Мәктәбебездә “Хәтер маршы-2015”  агитпоходы.

         “Хәтер маршы-2015” яшьләр  агитпоходының безнең мәктәптәге тукталышы күңелләрдә озак сакланыр.

          Җиңүнең 70 еллыгына әзерлек кысаларында мәктәбебездә “Истина” эзләнү отряды әгъзалары белән    очрашу узды. Моңа кадәр эзләнү отрядлары турында ишетеп кенә белгән укучылар өчен дә, укытучылар өчен дә бу очрашу бик тәэсирле булды.

         Үзләрен изге хезмәткә багышлаган  отряд кешеләре безгә үзләре сайлаган шушы кызыклы һәм файдалы эшнең асылын ачтылар. Алар  Бөек Ватан сугышы вакытында иң көчле бәрелешләр һәм Совет гаскәрләре иң күп югалтулар кичергән урыннарда   казу һәм эзләү эшләре алып баралар.  Табылган мәетләрнең кемнеке булуын  солдат медальоннарындагы язулардан  ачыклыйлар икән. Әмма мондый медальоннарның бөтен солдатларда да булмавы солдатны тану эшен бик кыенлаштыруын әйттеләр. Безгә алар казу эшләре барышында табылган солдат әйберләре күргәзмәсе, үз эшчәнлекләре турында видеофильм  тәкъдим иттеләр. Аларның кызыклы сөйләве үзләре башкаруында сугыш җырлары һәм укучыларның сорауларына җавап белән үрелеп барды. Әлеге очрашудан соң кызлар да җитдиләнгән, егетләребез буйга тартылып киткән кебек тоелды. Һәркемнең күзендә очрашуга килгән  “Истина” эзләнү отряды әгъзаларына эчкерсез рәхмәт, соклану һәм изге теләкләр чагыла иде.

          Сугыш чынбарлыгын интернет челтәрендә әкият һәм фантастик фильм геройлары белән “көчле бәрелешләр” аша белгән,  ул уеннарда  “югалту һәм җиңелү ачысын” бик авыр кичергән минем кебек малайлар һәм кызлар өчен  бу очрашу зур ачыш булды. Моннан соң без интернет челтәрендә әкият геройлары түгел, ә илебезгә Бөек  Җиңүне үз тормышлары  хакына яулап алган геройларны эзләрбез.

         Киләчәктә   сугышта һәлак булган бабаларыбыз , армия сафларында кайнар нокталарда хезмәт иткән әтиләребез һәм эзләнү отряды  әгъзаларына лаеклы алмаш булырбыз!

Бүген мәктәбебез укучылары Мәхмүтова Э., Ганиев Ф., Мортазин М. һәм укытучылар Рәсәй күләмендә сәламәт яшәүне пропагандалауга багышланган "Татарстан чаңгы юллары-2015" чаңгы ярышларында катнашты. Һава торышы үзе дә чаңгычыларга көч бирә торган, кәефне күтәрә торган матур кояшлы иде. Барыбыз да бу ярыштан күтәренке күңел белән кайттык, бабайларның "Хәрәкәттә - бәрәкәт", "Сәламәт тәндә-сәламәт акыл" дигән гыйбәрәләренең дөреслегенә тагын бер кат инандык.

һәр елдагыча февраль  Хәрби-патриотик айлык буларак игълан ителде. Беренче тематик чаралар инде  үз тамашачыларын тапты. Бүген озайтылган көн төркеме укучылары өчен 6 нчы сыйныф укучысы Сибгатова Алия  мәктәп музеенда Бөек Ватан сугышына багышланган күргәзмә белән таныштыру оештырды.

Сыйныф әйдаманы буларак, Алиянең башлангычлар белән эшләү тәҗрибәсеннән бик күп файдалы эшләргә өйрәнергә мөмкин. Башка әйдаманнарны да нәтиҗәле эшчәнлеккә чакырабыз. 

Мәктәп музее ел саен яңарыш кичерә: андагы экспонатларның яше арткан саен, кыйммәте дә арта. Быел исә музей эчендә Бөек Җиңүнең 70 еллыгына багышланган Хәрби Дан почмагы оештырылды. Анда мәктәбебез чыгарылышы Сафин Ибраһим Кәрим улының шәхси әйберләре, районыбызның һәм авылыбызның "Хәтер" китаплары да урын алды. Кызыксынучыларны мәктәп музеенда көтәбез!

7 нче сыйныф укучысы Колмөхәммәтов Зөлфәтнең "Әби белән сөйләшү " шигыре "Көмеш кыңгырау" газетасының 31 нче гыйнвар санында "Укучылар иҗаты" рубрикасында басылган. Әсәрнең тулы вариантын  газетаның күрсәтелгән санын табып укырга тәкъдим итәбез.

Зөлфәтнең күңелендәге иҗат очкыннарының киләчәктә көчле ялкынга әйләнүен телибез. Афәрин Зөлфәт, булдыргансың!

Мәктәбебездә хәрби-патриотик тәрбия айлыгы кысаларында  Нурлат районын 22 ел дәвамында җитәкләгән легендар райком секретаре, Социалистик Хезмәт Герое, Бөек Ватан сугышы ветераны Габбас Кыям улы Гыйматдиновның тормышын һәм фидакяр хезмәт юлын яктыртуга багышланган сыйныфтан тыш чаралар уза. Үз чорының якты истәлеге булып замандашлары күңелендә генә түгел, ә бүгенге буын кешеләре күңелендә дә урын алган әлеге шәхескә әле тагын бик күп мәртәбә  соклануыбызны белдерербез. Гадилектән һәм гаделлектән  башланган бөеклек озын гомерле була ул..

Бүген татар теле һәм әдәбияты укытучысы Колмөхәммәтова З.Э. "Ел укытучысы-2015" конкурсының куст этабында чыгыш ясап "Укытучы- иҗатчы" номинациясендә җиңү яулады. Конкурс кысаларында ул 6 нчы сыйныф укучылары белән "Сан" темасы буенча ачык дәрес, "Әдәби әсәрләрдәге сурәтләүләрнең укучыларны тормышка әзерләүдәге әһәмияте" темасына мастер- класс һәм үз-үзен тәкъдир итү этапларын уңышлы узды.

Афәрин! Зөлфия Эдуардовна эшләрегез һәрвакыт шулай нәтиҗәле булсын! Котлыйбыз!

Алдагы көнге күз ачкысыз буран авылыбызда Бөек Ватан сугышында һәлак булган якташларыбыз истәлегенә куелган һәйкәл тирәсен дә аямаган иде. 9 сыйныф укучылары бүген һәйкәлгә илтүче сукмакны кардан чистартты. Егетләрнең игелекле эшләре үзләренә дә яхшылык булып кайтсын иде. Бу эшне оештырган сыйныф җитәкчесе- тарих укытучысы Рәхимова Т.А. бик зур рәхмәт, Туган илне ярату, батырларга  дан җыры менә шушындый эшләрдән башлана да инде ул!