Бүген мәктәбебездә ООО "Сабагро" җитәкчесе Нигматзянов Фәрит Әлфәтович катнашында "Татарстан -2030: республикабыз киләчәгендә минем өлешем"  дигән тема буенча  Парламент дәресе үткәрелде. Эшмәкәр югары сыйныф укучыларына мәктәп елларында алган белемнәренең  безнең районыбыз, республикабыз, хәтта илебезнең киләчәген үстерүдә мөһим роль уйнаганын,киләчәгебезне үстерүче яшьләрнең нинди сыйфатларга ия булырга тиеш икәнлеген аңлатты.  Шулай ук 2030нчы елларда әлеге яшьләребезгә  зур өметләр баглауларын ассызыклап үтте.

Бүген 3а сыйныф укучысы Рамазанова Алсу (җитәкчесе Ахатова Л.Ф.) республикакүләм "Без бергә" фестиваль-бәйгесенең "Нәфис сүз" номинациясендә катнашып, уңышлы чыгыш ясап кайтты.

Бүген 3-6нчы сыйныф укучылары өчен районкүләм фәнни-практик конференция үткәрелде.

Укучыларыбыздан торган команда (җитәкчеләре А.Г.Галиев)  Сочида үткән Паралимпия уеннары чемпионы, райондашыбыз Рушан Миннегулов призына үткәрелгән  чаңгы ярышында актив катнашып, призлы урыннар яулап кайттылар.

Бүген мәктәбебездәге ир-егетләребез 8 Март бәйрәме  уңаеннан барлык хатын-кызларыбызны котлап, матур теләкләрен җыр, бию, нәфис сүз, күңелле күренешләр аша җиткерделәр. Бәйрәм концерты  бик күңелле, матур  булды.

Бүген 1-10нчы сыйныф укучылары чаңгыда шуу буенча ГТО нормативларын тапшырдылар.

Әлифба, син алып кердең,

Безне белем иленә.

Ялкаулык та, тырышлык та,

Шушы илдә беленә.

 Бүген мәктәбебездә 1 нче сыйныфта укучы 25 бала өчен балачакның иң күңелле бәйрәмнәренең берсе - Әлифба бәйрәме үткәрелде. Бәйрәмгә укучыларның әти-әниләре дә чакырылган иде. Кичә ахырында алар да балаларына иң матур теләкләрен җиткерделәр.

Мәктәбебезнең "Алтын куллар" түгәрәгенә йөрүче 3б сыйныф укучылары Вахитова Алия, Закарова Нәргизә, Шәйхетдинова Азалия (түгәрәк җитәкчесе Закарова Г.Р.) "Без бергә" республика конкурсының муниципаль этабында коллектив эш белән катнашып, үз төркемнәрендә 1нче урын яуладылар. Без аларны чын күңелдән котлыйбыз, алга таба да зур уңышлар телибез. 

Татар халкында шундый мәкаль бар: язгы бозга ястык калынлыгы булса да, ышанма. Шунлыктан, укучылар белән бозлыкларда үз-үзеңне тоту кагыйдәләре һәм боз астына китүчене коткару буенча сыйныфларда татар һәм рус телләрендә видеороликлар карау оештырылды.  

Бүген мәктәбебездә "Тату сыйныф серләре" дип аталучы республикакүләм бәйгенең мәктәп туры үтте. 5-9нчы  сыйныфларның әти-әниләр комитеты дүрт турда көч сынашты. Жюри нәтиҗә ясаганнан соң, иң күп балл җыеп, Тимершыкта узачак зона этабында 5нче сыйныфның әти-әниләр комитеты катнашачагы билгеле булды. Бәйге үтте, ә күңелдә якты хатирәләр сакланып калды. Без чын күңелебездән шушы бәйгедә катнашкан әти-әниләргә, аларны әзерләгән сыйныф җитәкчеләренә, бәйге барышында концерт номерлары белән чыгыш ясаган укучыларыбызга, гомумән, кемнең шушы бәйгене үткәрүгә көче, ярдәме кергән- һәммәсенә олы рәхмәтебезне җиткерәбез.