Бүген Халыкара укытучылар көне! Барлык укытучыларыбызны һөнәри бәйрәмнәре белән тәбрик итәбез. Сезгә сәламәтлек, гаилә бәхете, эшегездә сабырлык һәм иҗади уңышлар, тырыш һәм аңлаучан  укучылар телибез.

Мәктәп укучылары үзләренә беркетелгән ялгыз өлкәннәрне бәйрәм белән тәбрикләделәр. Ярдәм акциясе уздырдылар

Бүген мәктәп укучылары мәчеткә йөрүче өлкәнннәр белән очрашу оештырды. Мәчет имам хатыйбы Кадыйров Равил абый укучыларга бик тә гыйбрәтле вәгазләр сөйләде, әхлаклылык турында бәян итте. Очрашу бергәләп чәй өстәле янында тәмамланды.

Мәктәпнең яшь туристлары Яшел Үзән шәһәрендә узган җәяүле туризм буенча ярышларда катнашып кайттылар. 8-9 класс укучыларыннан торган 8 кешелек команда призлы урын ала алмасалар да, ирешелгән нәтиҗәләре куанырлык - 4-5 урыннар. Әлбәттә туризм белән җитди шөгыльләнүче "Бригантина", спорт мәктәпләре белән көрәшүе авыррак шул. Шулай да 6 кыз, 2 егеттән торган командабыз үзләрен көчлеләр рәтендә булуын күрсәтә алды. Афәрин, укучылар!

Мәктәбебезнең 8 класс укучылары һәр эштә актив. Менә чишмә яннарын чистарту акциясенә дә алар беренчеләрдән булып кушылды. Класс җитәкчеләре Гафиятуллина Ә.Г җитәкчелегендә "Бәйрәш" чишмәсе буен чистартты алар. Афәрин, кызлар, егетләр! Чират кайсы класста булыр икән?

1 нче сентябрь - Белем көне. Безнең мәктәптә дә әлеге бәйрәм тантаналы төстә узды. Гомуми бәйрәм чарасыннан соң классларда Белем дәресләре узды.

Кичә авылыбызда татар теле укытучыларының Бөтенрәсәй семинарында катнашучылар кунакта, экскурсиядә булып китте. Алар К.Насыйри исемендәге архитектура этнография музеенда булдылар. Кунакларны каршы алу һәм чәй белән кунак итүдә мәктәп коллективы да актив катнашты.

Укучылар график нигезендә мәктәп бакчасында җәйге практика узалар. Үзләренә кышын ашарлык яшелчә үстерәләр. Мәктәп территориясендә матур чәчәкләр үстерәләр. Өлгергән җиләк-җимешне җыюда катнашалар.

Мәктәп укучылары авыл мәдәният йорты оештырган балалар сабантуенда катнаштылар. Укучылар уеннарда гына гына катнашып калмыйча, килгән кунакларга әкият-тамаша да күрсәттеләр. Бәйрәм күңелле узды!

Бүген 9 класс укучыларына аттестатлар тапшырылды. Барлык укучылар да имтиханнарын уңышлы тапшырып документлы булдылар. Чыгарылыш кичәсенә җыелган укучылар, әти-әниләр, укытучылар матур оештырылган кичәнең шаһите булдылар.