзенчәлекләре, хокук бозулар һәм яшүсмерләр кылган җинаятьләр турында сөйләделәр. Әлеге очрашуда балалар кирәкле мәгълүмат алдылар.

14 нче ноябрь көнне үткәрелгән “Россия - минем горизонтларым” сыйныфтан тыш эшчәнлек курсы кысаларында укучылар белән "Аграр Россия" юнәлеше буенча йомгак ясалды. Укучылар видеоөзекләр карадылар, практик биремнәр эшләделәр, нәтиҗәләр ясадылар.

Бөтендөнья игелек көне- 13 нче ноябрьдә билгеләп үтелә торган Халыкара бәйрәм. Игелек- ул ярдәмчеллек, кешеләргә карата рухи мөнәсәбәт, башкаларга яхшылык эшләргә омтылу.
Әлеге көн уңаеннан, китапханәче Зөлфия Рафаильевна һәм тәрбия эшләре буенча директор киңәшчесе Гөлчәчәк Әсхатовна 4 нче, 6 нчы сыйныф укучылары белән игелек дәресләре үткәрделәр. Чара барышында укучылар:
- үзләренең фикерләре белән уртаклаштылар;
- "тылсымлы сүзләр" дөньясында булып кайттылар;
- якыннарына һәм тирә- юньдәгеләргә карата яхшылык күрсәтү белән бәйле төрле ситуацияләрне анализладылар;
- дуслык белән бәйле булган мәкальләрнең төшенчәләре белән таныштылар;
- "яхшы" һәм "явыз" әкият геройлары турында блиц- сорауларга җаваплар бирделәр;
- "Полианна" фильмыннан өзек карадылар.
Игелек дәресләренең асылы шунда иде: игелекле эшләр үзеңә артыгы белән әйләнеп кайта. Бер рәхмәт мең бәладән коткара, диелә бит халык мәкалендә дә.

12 нче ноябрь “Песнәкләр көне” исемле экологик бәйрәм буларак искә алына. Гимназиябезнең "Галәм киңлекләрендә" түгәрәгенә йөрүче 1Б сыйныфы укучылары җитәкчеләре Илсияр Илгизовна белән берлектә әлеге көннең барлыкка килү тарихын өйрәнделәр, песнәкләр һәм башка кошлар турында белемнәрен арттырдылар. Укучылар әти- әниләре белән бергәләп ясаган җимлекләрен алып килделәр, кошларга "күчтәнәчләр" салдылар. Балаларда табигатькә карата игътибарлы, сакчыл булуны кечкенәдән тәрбияләү бик әһәмиятле.

Бүген гимназиядә дүшәмбе иртәсе Рәсәй һәм Татарстан гимннарын башкарудан башланып китте. Гимн җырлаганнан соң "Мөһим сөйләшүләр" дәресләр циклы уздырылды. Укучылар белән "Уртак хезмәттә синең өлешең" темасына сөйләшү алып барылды. Дәреснең максатлары:
- "шәхси җаваплылык" төшенчәсе белән танышу;
-  гомуми максатларга ирешүдә бердәмлекнең әһәмиятен аңлау;
-  хезмәткә һәм гражданлык бурычларына ихтирамлы мөнәсәбәт тәрбияләү.

Бүген гимназиябездә 1 нче сыйныф укучыларын "Россия бөркетләре" нә багышлау тантанасы узды. Барлыгы 107 бала иптәшләре һәм укытучылары алдында әлеге хәрәкәт сафларына кабул ителделәр. Укучыларны "Россия бөркетләре" сафларына алу тантанасы Россиянең һәм Татарстанның дәүләт гимннарын башкарудан башланып китте. Гимназиябез директор урынбасары Садыкова Зөһрә Зәкәриевна укучыларны шушы тантаналы көн белән котлап теләкләрен җиткерде. Тантана барышында һәр укучыга әлеге хәрәкәтнең символлары булган тамгалар һәм рәсми таныклыклар  тапшырылды. Укучылар чара барышында "Россия бөркетләре" нең девизын һәм гимнын башкардылар. Тантаналы матур бәйрәм флешмоб белән тәмамланды.
Гимназиябезнең "Россия бөркетләре" әлеге исемне лаеклы йөртәчәк, киләчәктә илебезнең горурлыгы булачак дип өметләнәбез. Укучыларга уңышлар һәм яңа казанышлар телибез!

Видеога сылтама: https://vk.com/club216931602?z=video-216931602_456239341%2F2235ab8365b27ec797%2Fpl_wall_-216931602

Гимназиянең 3А сыйныфы укучысы Гараева Сәмирә V Бөтенрәсәй күләмендә үткәрелгән "Бөркетләр очарга өйрәнә - Орлята учатся летать" дип исемләнгән патриотик җырлар конкурсында I дәрәҗәдәге дипломга ия булды. Сәмирәне чын күңелдән котлыйбыз, киләчәктә уңышлар телибез!

8 ноябрьдә илебездә Россия Федерациясе эчке эшләр органнары хезмәткәрләренең хезмәт бурычларын үтәгәндә һәлак булганнарны искә алу көне билгеләп үтелә.
Эчке эшләр органнарында хезмәт итү- җаваплы, авыр, шул ук вакытта җәмгыятькә бик кирәкле һөнәр. Әлеге юнәлеш хезмәткәрләрдән намуслыкны, кешеләргә ярдәмгә килергә теләүне һәм әзерлекне таләп итә.
Гимназиянең 7А сыйныфы укучылары сыйныф җитәкчеләре Гөлчәчәк Әсхатовна белән берлектә Татарстан Эчке эшләр министрлыгы музеенда булып кайттылар. Укучылар тарихи материаллар һәм экспонатлар белән таныштылар. Сөйләшү барышында Эчке эшләр министрлыгы хезмәткәрләренең хезмәте һәм батырлыклары турында белделәр. Ахырдан укучылар хезмәт вазыйфасын башкарганда һәлак булган ЮХИДИ инспекторы Матренин Юрий Николаевич турында фильм карадылар. Безнең бурычыбыз- якты киләчәгебез һәм тынычлыгыбыз өчен үз гомерен биргән кешеләрне истә тоту һәм хөрмәт итү.

Бүген, ягъни 8 нче ноябрь көнне, безнең гимназиядә дөньякүләм татар теленнән белем тикшерү "Татарча диктант" акциясе узды. Бу акциядә 50дән артык укучы катнашты. Акциянең максаты – татар теленә һәм мәдәниятенә игътибар җәлеп итү, дөнья буйлап таралып яшәгән татарларны берләштерү, тел белемен тикшерергә мөмкинлек бирү, әдәби татар телен кулланучыларның даирәсен арттыру һәм татар теленә карата мәхәббәт уяту.

7 нче ноябрь көнне үткәрелгән “Россия - минем горизонтларым” сыйныфтан тыш эшчәнлек курсы кысаларында укучылар белән "Куркынычсыз Россия: полиция, янгын сүндерү, коткару һәм сак хезмәте" темасына сөйләшү үткәрелде. Дәрес барышында укучылар илебезнең куркынычсызлык системасына караган һөнәрләр белән таныштылар, видеоөзекләр карадылар, биремнәр эшләделәр.