Бүген укучылар мәктәп бакчасында соңгы уңышны җыйдылар. Кәбестәләрне алып, саклауга куяр өчен әзерләделәр. Барлык укучылар да тырышып эшләде. Афәрин!!!

Хәзер авыл урамнарында да машиналар күп йөри. Юлга чыксак аптырап, югалып калабыз. Бүген Сарай-Чокырча башлангыч мәктәбендә “өй – мәктәп – өй” маршруты буенча “куркынычсызлык минутлары” үтте. Беренче сыйныф укучыларына юлны имин чыгу кагыйдәләре аңлатылды.

Юл билгеләрен исегездә тотыгыз! Юлларда һәрвакыт игътибарлы булыгыз.

Ялгыз яшәүче өлкәннәргә, хезмәт ветераннарына ярдәм итү- һәр кешенең изге бурычы. Бу атнада укучылар ялгыз әбиләрне бәйрәм белән котладылар, аларга кулдан килгәнчә өй эшләрендә булыштылар.

Мәктәбебездә өлкәннәр һәм укытучылар көне уңаеннан “Сез иң гүзәл кеше” темасына рәсем конкурсы уздырылды. Укучылар бик теләп катнашты.

Укытучылар көне- көзге матур бәйрәмнәрнең берсе.  Ул гомумхалык бәйрәме, чөнки һәр кеше тормышында укытучының катнашы бар. Укучыларыбыз  әлеге күркәм бәйрәм уңаеннан  үткәрелгән  акциядә актив катнашалар. Бүген алар укытучылар хөрмәтенә флешмоб биеделәр. 

Мәктәбебездә татар халкының традициясен, культурасын, гореф-гадәтләрен өйрәнүгә зур игътибар бирелә. Бу тема класс сәгатләрендә, әңгәмәләр вакытында тирәнтен карала.

1 октябрь - өлкәннәрне хөрмәтләү һәм ихтирам көне уңаеннан 1 нче сыйныф укучылары әби-бабайларын тәбрикләргә открытка ясадылар. "Үз кулларың белән ясалган бүләктән дә яхшысы юк", - диләр алар.

1991 елның 1 октябреннән башлап бөтен дөньяда Өлкәннәр көне билгеләп үтелә. Бу көнне бигрәк тә ялгыз әби-бабайлар, мөмкинлекләре чикләнгән өлкәннәр, тормыш шартлары начар булган олы кешеләр игътибар үзәгендә булырга тиеш. Аларның аздан да күңелләре була. Бу көнгә 6 нчы сыйныф укучылары күршеләрендә яшәүче әби-бабаларына бүләкләр ясадылар.

28 нче сентябрь көнне Арчаның 6 нчы номерлы мәктәбендә 2004-2005 нче елгы яшүсмерләр арасында көрәш ярышы узды. Мәктәбебезнең 9 нчы класс укучылары Закирҗанов Әлфис 60 кг , Вәлиев Илмир 45 кг кадәрге үлчәүдә 2 нче урынны яуладылар. (Тренерлары - Ахмадиев М.Г.) Егетләргә алдагы ярышларда да уңышлар телибез!

Сарай-Чокырча башлангыч мәктәбе укучылары җәй буе мәктәп бакчасында тырышып эшләделәр. Мәктәп бакчасы һәркемне үзенә җәлеп итеп торды. Менә хәзер бакчада көзге эшләр бара. Укучылар, кечкенә булсалар да, барлык эшләрдә дә актив катнашалар.