9 нчы сыйныфтан 5 егетебез бүген, рус теленнән Төп дәүләт имтиханы биремнәрен эшләп, үз көчләрен сынады. Эшләренең нәтиҗәләре уңышлы булыр дип өметләнәбез, чыгарылыш сыйныф укучыларына зур уңышлар телибез.

Бәйрәмебез кунаклары -әниләр үзләренә котлау буларак тәкъдим ителгән әдәби-музыкаль композицияне бик ошаттылар. Башлангыч сыйныф укучыларының котлаулары аеруча үзенчәлекле булды: һәр укучы котлау чыгышы белән  әнисенә үзе ясаган бүләген тапшырды. "Аулак өй " күренеше исә тамашачыларга зур әнинең оныгына үзенең яшьлек хатирәләрен сөйләве буларак сәхнәләштерелде. Бу күренеш мәктәбебезнең Мәдәният елы кысаларында татар халкының йола һәм уен фольклорын өйрәнү күрсәткече дә иде. Кичә барышында кызларның кул эшләре башкару, каз канаты сыдыру, такмак әйтешү, уен җырлары, йөзек салыш уены, егетләр һәм кызларның тапкырлыгын күрсәтүче сорау-җавап  әңгәмәсенең матурлыгы һәм әһәмияте ачылды. 

Бәйрәм әниләр өчен әзерләнгән чәй табыны артында дәвам иттте.

Бәйрәм тамашасын әзерләүдә һәм үткәрүдә катнашкан барлык укучыларга һәм укытучыларга мәктәп җитәкчелеге  һәм ата-аналар комитеты исеменнән зур рәхмәт белдерәбез.

24 еннән 29.11 кадәр дәвам иткән "Әниләр атналыгында " уздырылган конкурсларның нәтиҗәләре Әниләр бәйрәме көнне ясалды. Балаларының уңышлары өчен сөенү әниләрнең бәйрәмен тагын да күңеллерәк иткәндер. 

"Сүз чыгар шагыйрьләрдән хикмәт белән"  конкурсы җиңүчеләре: 1 урын- Сәләхова Зөһрә, Исмоилова Айгөл

2 нче урын- Әхмәтова Ләйлә

3 нче урын- Әхмәдиева Нәзилә.

"Җырым синең хакта" тематик җыр конкурсы нәтиҗәләре: 1 нче урын- 3 нче сыйныф, 2-4 нче сыйныфлар;

2 нче урын- 1 нче сыйныф укучылары.

Урта звенода: 1 нче урын- трио 7 нче сыйныф

2 нче урын-хор 6 нчы сыйныф

3 нче урын - хор 9 нчы сыйныф. Җиңүчеләргә алга таба да иҗади уңышлар телибез.

Сурәттә: җиңүчеләрне мәктәп директоры тәбрикли

Бүген мәктәпкүләм  Парламент дәресе рәсми төстә Татарстан гимнын тыңлау белән башланды. Татарстан Дәүләт Советына виртуаль сәяхәт һәм махсус видеоязманы караганнан соң, сүз дәресебез кунаклары Киекле авыл җирлеге башлыгы Рәфис Габбас улы Ганиевка һәм Авыл Советы депутаты Рәис Минвәли улы Ганиевларга бирелде. Авыл җирлеге депутаталры вәкаләтенә туры килгән вазифалар, йөкләмәләр, җаваплылык турында сүз җанлы әңгәмәгә әйләнде. Бүгенге көндә авылыбыз урамнарында багана утлары, урамнардагы таш юллар, авыл халкының хөкүмәт тарафыннан тәкъдим ителгән өстенлекле программалардан файдалануы, халыктан кергән сорау һәм тәкъдимнәрнең уңай чишелеше- авыл җирлеге башлыгы һәм депутатларның нәтиҗәле хезмәт күренеше. Бу Парламент дәресе, бигрәк тә, укучы малайларга, егетләргә нык тәэсирле булды. Алар үзләре өчен гаилә терәге -әти, ил терәге- ир -егет дигән нәтиҗә ясадылар. Алдагы теләк-максатларны тормышка ашыру өчен, бүген укучылардан тырышып уку сорала, уку авырлыкларын җиңү, кызыксынучанлык, үзең белән идарә итә белү сыйфаты һәркем өчен мөһим. Киләчәктә укучыларыбыз дәүләтебезнең лаеклы гражданнары булыр дип ышанабыз.

Мәктәптә "Хокук бозуларны кисәтү айлыгы" бара. Айлык кысаларында  "Бала-Закон- Ата-ана" темасына   җыелыш  ТР ЮХИДИ ң Нурлат бүлекчәсе юл һәлакәте иминлеген пропагандалау бүлеге өлкән лейтенанты Мөгайнетдинов Р.Г. катнашында узды. Юл һәлакәтләре көннән-көн күбәеп торган чорда ата-аналарның юл хәрәкәте кагыйдәләрен төгәл үтәп, балаларга үрнәк күрсәтүе мөһим. Җәяүлеме, машина йөртүчеме- тиешле кагыйдәләргә буйсынып, яшь буынны сау-сәламәт үстерергә бурычлы. Белгеч тарафыннан юлдагы хокук бозуларга карата гамәлдәге җаваплылык турында да сүз булды.

Җыелышның икенче өлеше исә яшүсмерләр арасында киң колач алган яман гадәтләрне профилактикалауга, укудагы уңышлар һәм җитешсезлекләрне хәл итүгә һәм боз өстендә куркынычсызлык кагыйдәләрен үтәүгә багышланды. Әти-әниләр балалары белән эчкерсез мөнәсәбәттә булганда, балаларны яман гадәтләрдән һәм һәр төрле куркынычлардан саклап калу мөмкин икәне һәркемгә мәгълүм.

Җыелыш эшчәнлегеннән әти-әниләр  канәгать калды

 Бүген 9 нчы сыйныф укучылары, 2015 нче елда төп гомуми белем программалары буенча  ДЙА  сыйфатлы әзерләнү һәм үзләренең әзерлек дәрәҗәсен бәяләү максатыннан, математикадан бланк форматында диагностик тест биремнәрен үтәде.

Беренче чирканчык  нәтиҗәләре укучыларны шатландырырлык булсын иде.

Бүген 6 нчы сыйныф укучылары озак еллар дәвамында мәктәбебездә эшләп лаеклы ялга чыккан тыл ветераны Җамалетдинова Хәлимә әбинең тормыш юлы белән таныштылар. Хәлимә әби 85 яшендә, шат күңелле, ачык йөзле. 1948 нче елдан хезмәт юлын Кизләү мәктәбе белән бәйләгән әби мәктәбебезнең 65 еллык тарихы шаһиты буларак та кадерле безгә. Аның үз гаиләсе,  сугыштан соңгы елларда авылдагы авыр тормыш турында сөйләгәннәрен укучылар бик яратып тыңлады. Бүгенге мул тормышка ирешү өчен Хәлимә әби сөйләгән кыенлыкларны бөтен ил күтәргән, Бөек Җиңүгә ирешүебез дә бердәмлектән, бер-беребезгә ярдәмләшүдән, ди әби. Балаларга үгет-нәсихәтләрен , хәер-фатихасын биреп озатты Хәлимә әби. Авылыбыз, мәктәбебез, Җиңү тарихын бүгенге буынга җиткерү өчен калган санаулы һәм кадерле әби-бабайларыбызга күңел тынычлыгы, тән сихәтлеге насыйп булсын.