Мәктәптә һәм балалар бакчасында Габдулла Тукайның 130 еллыгына карата чаралар булып узды.  Балалар бакчасында шигырь бәйрәме, Габдулла Тукайның әсәрләре буенча  эшләнгән мультфильмнар карауны бик ошатты нәниләр.
     Ә менә мәктәп укучылары арасында олы шагыйрьнең тормыш юлы һәм иҗаты буенча  викторина үткәрелде. Укучылар үзләрен  шигырь язу буенча да сынап карадылар. 

Бүген мәктәбебезнең  1, 2 нче класс укучылары язгы табигатьне һәм андагы үзгәрешләрне күзәтергә чыктылар. Язгы һава торышы, кояш  тирә-юньгә, үсемлекләргә ничек тәэсир итә... Сорауларның барысына да җавапны укытучылар белән бергәлектә эзләде алар. Мең кат ишеткәнче, бер кат күрүең хәерлерәк, диләр бит.

Балалар бакчасында әвәләү шөгылендә балаларга Тукай шигырендәге Акбайны ясау бик тә ошады.

Бүген бездә өмә гөрләде. Мәктәп һәм балалар бакчасы территориясен чистарту буенча эш алып барылды.

Бөек шагыйребез Габдулла Тукайның тууына 130 ел тулу уңаеннан мәктәптә дә, балалар бакчасында да кул эшләре  күргәзмәсе көннән-көн тулылана. Бүген дә балалар бакчасына йөрүче Ильяс һәм Дилә Чумаковлар бик матур  итеп "Кәҗә белән сарык"  әкиятенә композиция эшләп алып килгәннәр. Әлеге композиция балалар бакчасындагы күргәзмәдә урын алды.

Бүген безнең мәктәп командасы Ашытбаш урта мәктәбендә уздырылган шашка ярышларында катнашып кайтты.  Ярышларда берничә районнан килгән командалар катнашу сәбәпле, бәйге шактый кызган темпта һәм көчле барды. Безнекеләр дә кимен куймады - башлангыч мәктәпләр арасында беренче урынга чыгып, грамота алып, сөенеп кайттылар. Котлыйбыз!

Бакчабызда һәр иртәне зарядкадан башлыйбыз.  Төрле шөгыльләр  башланганчы һәм иртәнге ашка кадәр зарядка ясау көндәлек режимның бер өлешен тәшкил итә һәм балалар зарядка ясауны бик теләп башкаралар.

Белүебезчә, 2016 ел Россиядә Кино елы дип игълан ителгән иде. Шул уңайдан, укучыларыбыз һәм балалар бакчасына йөрүчеләр Пешәнгер күпфункцияле үзәгендә балалар өчен кино карадылар. 

 Бүген мәктәп һәм балалар бакчасы коллективы өчен "Хезмәтне саклау, уен мәйданчыгында куркынычсызлык кагыйдәләре" буенча искәртү,  аңлату эшләре алып барылды.

Районыбызда 25нче апрельдән 17нче майга кадәр  ышаныч телефоны көненә карата айлык игълан ителде. Мәктәбебездә әлеге уңайдан берничә чара планлаштырыла. Иң беренче чиратта, классларда "Син берүзең түгел",  "Һәр кыенлыктан чыгу юлы бар", "Без бәхетле!" дигән темага  әңгәмәләр, ата-аналар җыелышы һәм башка чаралар булыр дип көтелә.