Яңа ел кичәсе мәктәбебездә шундый матур теләкләр белән башланды. 1-9 сыйныф укучылары, балалар бакчасында тәрбияләнүчеләр, әти-әниләр 7, 9 сыйныфлар әзерләгән тылсымлы, астрологик фаразлар белән тулы сихри тамашаны яратып карадылар. Барысы да Яңа елның төп бизәге - яшел чыршы тирәли  җырлап әйләнде, Кыш бабай янында яраткан шигырьләрен сөйләп бүләкләр алдылар, рәхәтләнеп куңел ачты, ял иттеләр. Әлбәттә, нинди Яңа ел бүләксез булсын инде? Барлык балаларга да Кыш бабай Яңа ел күчтәнәчләре өләште, Президетыбыз Миңнеханов Р.Н. һәм районыбыз башлыгы Рахматуллин А.И.ның  котлау открыткалары бирелде.  

Яңа еллар мөбарәк булсын! Тынычлык- иминлек, уңышлар алып кил, 2015 - ел!

Мөрәле кар шәһәрчегенә бәя бирү өчен күптән көтелгән кунаклар килде. 

Тыныч вакытта күпме ватандашларыбызның – әле иңнәре дә ныгып җитмәгән 18-19 яшьлек егетләрнең – моңарчы күрмәгән-белмәгән таулы-ташлы җирдә канлы бәрелешләрдә туган илләренә тугрылыгын сынаган, сугышчан дусларын югалту ачысы йөрәкләрендә мәңге төзәлмәс яра калдырган, күпме аналарның газиз улларын мәңгелеккә тартып алган  ул әфган сугышы! Бүген сыйныф җитәкчеләре бай эчтәлекле әңгәмәләр  үткәрде.

Ватан кушкан бурычны үтәүчеләрнең дә канатлары каерылмасын иде! 
Башка мондый сугышлар кабатланмасын, кайгы-хәсрәт, югалтулар берәүнең дә ишеген какмасын иде. 

Райондагы биналарны һәм аның территориясен зәвыклы итеп бизәүчеләрне ачыклау максатыннан оештырылган конкурста безнең мәктәп тә бик теләп катнашты.  Укучылар белән берлектә мәктәп коллективы зур көч куйды. Кардан 24 сын әвәләп, кар шәһәрчеге ясадык.

Башта сыйныфларда узган ата-аналар җыелышлары 2-чирек йомгакларына багышланган иде. Ахырдан гомуммәктәп җыелышында сүз бала тәрбияләүдә гаилә - әти һәм әнинең  роле турында барды. Хәзерге катлаулы чорда  гаиләдәге мөнәсәбәтләр, балага уңай үрнәк, аңа терәк булу, аның киләчәге өчен җаваплылык  ата-анага тагын да зуррак бурычлар йөкли. Балаларыбызның ышанычлы киләчәге- безнең кулларда. Шуны онытмасак иде!

27 декабрь Россия Федерациясендә Коткаручылар көне. Әлеге һөнәр—иң куркыныч һәм үтә дә җаваплы хезмәтләрнең берсе. Районыбыз коткаручыларының эшчәнлеге белән танышу максатыннан,  МЧС хезмәткәрләре белән очраштык. 

 "Нәрсә ул җирле үзидарә?", "Ул нәрсә өчен кирәк?", "Анда нинди эш белән шөгыльләнәләр?", "Анда кайсы һөнәр ияләре эшли? һ.б. күп кенә сорауларга ачыклык кертү  максатыннан башлангыч сыйныф укучылары авылыбызның җирле үзидарәсенә юл алды. Үзидарәдә аларны Гибадуллина Гүзәлия апалары каршы алды. Ул укучыларны үзидарәнең эшчәнлеге белән таныштырды, сорауларына җавап бирде. 

Үсеп килүче буынның  экологик белемнәрен арттыру, туган як табигатенә сакчыл караш  тәрбияләү, экологик белем бирү системасына ярдәм итү һәм аны үстерү.максатыннан башлангыч сыйныф укытучылары дәрестән тыш эшчәнлек кысаларында чишмәләребезнең торышы белән танышып кайтты. Әйләнә – тирәбезне чиста тоту – безнең төп бурычыбыз.

 Һәр чишмәнең үз яме, үз тәме бар. Чишмәләр саклап, карап- чистартып торсаң гына яши. Шуңа күрә кайчан гына барма, алар, җырдагы кебек, көмеш, саф сулары белән челтерәп агып, авыл халкын сөендереп тора. Чишмәләр - безнең яшәү чыганагыбыз ул.

Уку алдынгыларын, фестиваль, олимпиада, конкурс җиңүчеләрен, ятим балалар һәм балалар йортында тәрбияләнүчеләрне бүген Республика чыршысына "Татнефть - арена"га  җыйдылар. Әлеге укучылар арасында безнең мәктәптән 9-сыйныфта укучы, күп кенә конкурсларда катнашып җиңү яулаган, укучылар үзидарәсе лидеры,  уку алдынгысы Лиана  Сибгатова да бар иде. 

Районда Яңа елга иң матур бизәлгән бина конурсына старт бирелде. Бәйге шартлары белән танышканнан соң без дә җиң сызганып эшкә керештек. Исәп сынатмаска!