Авыл китапханәсендәге тематик кичә М.Җәлилнең тормыш юлы  һәм гражданлык батырлыгына багышланды.   Китапханә нең иң актив китап укучылары бу чарада батыр шагыйрьнең әсәрләрен яттан укыдылар, мәдәният хезмәткәрләре тарафыннан сәхнәлштерелгән күренешләрне тамаша кылып, рәхәтләнеп ял иттеләр. Китапханәче Билданова Зилә апага 2-8 нче сыйныф укучылары катнашында уздырылган бу тәрбияви чара өчен чын күңелдән рәхмәтебезне белдерәбез. Сугыш афәтләрен күрергә язмасын, аяз күк йөзебездә тынычлык күгәрченнәренең бәхет теләп гөрләве , сандугачлар сайравы гына яңгырасын иде.

Мәктәбебездә,  малайларыбызны Ватанны саклаучылар көне белән тәбрикләп, "Ягез әле, егетләр!" конкурсы узды. Конкурска акыл эшчәнлегенә, хәйләгә, зиһен сынашка кагылышлы ярышлар кертелде, әмма биремне чишүнең серен "сатып алу" мөмкинлеге итеп егетләрнең физик әзерлеген күрсәтүе шарт иде. Бәйрәм чарасы кызыклы, үзенчәлекле һәм истәлекле булды. Шулай булмый ни! Көн саен кызлар бәйрәм белән тәбрикләп җыр, бию һәм истәлекле бүләкләр бирми бит! 

Бәйрәмегез котлы булсын , укучы егетләребез, ир-ат укытучыларыбыз! Сез-безгә терәк, Сез безгә кирәк! Исән-сау булыгыз, көннәрегезне шатлык бизәсен, бәхет гомерлек юлдашыгыз булсын!

Бөек Ватан сугышында Җиңүнең 70 еллыгына багышланган Муса Җәлил исемендәге  региональ фәнни-гамәли конференциянең төрле  номинацияләрендә мәктәбебездән 10 укучы катнашты. Шулардан Сәләхова Зөһрә ("Сәнгатьле уку" номинациясендә 1нче урын), Колмөхәммәтов Әлфис ("Рәсем" номинациясендә 2 нче урын), Колмөхәммәтов Зөлфәт ("М.Җәлил иҗатына багышланган проект" номинациясендә 1 нче урын)  мәктәбебезгә призлы урыннар алып кайтты.

Барлык катнашучыларга һәм аларны әзерләгән укытучыларга мәктәп җитәкчелеге исеменнән зур рәхмәтебезне белдерәбез.Күңелләрдәге эзләнү чаткысы һәм иҗат очкыннары бер дә сүнмәсен, яңа җиңүләргә рухландырсын. 

Мәктәбебездән бертуган Колмөхәммәтовлар Зөлфәт һәм Илсаф  районкүләм "Слет юных поэтов-2015" конкурсында үзләре иҗат иткән русча шигырьләр белән чыгыш ясадылар.   Мәктәп данын район күләмендә яклаган укучыларга һәм аларны әзерләгән укытучылар Хәбибуллина Ф.И. һәм Билданова Г.И. бик зур рәхмәт.

Бүген мәктәбебездә Җыр һәм сафта йөрү Республика конкурсының куст этабы узды. Иглай, Киекле, Андреевка, Иске Чаллы, Кизләү мәктәпләреннән районда куст данын якларга иң лаеклысы дип Киекле мәктәбе отряды танылды. Җиңүчене тәбриклибез, конкурсның район турында да сынатмауларын телибез!

Мәктәптә Муса Җәлил туган көнгә багышланган күргәзмә эшли. Күргәзмәдә әдипнең балачагы, тормыш юлы, иҗади эшчңнлеге, тоткынлыктагы тормышы турында мәгълүмат тупланган китаплар куелган.  Стена газетасында шагыйрь иҗатына багышланган кроссворд та урын алган. 

Бүген исә  патриот әдипне  искә алу иртәсендә укучыларга М.Җәлил турында видеофильм  күрсәтелде.  

Татар әдәбиятын укыганнан бирле

Горурланам Муса Җәлил белән,- ди безнең укучылар.

Үзе китә, җыры кала килгән

шәхесләрне тарих хәтерли.

Матур җырлар халык хәтерендә,

халык хәтере ул мәңге тере!

Ватанны саклаучылар көне һәм Бөек Җиңүнең 70 еллыгына багышланган Республика җыр һәм сафта йөрү конкурсының мәктәп туры узды.   Җиңүче команда иртәгә мәктәп данын конкурсның куст этабында яклаячак. Укучыларга зур уңышлар телибез.

"Рус теле атналыгы"н йомгаклап, Хәбибуллина Ф.И. "По морям, по волнам" исеме астныда 6-7 нче сыйныф укучылары катнашында  "диңгез бәрелеше" уздырды. Сайланган конкурс биремнәре Хәрби диңгез флоты, диңгезнең әдәби әсәрләрдәге чагылышын ачу, сурәтләү чараларын билгеләү, русча дөрес һәм матур сөйләм формалаштыруга багышланды. Командаларга һөҗүм оештырган "пиратлар" да "тоткыннарга" кызыклы биремнәр әзерләгән иде. Кичә җыр-биюләр белән үрелде, укучылар күңелендә матур тәэсирләр калдырды. 

Мәктәбебездә “Хәтер маршы-2015”  агитпоходы.

         “Хәтер маршы-2015” яшьләр  агитпоходының безнең мәктәптәге тукталышы күңелләрдә озак сакланыр.

          Җиңүнең 70 еллыгына әзерлек кысаларында мәктәбебездә “Истина” эзләнү отряды әгъзалары белән    очрашу узды. Моңа кадәр эзләнү отрядлары турында ишетеп кенә белгән укучылар өчен дә, укытучылар өчен дә бу очрашу бик тәэсирле булды.

         Үзләрен изге хезмәткә багышлаган  отряд кешеләре безгә үзләре сайлаган шушы кызыклы һәм файдалы эшнең асылын ачтылар. Алар  Бөек Ватан сугышы вакытында иң көчле бәрелешләр һәм Совет гаскәрләре иң күп югалтулар кичергән урыннарда   казу һәм эзләү эшләре алып баралар.  Табылган мәетләрнең кемнеке булуын  солдат медальоннарындагы язулардан  ачыклыйлар икән. Әмма мондый медальоннарның бөтен солдатларда да булмавы солдатны тану эшен бик кыенлаштыруын әйттеләр. Безгә алар казу эшләре барышында табылган солдат әйберләре күргәзмәсе, үз эшчәнлекләре турында видеофильм  тәкъдим иттеләр. Аларның кызыклы сөйләве үзләре башкаруында сугыш җырлары һәм укучыларның сорауларына җавап белән үрелеп барды. Әлеге очрашудан соң кызлар да җитдиләнгән, егетләребез буйга тартылып киткән кебек тоелды. Һәркемнең күзендә очрашуга килгән  “Истина” эзләнү отряды әгъзаларына эчкерсез рәхмәт, соклану һәм изге теләкләр чагыла иде.

          Сугыш чынбарлыгын интернет челтәрендә әкият һәм фантастик фильм геройлары белән “көчле бәрелешләр” аша белгән,  ул уеннарда  “югалту һәм җиңелү ачысын” бик авыр кичергән минем кебек малайлар һәм кызлар өчен  бу очрашу зур ачыш булды. Моннан соң без интернет челтәрендә әкият геройлары түгел, ә илебезгә Бөек  Җиңүне үз тормышлары  хакына яулап алган геройларны эзләрбез.

         Киләчәктә   сугышта һәлак булган бабаларыбыз , армия сафларында кайнар нокталарда хезмәт иткән әтиләребез һәм эзләнү отряды  әгъзаларына лаеклы алмаш булырбыз!