"Куркынычсыз тәгәрмәч" исеме астында узган көнебез аеруча истә кала торган булды. Иртәнге гимнастика ясап, иртәнге ашны ашаганнан соң "Юлда йөрсәң,бул өлгер, юл кагыйдәсен нык бел!" дигән рольле уен уйнадык. Аннан соң Кече Кибәче спорт-мәдәни комплексына экскурсиягә бардык, анда телевидениегә төштек. Көндезге аштан соң "Шалкан"  әкиятен юл йөрү кагыйдәләре белән сәхнәләштердек. Юл йөрү кагыйдәләрен өйрәнүгә багышланган бу көн барыбыз өчен дә бик файдалы булды.

"Дуслык" лагеренда бүгенге көнебез Казан шәһәрендә узачак Универсиадага багышланды. Иртәнге аштан соң "Универсиада-2013" темасына видеоролик күрсәтелде. Аннан соң шушы ук  темага багышлап асфальтта рәсемнәр бәйгесе узды. Бәйгенең җиңүчеләре: Шавалиева Гөлназ, Мухаметова Алия һәм Альбина, Хөсәенов Рәсим. Төрле спорт уеннары белән узган күңелле эстафетада да балалар актив катнашты. Көндезге аштан соң "Иң акрын йөрүче велосипедчы" ярышында Шарафиева Тәслимә, Хөсәенов Рәсим, Хамидуллина Ләйлә  җиңүче булып танылды. Тизлектә һәм җитезлектә сыналган бу көн дә истә калырлык булып узды.

Бүгенге көн "Могҗизалар көне" дип  исемләнде. Иртәнге линейка,гимнастикадан соң "Начар гадәтләрдән ерак йөр" дигән темага әңгәмә булды, видеофильм күрсәтелде. Аннан соң авыл китапханәсендә булдык. Китапханәче Гөлүсә Рамазановна "Могҗизалар кыры" уены оештырды. Көндезге аштан соң "Табигать могҗизалары" темасына аппликацияләр һәм рәсемнәр бәйгесе узды.

"Дуслык" лагеренда 13нче көнебез туган ягыбызга багышланды. Гадәттәгечә башланган көнебез "Шаһи" тавына экскурсия белән дәвам итте. Колхозлашу еллары белән бәйле булган бу атаманың килеп чыгу тарихы да кызыклы. Көндезге аштан соң  "Нинди ул минем туган төбәгем Саба яклары" дигән темага әңгәмә узды, Саба турында видеофильм карадык, "Сабам минем-туган ягым" җырын искә  төшердек. Күңелле уеннар, кызыклы әңгәмәләр, экскурсияләр белән бу көнебез дә сизелми дә узып китте.

"Дуслык" лагеренда бүгенге көнебез Әкиятләр иленә сәяхәттә узды: әкиятләр иҗат иттек, рәсемнәр ясадык, әкиятләр сәхнәләштердек. 11.30-12.30 сәгатьләрдә чын әкияткә эләктек-"Нарат" боз сараена бардык. Җәй уртасында рәхәтләнеп бозда шууны әкият дими, ни дисең инде! Бүгенге көнебез дә бик күңелле узды!

Лагерьда  бүгенге көнебез "Рухи мирасыбызны саклыйк" дигән тема астында узды. Пионер җырларын искә төшердек тә, Фәнил мәчетенә бардык. Анда авылыбызның имамы укучыларга вәгазьләр укыды, үгет-нәсыйхәтләр бирде.Көндезге аштан соң хәрәкәтле уеннар уйнап ял иттек, "Тешләреңне сакла!" дигән темага сөйләштек.

10нчы көнебез "Батырлар аланы" темасы астында узды. Гадәттәгечә иртәнге линейка, гимнастика һәм аш белән башланган көнебез Шытсу урта мәктәбендә эшләүче "Ал җилкән" лагерена йөрүче дусларыбызга сәяхәт белән дәвам итте. Анда безне бик матур чыгышлар белән сәламләделәр. Бергәләшеп "Джунглилар чакыра" уенында көч сынаштык. Кунактан кайткач, көндезге ашны ашадык та "Дәүләт символлары", "Герой якташларыбыз һәм батыр авылдашларыбыз" темасына әңгәмә узды, презентацияләр белән таныштык. Бу көн дә файдалы һәм истә калырлык булып узды.

"Дуслык" лагеренда 9нчы көнебез дә бик күңелле узды."Ты да я, мы с тобой" дигән җыр, русча речевкалар  өйрәндек. Рус теле фәне буенча белемнәрне сынау максатыннан "Угадай-ка!" викторинасы узды. "Тешләрем матур булсын дисәң" темасына әңгәмә  барлык балалар өчен дә файдалы булды. Саф һавада төрле хәрәкәтле уеннар уйнап ял да иттек.

Сабантуйлардан соң "Дуслык" лагере үз эшчәнлеген дәвам итте. Бүген бездә чын мәгънәсендә  дуслык көне булды- Шытсу урта мәктәбенең "Ал җилкән" лагеренда йөрүчеләр белән очраштык. Аларга үзебезнең сәләтебезне күрсәттек: матур җырлар җырладык, биюләр биедек. Аннан соң "Фәнил" мәчетенә экскурсиягә бардык, Зөлхиҗҗә чишмәсе буенда төрле күңелле уеннар уйнадык. Кунакларыбыз белән алга таба да аралашып торырга сүз биреп аерылыштык.

Бүгенге көнебез "Йолдызлар яңгыры" дип исемләнде. "Иң оста биюче"ләр: Сафина Сөмбелә, Хабибуллина Таңсылу, Шафиков  Рүзәл, Шавалиева Гөлназ, Шакирова Гөлназ, Каримова Руфинә, Минниязова Диләрә, Гарипов Фәннур , "Иң оста җырчы" лар-Шарипова  Эльвина һәм Инзилә, Хамидуллина Ләйлә, Гафиятова Илзия, "Иң оста сөйләүче"ләр  -Каримова Рузинә, Шарафиева Тәслимә. Көндезге аштан соң узган "Зәлидә" уены җиңүчесе булып  Каримова Руфинә танылды. Ямьле җәйнең бу көне дә бик күңелле узды.