Бүген лагерь тормышы тагын да җанланды. Балалар өчен бик күп уеннар, ярышлар оештырылды. Һәр бала да уенда актив катнашты. Ике  команда арасында  квест "Югалган флагны тап" уены балаларга бик ошады.Төшке аштан соң авыл китапханәчесе Әүхадиева Р. Татарстанның халык шагыйре Роберт Миңнуллинның иҗатына багышланган кичә уздырды. Көн сизелмичә дә үтеп китте.

Бүген лагерьда балаларга "Ут - дус та, дошман да" дигән чара узды. Башта утның җылылык һәм яктылык чыганагы гына түгел, саксыз эш иткән очракта күп бәла-казалар китереп чыгаруына карата викторина сорауларына җавап бирделәр.Ут-күз чыкмасын өчен үтәлергә тиешле кагыйдәләрне искә төшерделәр. Аннары табышмакка презентация аша җавап эзләделәр. Соңыннан ике командага бүленеп көчләрен сынаштылар. Көннең икенче яртысында шашка ярышында катнаштылар.

Лагерьның 14 көне шаяруларга, көлкеле хәлләргә бай булды. Балаларга кызыклы көн тәртибе тәгъдим ителде. Иң комик киемгә, йөрүгә, макияжга һәм рекламага җиңүчеләр билгеләнде.Көннең икенче яртысында әкиятләр буенча узган "Киресенчә" конкурсында укучылар бик теләп катнаштылар.

Бүген лагерьда "Сәламәтлек" көне. Иртә белән музыка астында иртәнге гимнастика ясадык. Иртәнге аштан соң туган авыл буйлап сәяхәткә чыктык, биек тау башына менеп авылны күзәттек, комлы, ташлы таулар янында фотога төштек. Чәчәкле болында волейбол уйнадык. Көннең икенче яртысында шашка, шахмат буенча көчләребезне сынадык.

Бүген лагерьның унберенче көне. Балалар "Көйне таны" дигән музыкаль уенда ике командага бүленеп ярыштылар,  үзләренең җыр-биюгә осталыкларын күрсәттеләр, ахырдан музыкаль уен уйнадылар. Көннең икенче яртысында наркоманиягә каршы әңгәмә үткәрелде, шул темага карата рәсемнәр ясадылар.

Бүген лагерьга йөрүче балалар белән берлектә "Россия, сиңа багышлыйбыз!" исеме астында 12 июнь - Россия көненә багышланган чаралар уздырылды. Россия символикаларына багышланган конкурс балалар күңеленә бик хуш килде. Балалар Россия дәүләте символлары турында белемнәрен ныгыттылар. Эчтәлекле презентация карадылар һәм үзләренә күп мәгълүмат тупладылар.