Бу көннәрдә барлык укучылар, укытучылар һәм техник хезмәткәрләр бик тырышып кардан чын шәһәрчек ясадылар. Бөек җиңүнең 70 еллыгын, узган 2014нче елның мәдәният елы булуын, киләсе ел Кәҗә һәм Сарыгын, әкият геройларын, тауны, Кыш бабай белән Кар кызын - барысын да һәркем бик тырышып иҗат итте. Тырышлык бушка китмәде, мәктәбебез каршында һәркемне үзенә җәлеп итәрлек шәһәрчек пәйда булды.

   Кыш бабай белән Кар кызы барлык балаларга бүләк өләште. Балалар бик шатланып үзләренең һөнәрләрен күрсәттеләр. Яңа ел пакетында Президентыбыз Рөстәм Миңнехановның котлау открыткасы да булуы укучыларыбызны тагын да куандырды. 

Башлангыч классларда һәм 9 класста  яңа формада ата-аналар җыелышы узды. Һәр ата-ана кабинетларга йөреп предмет укытучылары белән аралашты, укытучылар укучыларның уку һәм тәрбия дәрәҗәсенә төгәл бәя бирде.

Мәктәпнең төп бурычларыннан берсе-укучыларга хезмәт тәрбиясе бирү, һөнәр сайлауга ярдәм итү. Әлеге бурычларны тормышка ашыру, районыбыздагы төрле оешмаларның эшчәнлеге белән таныштыру максатыннан Саба районы мәшгульлек үзәге 7,8,10 класс укучылары өчен экскурсия оештырды.. Укучылар "Саба тәрәзәләре", Килдебәктә урнашкан кәҗә фермасы һәм КФХ "Мухаметшин" хуҗалыгы эшчәнлеге белән таныштылар.

Бүген 4,5 класс укучылары арасында ГТО  комплексына багышланган "Күңелле стартлар" узды. Укучылар "Туплы хоккей", "Тоннель", "Көнгерә" , "Кубиклар" эстафеталарында  җитезлектә ярыштылар. Укытучылары- Вилданов Н.М., Камалов Р.В. 

 Тиздән Яңа ел бәйрәмнәре.  Бүген барлык класс укучылары "Кыш бабай остаханәсе" исеме астында узучы кар сыннары бәйгесенә әзерлекне дәвам иттеләр. 

Мәктәбебездә педагог-оештыручыларның район семинары узды. Педагог-оештыручы Газизова Г.Р. 5 сыйныфта  "Иҗат-бәхет чишмәсе" темасына җыен үткәрде. "Әнием кадерлем" темасына дәрестән тыш чара оештырылды.

Бүген мәктәбебездә 3 декабрь-Билгесез солдат көненә багышланган класс сәгате узды. Тарих укытучысы Каримова Л.Р. 2014нче елның октябрендә кертелгән әлеге истәлекле дата, аның мәгънәсе турында  сөйләде. 1967 елның 8 маенда ачылган "Билгесез солдат кабере" мемориаль комплексы турында мәгълүмат бирелде. Бөек Җиңүне якынайтуда үзләреннән зур өлеш керткән, исемнәре дә билгеле булмаган, каберләре дә табылмаган батыр солдатларның каһарманлыгын онытмаска өндәгән класс сәгате сугыш корбаннарын бер минутлык тынлык белән искә алып төгәлләнде.

Ана булу - изгелекнең таҗы,

Дөньяда иң олы дәрәҗә.

Ана кеше һәрбер баласының

Бәхетенә ача тәрәзә.

Бүген мәктәбебездә Аналар көнен билгеләп үттек. Һәр бала әнисенә булган тирән сөюен матур җырлары, күңелле биюләре һәм нәфис сүзләре аша җиткерде. Бу кичә кадерле әниләребез өчен зур бүләк булды. 

Авыр сүзне әйтмик әниләргә

Аларга без итик гел ярдәм.

Әниләрне саклыйк, яратыйк,

Калсын әле алар гел күркәм!

Аналар көне уңаеннан 7 класста Әниләр бәйрәме узды. Укучылар кадерле әниләре хөрмәтенә матур җырлар, күңелле биюләр башкардылар. Әниләр кадерле ул һәм кызларына, ә алар әниләренә иң кадерле теләкләрен җиткерделәр. Класс җитәкчесе-Вилданова Ә.Г.