Бу көнне авыл мәдәният йортында кышны озату - язны каршы алу, ягъни Нәүрүз бәйрәме узды.Бәйрәмдә бакча балалары һәм башлангыч сыйныф укучылары катнашты. Кыш бабай белән Нәүрүзбикә көч сынаштылар, балалар уеннарда катнашып язга килергә булыштылар. 

Балалар бакчасының "Чишмә" фольклор ансамбленең 5 еллык тарихы бар.Шушы вакыт эчендә  ансамбль авыл һәм район тамашачыларына татар халкының милли йолаларын, җырлы биюләрен бүләк итте.Бакчада милли тәрбиягә зур игътибар бирелә. Туган ягын, туган туган җирен яратучы, милли аңлы балалар тәрбияләү - бакчабызның төп максатларыннан берсе.Быел  авыл җирлекләре арасында узган "Җырлап яшә, моңлы халкым!" смотр-конкурсында Иске Карамалы авыл җирлеге беренче урын яулады.Концертта ансамбль чыгышын тамашачы бик яратып кабул итте. "Чишмә"леләр район үзәгендә гала-концертта катнашу хокукына ия булдылар.

Бакчаның юл өйрү кагыйдәләренә өйрәтү планы нигезендә 13-18 мартта "Юл йөрү кагыйдәләре атналыгы" бара. Атналык кысаларында юл йөрү кагыйдәләренә өйрәтү буенча бердәм белем бирү эшчәнлекләре, күңел ачу кичәләре, эти-эниләр белән викторина, анкета тутыру, участок инспекторы белән очрашу, максатчан экскурсия, рәсем конкурсы узачак.

Әти-әниләр, балалар белән "Минем йортым, минем урамым" дип аталган макетлар конкурсына йомгак ясалды. Бу конкурста беренчелекне Фатыхов Радик алды. Ул конкурска ике эш - авыл  мәчете һәм үзләренең йорт макетын ясап алып килгән иде. Шаяхметов Р., Закиров Д., Хаматуллина Г. икенче-өченче урыннарны бүлеште. Конкурста барлыгы егермедән артык эш каралды. Катнашкан барлык әти-әниләргә истәлекле бүләкләр тапшырылды.Макетлар исә бакчаның юл йөрү кагыйдәләренә өйрәтү почмагын тулыландырды.

Мәктәпкә әзерлек төркемендә бәйрәм иртәсе узды. Балалар әниләрне, әбиләрне, бакчада эшләүче апаларны бәйрәм белән котладылар.Малайлар кызларга бәйрәм бүләге - сюрприз әзерләгәннәр.Кичә уеннар, матур җырлар, биюләр белән үрелеп барды. Соңыннан кичә чәй өстәле артында дәвам итте.

Уртанчылар төркеме балалары бәйрәмдэ әниләрен яңа җыр-биюләр белән сөендерделәр.Балаларның үз куллары белән ясаган бүләкләре әниләрнең күңеленә бигрәк тә хуш килде.

Бүген кечкенәләр төркемендә әниләр бәйрәме булды. Балалар әниләрен бәйрәм белән котлап шигыръләр сөйләделәр, матур җырлар җырладылар, биюләр биеделәр.

З.Басыйрова исемендәге мәдәният сараенда узган "Йолдызлык - 2017" конкурсында "вокал-соло" номинациясендә 3 урын алдык.

"Минем йортым - минем урамым" дип аталган авыл йортлары һәм оешмалар макетлары конкурсы ахырына якынлашып килә.Тиздән конкурсның җиңүчеләре билгеле булачак. Конкурска килгән эшләрнең һәммәсе дә күп көч куеп, фантазия белән, күңел җылысын биреп эшләнгән. Барлык конкурсларда да актив катнашучы, оста куллы, тәрбиячеләребезнең уң кулы булган Фатихов Радикның эшләре күргәзмәгә куярлык.Конкурска ул ике эш: үз йортларының һәм авыл мәчетенең макетларын алып килгән.Аның эшенә сокланмыйча мөмкин түгел. Тормыш иптәше Зәнфирә белән тәрбиягә алган ике балаларын бакчага йөртәләр. Зәнфирә дә кул эшләренә бик оста. Аларга киләчәктә  сәламәтлек, балаларын тәрбияләүдә уңышлар теләп калабыз. 

Ватанны саклаучылар көне уңаеннан бакчада "Юлда йөрсәң уяу бул, юл кагыйдәсен нык бел!" дигән күңел ачу кичәсе узды. Кичәдә әтиләр, бабайлар. абыйлар, әниләр, әбиләр катнашты.Балалар юл кагыйдәләре турында тамаша күрсәттеләр. Әтиләрнең юл кагыйдәләре турында белемнәрен тикшерделәр. Кичә уеннар, җыр-биюләр белән үрелеп барды.