Өченче Глобаль юл йөрү кагыйдәләре атналыгы  кысаларында, бүген мәктәбебезнең активислары тарафыннан башлангыч сыйныф укучыларына класс сәгате уздырылды. Алар, түбән сыйныф укучыларын, юл йөрү кагыйдәләрен истә тотарга һәм һәрвакыт  игътибарлы булырга өндәделәр.

 Мәктәбебез укучылары  "Үлемсез полк"  проектында бик теләп катнаштылар. Бөек Җиңү көненә 21 портрет әзерләнде.

28 апрель көнне Казан шәһәрендәге 20 нче гимназия - “Балалар академиясе” иҗат үзәгендә күренекле татар шагыйре Абдулла Алиш истәлегенә багышланган “Алиш эзләреннән”  төбәкара фәнни-эзләнү укучылар конференциясе булып узды. Әлеге зур күләмле чарада безнең мәктәп укучылары да катнашты. Алар анда уңышлы чыгыш ясап зур җиңү яулап кайттылар. 6 нчы сыйныф укучысы (җитәкчесе Баева Гөлнара Ислам кызы) “Шигърият бакчасында”секциясендә җиңеп 1 нче дәрәҗәдәге диплом һәм күп санлы бүләкләр, үзенең иҗат җимешләре кергән китап җыентыгы белән дә бүләкләнде. “Алиш эзләреннән” секциясендә 8 нче сыйныф укучысы  җитәкчесе Баева Гөлнара Ислам кызы) шулай ук уңышлы чыгышы өчен сертификат белән бүләкләнде. Зур уңышыгыз белән котлыйбыз сезне, укучылар!

“Мәрхәмәтле  эшләр” акциясе дәвамында мәктәбебез укучылары үзләренең гаилә фотосурәтләрен алып килделәр. Алар үз гаиләләрендәге  матур гадәтләр,  милли  йолалар, һәр гаилә әгъзасы   хакында горурланып һәм яратып сөйләделәр, иҗади эшләр башкардылар. 6 нчы сыйныф укучысы  төзегән “ Фотосурәтләрдә гаилә”  исемле  иҗади презентация  моңа дәлил булып тора.

23 нче март көнне татар теле һәм әдәбияты укытучысы Сабирова Т.Г. 5-6 нчы сыйныф укучылары белән "Сөйдергәндә тел, биздергән дә тел" темасына бәйләнешле сөйләм үстерү дәресе уздырды.