Бакчабызның һәр төркемендә көн саен дежурлар алышынып тора. Үз чиратлары җиткәнне балалар түземсезләнеп көтеп алалар, дежур бурычларын төгәл үтиләр. Дилия тәлинкәләрне берсе өстенә икенчесен куеп өя, ә Раяз белән Әмир өелгән тәлинкәләрне юарга кертәләр. "Эшләгәнебез кеше өчен булса, өйрәнгәнебез үзебез өчен", - ди алар. 

Санитар чистарту декадасы кысаларында бакчабызда зур өмә үткәрелде. Бакчабыз тагын да матурланып, яктырып калды.

Бакчада 35 ел буе белем һәм тәрбия биргән тәҗрибәле тәрбияче Фазлыева Гөлфәния Тәлгать кызы Татарстан республикасының Рәхмәт хаты белән бүләкләнде. Тәрбиячегә алдагы тормышында да сәламәтлек, иҗади уңышлар телибез. 

Бакчабызда Җәлил хәзрәт ярдәме белән бик зурлап Корбан гаете үткәрелде. Ул балаларга үзенең үгет-нәсихәтләрен бирде. Балалар матур чыгышлары белән бакчага килгән әтиләрне, бабайларны  сөендерделәр. Бәйрәмдә шулай ук Президент Аппаратыннан Хашимова Н.М., район мәгариф идарәсе җитәкчесе Зәкиева А.Ю. катнаштылар. Балаларның һәммәсенә күчтәнәч-пакет өләшенде.  

Өлкәннәр һәм  укытучылар көне уңаеннан бүген район үзәгендә ярминкә гөрләде. Анда безнең бакчадан да район халкына яшелчәләр тәкъдим ителде. 

Бүген бакчабызның мәктәпкә хәзерлек төркеме балалары мәктәпкә барып укытучыларны һөнәри бәйрәмнәре белән котладылар. Аларга матур шигырьләр, җыр һәм чәчәк бәйләмнәре бүләк иттеләр. 

Бүген  өлкәннәр көне уңаеннан бакчабызның зурлар һәм мәктәпкә хәзерлек төркеменә кунакка озак еллар тәрбияче булып эшләгән, хәзер лаеклы ялда булган Хәкимова Сәрия апа килде. Бу очрашуда балалар тәрбияче һөнәре турында күп яңалык алдылар. Үзләре дә кунакка һөнәрләрен күрсәттеләр, үз куллары белән эшләнгән бүләк һәм чәчәкләр бирделәр. 

Безнең балалар бакчасында тәрбияче булып эшләп, лаеклы ялга чыккан Кадыйрова Гөлниса белән нәниләр төркемендә җылы очрашу булды. Аңа бәйрәм уңаеннан җылы, матур котлау сүзләре иреште. Балалар аның матур теләкләрен тыңладылар, аны ешрак кунакка кил дип чакырдылар. 

Уртанчылар төркемендә тәрбияләнүче игезәк кызлар - Динә һәм Диләрәнең әбиләре бүген безгә очрашуга килде. Ул балаларга үзенең тормыш юлы, күп еллар бакчабызда пешекче булып эшләве турында сөйләде. Оныклары аңа багышлап җыр башкардылар һәм бию бүләк иттеләр. Калган балалар аны матур шигырьләре белән сөендерделәр, үзләре ясаган кул эшен бүләк иттеләр. 

Бүген мәктәк укытучылары һәм укучылары бакча хезмәткәрләрен һөнәри бәйрәмнәре белән котладылар, үзләренең моңлы җырларын, матур шигырьләрен һәм чәчәк бәйләмнәре бүләк иттеләр. Мәктәп һәм бакча арасындагы җылы мөнәсәбәт елдан ел ныгый, без килешеп һәм ярдәмләшеп яшибез.